Read Kok Borok ESEKIEL 7 Bible Online

ESEKIEL 7 - Kok Borok bible

ESEKIEL 7

¹Subraiyung ano hai hwnwi sa kha:

²Borokni sajla, Subraiyung Kaitor Israil hano hai hwnwi sa-o, ha babaibrwi tẃi’-no páina kasu kha.

³Tabuk nwng páina kasu kha, nini saka-o ani jolima klainai, nwng samung tangmani tẃi’-no nono buj thumnai tei nini kwbángma samung hamyarokni manthaino rwnai.

⁴Tei ang nono yakar glak tei khábo khairok glak, phiya ba nwng samung sitra khlaimani bagwi ang nono sátoknai, hakhe ang se Subraiyung hwnwi nwng saui mannai.

⁵Subraiyung Kaitor hai hwnwi sa-o, “Kaisa pái khe tei kaisa sokomorma sók phainai!

⁶Páimung sók phai laha, abo phai se tong kha; nai di, abo nini bagwi phaiwi sók phai kha!”

⁷Nini ha-o tongnairokni komornani sal sók phai kha; birmanni sal sampha kha hatháirogo tongthokmungrok tong glak kha.

⁸Tabuk ang daktino nini saka-o ani jolima lukhlaiwi rwnai tei nini saka-o ani jolima pái rwnai tei nwng selengmasingcha samung tangmani haino buj thumjaknai; nwng samung hamya khlaima tẃi’-no sátokjaknai.

⁹Ang nono khairok glak tei khabo khásuk glak, nwng samung hamya tangmani tẃi’-no ang nono sátoknai. Hakhe Subraiyung sátogo hwnwi norok saui mannai.

¹⁰Nai di, nini bagwi a sal sók phai kha! Komorna sal sók phai kha,

¹¹ur patiui teibo hamya láisuk kha. Bórokni bagwi mungsa tong glak, bórokni rang-rí, tongthok-cháthok mungsa tong glak.

¹²Jora sók phai kha tei sal bo sampha kha, painairok ta tongthok di tei phalnairokbo ta khá kham thung, tamni hwn ba jotoni saka-o jolima klainai.

¹³Phalnairok kwthang tong sak bórokni phalma ha-o kiphil glak,[5] tamni hwn ba Kaitorni jolima jotoni saka’-ono, abo kiphilwi phai glak, bórokni sumsokrokni bagwi khoroksa phano sakno mwthangwi man glak.

¹⁴Bórok totro kotor subui joto tiyar wng lai kha, tamni hwn ba khoroksa phano choba-o tháng li ya, tamni hwn ba ani jolima jotoni saka-o khlai kha.

¹⁵Laharrogo khe choba nang laijak, bisingo khe kulum kwsa tei asari nangjak, panthoro tongnairok khe seng bai ma thwinai tei kamiyung bisingo tongnairok khe asari tei kulum kwsa bai ma thwinai.

¹⁶Baksa kwthang tong rwknairok khe harungni tokthu hai khe hachukrogo khárwi yóknai, joto’-no bórok sakni sumsokni bagwi kapjak.

¹⁷Jotoni yak’-no bel bainai tei jotoni yáskúrok’-no twi hai khe kebel wngnai.

¹⁸Bórok rí soroi ma kan bainai tei kirima hapjak bainai, bórok joto ma lachi bainai tei bórokni bokhorok siljak bainai.

¹⁹Bórokni rukphaino laharo ma khibinai tei bórokni rangchak khe chúk ya manwi hai se wng si-o, Subraiyung jolimani salo bórokni rangchak tei rukphairok bórokno mwthangwi man glak; abórok bórokno khá kwchang rwui man glak tei ok khuimabo ham glak tamni hwn ba bórokni sumsokrokno bórokno kebeng kha.

²⁰Bórok naithok gwina-ganthi kan laimani kung chuk lai-o, abo bai bórok selengmasingcha mangtangrok snamo, aboni bagwi Subraiyung bono manwi chúk ya hai snamnai.

²¹Ang bórokno buini hani bororokni yago choba-o segwi tlangjak manwi hai khe ha sakani borok hamya kukrokni yago yapharnai tei bórok abono dera rwnai.

²²Ang bórokno naisik glak tei ani tongthai kwtharno dera rwnai sikhokrokbo haino aro habwi dera rwnai.

²³Sikol snam di, ha buthar laimani thẃi bai kupulung tei kamiyung kupulung búma man ya[6] tungphlajak.

²⁴Ang jotoni slái dopha hamyarokno tubu-ui bórokni ha-o achuk rwnai. Ang bórokni kung chukmanirokno rwnai tei bórokni kwthar háyárokno dera rwnai.

²⁵Kirimasingcha sók phai phuru khe, bórok tong kwchang rutuk anw, hai phano man glak.

²⁶Hamyani saka-o teibo hamya sók phainai; tatal kókrok bacha rw lainai Diyarirokni thani-o bórok kók sẃng lai anw, hwn ba ochairokni thani-o mungsa phrwngjaknai tei okra chakrarokni thani mungsa kók sajaknai tong glak.

²⁷Habugrarok ma kap anw tei tẃiphangrokni mungsa naharmung tong glak, bororok kirimani bai kwlwi anw. Bórok khlaimani tẃi’-no ang bórokno yagul su anw, buino buj thummani hai’-no ang bórokno buj thumnai, “Hakhe ang se Subraiyung hwnwi bórok saui mannai.”