Read Kok Borok ESEKIEL 8 Bible Online

ESEKIEL 8 - Kok Borok bible

ESEKIEL 8

¹Buini ha-o khaui tlangjakmani bisidokni, nokha taldokni tei salbani salo Judani okra chakrarok ani nogo achuk laiwi tong lai phuru, achomsa khe Subraiyung Kaitorni phan ani thani sók phai kha.

²Hakhe ang nai ba khoroksa borokno kosol khe nuk kha, bwchang khama bwkhak khe hór hai nuk kha tei bwchangni saka-o khe kwchẃngma manwi hai khe chẃngsajak.

³Bo yak pholokma hai khe, bwkhnai-o romwi ano tlang kha. Kaitorni Phola ano ha bai chuknohani kwcharo tisaui tlangwi phunuk kha tei Jerusalemo tubu kha. Bo ano noktharni bisingo salsibai bwkhak naharjak duglam tẃi tlang kha, aro mwtaini mangtang tongo, abórok’-no Kaitorno joli rwnairok.

⁴Nai di, aro ani bwskango Israilni Kaitor chẃngsacha wngwi tongo, abo ang hapharo tong phuru nukmano kosol.

⁵Hakhe bo ano hai hwnwi sa kha, “Borokni sajla, salsibai bwkhago nahar di, hakhe ang salsibai bwkhak nahar kha, ang nuk kha, duglam hapmani háyá gana-o Kaitor músúmani a mangtangno nuk kha.”

⁶Kaitor ano hai hwnwi sa kha, “Borokni sajla, bórok tamo khlai tong nuk de nuk kha? Israilni bororok samung hamya khlai laiwi ano hakchalo rohorna bagwi khlai lai-o. Phiya ba nwng bini slái teibo samung hamyarok nuk anw.”

⁷Bo ano nukani duglamo tubu kha tei ang naisigwi nai ba chokdeualo bwlam nuk kha.

⁸Bo ano hai hwnwi sa kha, “Borokni sajla, chokdeualno khur di.” Ang chokdeualno khurwi nai ba duglam kaisa nuk kha.

⁹Bo ano hai hwnwi sa kha, “Bisingo thángwi bórok oro samung hamya tang laimano naiwi di.”

¹⁰Hakhe bo ano bisingo hap di hwnwi sa kha, nai di aro bebak malnairok tei selengmasingcha yabrwirok tei Israilrok khulummani mwtairokni mangtang kwbángma swijak tongo.

¹¹Bórokni bwskango Israilni okra chakrarok khorok 70 bacha laijak khe tongo tei bórok bai pal Saphanni bwsla Jasania bo bachajak. Borok thwgwi’-no satrai bokong tẃi laijak tei satraini hoku kasaui tong kha.

¹²Hakhe bo ano hai hwnwi sa kha, “Borokni sajla, Israilni okra chakrarok mwnago tamo khlai lai tong nuk kha de? Borok jotoni nogo mangtangrok kupulung tongo. Bórok hai hwnwi sa lai-o, ‘Subraiyung chwngno nuk ya, bo hano yakarwi tháng kha.’ ”

¹³Hakhe Subraiyung ano hai hwnwi sa kha, “Nwng bórokno omoni slái teibo samung hamya khlaimani nuknai.”

¹⁴Hakhe bo ano Subraini nokni salsibai bwkhakni duglamo tubu-ui, aro bwrwirok mwtai Tamuj thwimani bagwi kabwi tongmani phunuk kha.

¹⁵Hakhe bo ano hai hwnwi sa kha, “Borokni sajla, nwng abono nuk de nuk kha? Nwng aboni slái teibo kwbángma samung hamya nuk anw.”

¹⁶Bo ano Subraini nokni bisingni khotolo tubu kha, aro noktharni duglamo nuka bai háyá kwcharo Subraiyungni nokthar bwkhak phikung khlaiwi bacha laijak tei bórokni mwkhang salka bwkhak nahar laijak khe salno khulum laiwi tong lai-o.

¹⁷Hakhe Subraiyung ano hai hwnwi sa kha, “Borokni sajla, nwng abono nuk de nuk kha? Judiani bororok oro abo hai samung hamya tang laimani kisicha hwnwi de nwng chong? Bórok ha kupulung ur phnangwi ano bo haino joli rw lai kha. Nai di, bórok bahai khe ano mwkhang sók lai kha.

¹⁸Aboni bagwi ang bórokno joliui yagul sunai, ang bórokno phiyók glak tei khábo khairok glak, bórok khorang kotor khe ani thani-o chirigwi kap lai phano ang khna glak.”