Read Kok Borok ESEKIEL 9 Bible Online

ESEKIEL 9 - Kok Borok bible

ESEKIEL 9

¹Hakhe bo khorang kotor khe chirigwi ano hai hwnwi sa kha, “Oro phai di, kamiyungni barja manjak bororok, norok bebakno yago da-sengrok tẃiwi phai di.”

²Hakhe borok khorokdok salsibai bwkhago naharjak saka bwkhakni duglamni phai lai kha, borok thwgwi yago tantharjaknai manwirok tẃi laijak tei bórok bai baksa aro rí kuphur khe kanjak borok khoroksa tongo tei bini thani swijaknai manwi tongo. Bórok nokthar bisingo thángwi pitolni háyá gana-o bachaui kha.

³Tabuk Israilni Kaitorni chẃngsacha bo tongmani thai cherubni kutulwi noktharni phiyokjak duglamo tháng kha. Bo yago swijaknai tẃijak khe rí kuphur kanjak borokno ringhor kha.

⁴Tei Subraiyung bono hai hwnwi sa kha, “Kamiyung kwchar tẃi tei Jerusalemni kwchar tẃi tháng di, oro hamya samung tangjakmani bagwi khá khamwi tekto manẃi tongnairokni talikha-o mari rigwi rw di.”

⁵Kaitor ano khna rwui tei kubun bororokno hai hwnwi sa kha, “Kamiyung gwnangwi bo bai pal tháng laiwi buthar lai di, khoroksano phano ta phiyók lai di tei khoroksano phano tabo ta khairok di.

⁶Chakrarokno, chwla siklarokno, bwrwi siklarokno, bumarokno tei chwrairokno buthar bai di. Tamo khe talikha-o mari gwnang borokno khe ta tang di. Oro ani noktharni simi cheng di.” Hakhe bórok aro noktharo bachaui tongnai okrarokni simi cheng lai kha.

⁷Hakhe bo bórokno hai hwnwi sa kha, “Noktharno hamya khlai di tei kwthwi bai nokhla supung di. Swkangwi tháng di.” Hakhe bórok ongkhorwi thángwi kamiyungni bororokno buthar lai kha.

⁸Bórok buthar laiwi tong phuru khe, ang saichung susuk se wng si-o tei ang ha-o mwkhang kongwi kap kha tei hai hwnwi sa kha “Subraiyung Kaitor nwng Jerusalemno joliui bebak Israilrokno sokomor bai sinai da tamo?”

⁹Hakhe bo ano hai hwnwi sa kha, “Israilrok bai Judani bororokni sumsok belai khe báng kha, borok buthar laimani bai ha kupulung wngjak tei kamiyungo samung sitra bai se kupulung. Bórok sa lai-o, ‘Subraiyung hano yakar kha tei naisigwi nai li ya.’

¹⁰Tei angbo bórokno nai li ya tei khábo khairok glak, phiya bórokni samungno bórokni bokhokrok saka-o klai rwnai.”

¹¹Hakhe rí kuphur kanjak tei swijaknai manwi tẃijak a borok kiphilwi phaiwi hai hwnwi sa phai kha, “Nwng dagima hai’-no ang khlaiwi pái kha.”