Read Kok Borok DANIEL 10 Bible Online

DANIEL 10 - Kok Borok bible

DANIEL 10

¹Parsiani habugra Sairas habugra chámani nokha bisikthamni bisi-o Danielni thani kók tháisa sakhlaijak kha, bini mung Beltesajarbo hwnjago. Kók sakhlaijakmani khe kubui’-no, phaiya ba romwi mannani belai kutuk. Bo a kókno tei imangno buchiui man kha.

²A jora-o ang Daniel, hatibar tham jora khá khamwi tong kha.

³Ang mai cha li ya, muihan chá li ya, arak nung li ya tei ani sakno sói hati bartham jora thok phul ya khe tong kha.

⁴Ang puilani talni nwichibrwini salo twima kotor Taigris rukungo bachaui tong phuru,

⁵ang saka naisaui nai ba khoroksa borok rí kuphur kaham kanjak tei bwchango rangchakni changduk bai khajak khe nuk kha.

⁶Bini bwsak gwina-ganthi bai chẃngsajak bini mwkhang hór hai kwchẃngma, bini mokolrok hórjlai chẃngma hai, bini yakrok tei yakungrok pitol chẃngmani hai chẃngsajak tei bini khorang borok kwbángma kutuk laima hai kotorma.

⁷Ang khoroksa’-no imang nuknai, ang bai pal tongnai bororok mungsa phano nuk ya gwja, phiya ba bórok belai kirijak bai kha tei khárwi thángwi huijak lai kha.

⁸Hakhe ang saichung aro klangwi thángjak khe abo hai imang kotor nuk kha. Ani mungsa phan kwrwi kha, kirima bai ani mwkhang sláijagwi tháng kha, phanbo man phi li ya.

⁹Hakhe ang bini khorang khna kha, ang muktrwi tháng súgwi si li ya khe ha-o mwkhang sungwi klaiwi tong kha.

¹⁰Nai di, ano yak kongsa bai romwi kwlwi twtwi ani yakrok tei yáskú sungwi bacha rw kha.

¹¹Bo ano hai hwnwi sa kha, “O Daniel, Kaitor nono hamjago; ang samani kókno khunju kaichomwi khna di, bacha di, ang nini thani rohor jago. Bo o kók saui tong phuru khe, ang kwlwi twtwi bacha kha.”

¹²Hakhe bo ano hai hwnwi sa kha, “Ta kiri di, Daniel, nwng puilani salni simi nwng bachanani bagwi bwkha-o chongwi tei nini sakno Kaitorni bwskango koinene khlaimani bagwi, Kaitor nini kókno khna kha, nini kókni bagwino ang ma phai-o.

¹³Parsia hani bugra ano nokha sal nwichisa jora kasu-ui ton kha, phiya ba Mikail bugrarokni bokhorok ano chubanani phai kha, hakhe ang bono Parsia hani bugra bai aro kabu kha.

¹⁴Ang nini bororok bwskangni salo tamo wngno wng ya, abono nono buchi rwnani phai-o. Imang khe bwskang salrokni bagwi se.”

¹⁵Bo o kókno sa phuru khe, ang ha-o ma naikhlai kha tei kók saui man ya wng kha.

¹⁶Nai di, khoroksa borokni sajlano kosol khe ani khukchwi-o tang kha, hakhe ang búkhúk phiyogwi kók sa kha. Ani bwskango bachaui tongnaino ang hai hwnwi sa kha, “Ani Subrai, ang imang nukmani bai aswk khe bel kha ani phan kwrwi laha.”

¹⁷Bahai khe Subraini o seleng ani Subraini bwskango kók saui mannai? Tamni hwn ba ani phan kwrwi kha tei ani rangmabo páiwi tháng kha.

¹⁸Tei uáisa borokno kosol nukjagwi ano tang khe ang phan man kha.

¹⁹Bo hai hwnwi sa kha, “Kaitor nono hamjago, ta kiri di, khakchangma tong thung, phan rak di tei bwkha tor rw di.” Subrai bo ano omo hai saui ang phan man khe ang hai hwnwi sa kha, “Nwng ano phan rw kha, tabuk le ano sa di.”

²⁰Hakhe bo hai hwnwi sa kha, “Ang nini thani tamni bagwi phai, saui de man? Tamo khe ang tabuk Parsiani bugra bai choba khlaina bagwi kiphilnai tei bo bai ang tong phuru Grisni habugra phainai.

²¹Tamo khe Kubui bijabo tamo tong abono ang nono sanai; omorokno kebengwi ano chubanai Mikailno karwi khoroksa phano kwrwi.