Read Kok Borok DANIEL 11 Bible Online

DANIEL 11 - Kok Borok bible

DANIEL 11

¹Mediani habugra Darias bugra chámani bisi kaisa phuru ang bono chubanani tei phan rwnani bacha kha.

²“Tabuk ang nono kubui’-no phunuknai; “Nai di tei khoroktham Parsia-o habugra bachanai tei khorokbrwi-o khe, bo tei khorokthamni slái gwnang kuk wngnai, bini rang-rí bai phan gwnang wng phuru khe bo Grisni habugrano batainai.

³Hakhe khoroksa phan gwnang habugra bachanai, bo ha kotorma-o bugra chánai tei bini muchung tẃi khlainai.

⁴Phiya ba bini phan bai kuchugo kasa khe, bini ha báiwi klainai tei khakbrwi khe swkakjaknai, bini bosongni ya borok khe bugra chánai tei bini phan bai bugra chámani tei wng ya, bini ha phúiwi khibijaknai tei buini thani yapharwi rwjaknai.

⁵“Hakhe salgrabaini habugra phan gwnang wngnai, tamo khe khoroksa bini tẃiphang bini slái phan gwnang kuk wngnai tei bini ha teibo uar kuknai.

⁶Bisi kisani ulo Ijipni habugra Siriyani habugra bai bayap kha lainai tei bini bwsajwk Siriyani habugrani aro thángnai. Phiya ba bórok bayap kha laimani dwgwi tong glak, bihik, bwsai, bini chwrai tei bo bai pal thángnai joto bini selengrok butharjak bainai.

⁷Aboni ulo, bini aroni’-no berdum kaisa achainai; bo salgrabaini sengkrakrok bai choba khlainai tei sengkrakrokni thongla-o habwi bo Siriya habugrani sengkrakrokno choproknai tei bini phanno phunuknai.

⁸Bo Ijip ha-o takjak mwtairokno tei rangchak, rukphaini manwirokno kiphilwi tlang phinai, bisi kwbángma salsibaini habugra bai choba nang lai ya khe kwchang kwchang tongnai.

⁹Siriyani habugra Ijipno segwi bini ha-o kiphilwi ma thángnai.

¹⁰“Habugrani bwsarok chobani bagwi tiyar wngnai tei kwbángma sengkrakrokno thumnai, bo twi kotor hai khe phaiwi arirokno bebak kamiyung krakmarokno choprogwi mechen bainai.

¹¹Hakhe salgrabaini habugra belai jolijagwi salsibaini habugra bai choba nang laina bagwi sengkrak báng rwnai tei kwbángma sengkrakrok’-no bini yago klainai.

¹²Bo kwbángma sengkrakrokno romwi manmani bagwi belai khe kung chuknai tei borok khorok chisairokno butharnai, phiya ba bo kwplai máng khe tong glak.

¹³“Salgrabaini habugra tei uáisa bini sengkrakrokno thumwi swkangni slái kwbáng kuk khlainai. Bisi kisichani ulo, bo kwbángma chámung nungmung tei kwrwng kuk sengkrakrok bai phai phinai.

¹⁴A jora-o kwbángma bororok Ijipni habugrano kebengwi bachanai. Nini bororokni bisingni baksa imang nang rwna bagwi ur pati rwnani borok bachanai, tamo khe bórok samung cha rwui man glak.

¹⁵Hakhe Siriyani habugra phaiwi kamiyung ha kahamrokno kwrakmarokno segwi na phainai. Ijipni sengkrakrok choba nang laiwi tongwi man glak, bini chobani sengkrak kahamroknibo phan tong glak.

¹⁶Phiya ba Siriyani hap phainairok bórokni muchungma tẃi’-no khlainai, khoroksa phano bini bwskango bachaui man glak. Bo chẃngsacha ha-o bachanai tei bebak phan bini yago na bainai.

¹⁷“Siriyani habugra bebak sengkrakrok bai khe phainani chengnai, bo arirokno sokomornani bagwi bayap khanai tei bini bwsajwk bai kái lainai, tamo khe bini chapmano cha rwui man glak.

¹⁸Bini ulo bo twijlang rukungni dopharok bai choba nang laiwi borok kwbángmano mechenwi tlangnai. Tamo khe sengkrak bokhorok khoroksa bono mwkhang sógwi mechennai, buino mwkhang sókmani bini saka-o suiui kiphil rwnai.

¹⁹Hakhe habugra bini hani kamiyung kwrakma-o kiphilnai, phiya ba bini sakno deraui klainai tei bono naitugwibo man glak.

²⁰“Hakhe bini ulo tei khoroksa habugra bachanai, khoroksa bini rang khangnairokni bisingo bini ha-o rang-rí báng rwnani bagwi bororokni saka kwbáng sátoknai, tamo khe sal kisani bisingo bo butharjaknai, phiya abo joliui buya tei choba-o buya.”

²¹Hakhe bini yagulo khoroksa habugra themrang bachanai, bono bugra chá rwjak ya phano khúk kwtẃi bai khe bandiui habugra chánai.

²²Bini bwskango sengkrakrokno sokomorjaknai swmaini tẃiphangroknobo kochok rwui rohorjak bainai.

²³Bo bayap khaui kubun dopharokno bandinai, bo dopha kotoi bugra cháui tong phano a borok báng ya bai’-no phan gwnang wng rwk wng rwk wngnai.

²⁴Bo khoraijakmani kwrwi khe gwnang kuk amchoino segwi nanai tei bini chuchusong suda khlai lang ya abo tẃi samungrokbo khlainai tei choba-o manmani manwi-khwnwirokno banta khe na lainai. Bo kamiyung kwrakmarokno choproknani bagwi chapnai, tamo khe bini jora swrapsani bagwi se.

²⁵“Bo salgrabaini habugra bai choba nang lainani bagwi sengkrak kwbángma thumnai, Ijipni habugra phan gwnang kwbángma sengkrakrok bai nang lainani bagwi tiyar wngnai. Phiya ba bo bandiui mechenjaknai.

²⁶Bini nokni chámung cháui tongnai ganani bororok se bono swklwknai tei bini sengkrakrok kwbángma butharjak bainai tei kochok bainai.

²⁷Habugra khoroknwirokni bwkha belai hamya wngnai, bórok kaisa songphango kók tatal sa laiwi bandi lainai, phiya ba bórok naimano man glak, tamni hwn ba a páinani bagwi chongjak jora sók phai ya kho.

²⁸Bo rang-rí kwbángma thumwi bini sakni ha-o kiphilnai phiya ba bini khá-o kwthar swmaino kebengnai, bo bini muchung tẃi samung khlainai tei sakni ha-o kiphilnai.

²⁹“Bini muchung tẃi khe chongjak jora-o khe bo kiphilwi phaiwi salgrabai-o thángnai.

³⁰Kitimni rungkotorrok bono kebengwi phainai. Hakhe bo kirijaknai tei rosaui uphilwi thángnai tei jolijagwi swmai kwtharno kebengwi yagul sunai, “Bo kiphilwi phaiwi Swmai kwthar yakarnairokno bwkha kaichomnai.

³¹Bini aroni sengkrakrok kebengwi bachanai, noktharno tei sengkrakrokni nok kwrakrokno kwthar ya khlainai, sal brúm barogwi yapharmaroknobo mwthaknai tei sokomornai selengmasingchano aro songchanai.

³²Raida swbainairokno bo bandiui dera rwnai, tamo khe Kaitorno surinai bororok khe kwrak wngwi bachaui samung tangnai.

³³Bororokni bisingo elem gwnangrok bórok borok kwbángmano’-no kókbiti sanai, hai phano sal kisani bagwi bórok choba-o butharjak bainai, hóro sókjak bainai, baksa khajak bainai tei sekjak bainai.

³⁴Bórok klai kha hwn khe, bórok kisa chubachu mannai. Tei kwbángma bororok bandima kókrok bai bórokno chajaknai tei bórok bai phainai.

³⁵Elem gwnangrokni bere baksa baksa klai bainai, kuphur kwchẃng khlaina bagwi sakijaknai, páithakni jora sók phai ya sak abo hai khlaijaknai, aphurubo a chongjak jorano naisingna nangnai.

³⁶“Hakhe a habugra bini muchung tẃi’-no khlainai, bo tei kubun mwtairokni slái sakno kuchuk khlainai tei mwtairokni Kaitorno kebengwi suda kók sanai. Bo joliui yagul sujak ya sak hamchanai; tamni hwn ba chongjak tongmarok haino khlaijaknai.

³⁷Bo bini chuchusongni mwtairokno khulum glak tei bwrwirok muchungmarokno tei mwtairokno sak nang glak. Tamni hwn ba bini sakno bebakni slái kuchuk khe phunuknai.

³⁸Aboni slái bo kamiyung kwrakmano kati rwui tongnai mwtaino se bórom khlai anw, bini chuchusong saui se man ya abo hai mwtaino rangchak, rukphai, holong morokrok tei morokma hilirok bai se bórom khlainai.

³⁹Bini kamiyung kwrakmano kati rwna bagwi buini hani mwtaini chubachu na anw, bono bugra chongnairokno kwbáng khe bórom khlai anw tei bórokno tẃiphang snamnai tei bórokno sokat hai khe ha banta khe rw anw.

⁴⁰“Siriyani habugrani jora páithago khe, Ijipni habugra choprok phai anw. Siriyani habugra bebak bini phan bai choba nang lai anw, bini korai malkhungrok, korairok tei kwbángma rungkotorrok nokbar kotor hai khe bono kebengwi phainai. Tei kwbángma ha-o habwinai tei er anw.

⁴¹Bo chẃngsacha ha-o bo phainai tei chisai-chisai bororok butharjak anw, phiya ba Idom, Moab tei Ammonni kaham kuk ha khe bini yakni yógwi tong rwknai.

⁴²Bo teibo kwbángma hano segwi na bainai, ha Ijip suda bini yago yógwi man glak.

⁴³Ha Ijipni bebak rangchak, rukphai tei manwi kahamrok bini yago klai bainai. Libyasarok bai Sudansarok bono ma rwktharnai.

⁴⁴Phiya ba salka tei salsibaini khorang bono sikirinai, bo belai kiri twtwi choba nang lainai tei kwbángmano butharnai.

⁴⁵Bo bini kotorma bugrani ríni nokno twijlang bai kwthar hachuk kwcharo tangnai, hai phano bini jora páinai, khoroksa phano bono chubanai tong glak.”