Read Kok Borok DANIEL 2 Bible Online

DANIEL 2 - Kok Borok bible

DANIEL 2

¹Nebukadnejar habugra chámani nokha bisiknwini bisi-o bo imang kaisa nuk kha; abo bono belai khe bwkha udru mudru khlai kha tei bo muktrwi manjak li ya.

²Hakhe habugra danda-baji phunuknairok, thinangni kók sanairok tei swkal kwrwngrokno, tubu-ui bini imangni kókno saui khna rwnani dagi kha. Hakhe bórok habugrani bwskango bacha phai lai kha.

³Hakhe habugra bórokno hai hwnwi sa kha, “Ang imang kaisa nuk kha tei a nukmani kókno saui mannani belai khe muchungwi ámang-chímang wng kha.”

⁴[1] Hakhe bórok habugrano hai hwnwi sa kha, “Habugra mol brúm brúm kwthang tong thung! Chwngno nini imangni kókno sa di, chwng aboni bisingni kókno nono saui khna rwnai.”

⁵Habugra bórokno hai hwnwi sa kha, “Ani kók le katswi srai-srai: tumung norok ani imangni kókno saui khna rwui man ya khe phondrik-phandrak khlaijak bainai tei norokni nokrokbo sokomorjak bainai.

⁶Tamo khe norok ani imangni kókno kaham khe swbaiwi saui rwui man khe norok ani thani sokat kwbángma tei bórom kotorma mannai. Hakhe tabuk norok ani imangno tei aboni kókno swbaiwi khna rw bai di.”

⁷Bórok habugrano tei uáisa uphilwi hai hwnwi sa lai phi kha, “Habugra, nini o selengrokno nini imangni kókno saui khna rw gra khe, chwng abono swbaiwi saui khna rw anw.”

⁸Habugra hai hwnwi sa kha, “Ang kaham kheno saui mano, norok jora kwbáng sannani nai anw, tamni hwn ba norok ani kók le katswi srai-srai khe si-o,

⁹tumung norok imangni kókno saui khna rwui man ya hwn khe norokni bagwi kók tháisa tongo. Norokni bisingo bwkha thansa wng baiwi jora sláijagwi pái ya sak ano tatal saui máng tong lainai. Hakhe tabuk imangni kók ano sa si di. Hakhe norok abono swbaiwi saui mano hwnwi ang saui mannai.”

¹⁰Bórok habugrano hai hwnwi sa kha, “O ha saka-o borok khoroksa phano habugra naimani tẃi khe saui rwui mannai kwrwi; tamni hwn ba khoroksa swk kotor tei phan gwnang habugra khoroksa phano bini thinangni kók saui mannairok, danda-baji phunuknairok tei yapha nainairok abo hai khe kók sẃngnai kwrwi kho.

¹¹Habugra sẃngmani kók belai khe kutuk, abono mwtairokno karwi khoroksa phano habugrano saui rwui man glak, bo le bahan bwthẃi gwnang borok bai tong ya.”

¹²Abono khnaui habugra belai khe jolijak kha tei Babilonni joto Sinai-nuknairokno butharwi páinani dagi kha.

¹³Hakhe habugrani dagimung dagijak tẃi khe joto sinai-nuknairok butharjaknai, a kók bai aro Daniel bai bikichingsongbo butharna naitukjak kha.

¹⁴Hakhe Daniel Babilonni elem kwrwngrokno butharna hwnwi chongjak habugrani sengkrak bokhorok Ariokni thani kaham khe uansugwi kók saui kha;

¹⁵bo habugrani sengkrak bokhorok Ariokno hai hwnwi sa kha, “Tamo wngwi habugra ba abo hai kirimasingcha khe ma dagi lang?” Hakhe Ariok Danielno bebak kók saui khna rw kha.

¹⁶Hakhe Daniel thángwi habugrano imangni kókno swbaiwi saui khna rw anw hwnwi tei kisa jora sanwi kha.

¹⁷Hakhe Daniel bini nogo thángwi bikiching Hanania, Misael tei Ajariasongno o kók saui khna rwui kha,

¹⁸hakhe Daniel tei bini palrok Babilonni kubun elem kwrwngrok bai baksa sokomorjak ya wngna tẃi khe bo bórokno Chuknohani Kaitorni thani khairokma mannani tei imangni kókno phunuk thung hwnwi suri sannani bagwi kobok kha.

¹⁹Hakhe imangni bisingni kókno horo imangni bising tẃi khe Danielni thani phunukjak kha. Hakhe Daniel chuknohani Kaitorno lob kha.

²⁰Daniel hai hwnwi sa kha: “Kaitorni mung mol brúm brúm lobjak thung, elem bai phan le bini se.

²¹Bo se jora tei molrokno slái-o; bo khoroksa habugrano norwi tei khoroksano achuk rw-o, bo elem gwnangno elem rw-o, tei buchinaino khe buchimung rw-o;

²²bo se bisingni tei kuthuk kókno phunugui rw-o. Bo mwnakma-o huijakno saui man rw-o tei pohor bono kitingwi tongo.

²³Ani chuchusongni Kaitor, nono ang hambai rw-o tei lobo. Tamni hwn ba nwng ano elem tei phan rw kha tei tabuk nini thani sanmanobo nwng chwngno rw kha, tamni hwn ba habugrani kókno nwng chwngno si rw kha.”

²⁴Hakhe Daniel Babilonni elem kwrwngrokno butharnani bagwi chongjak, Ariokni thani thángwi, “Babilonni elem kwrwngrokno ta buthar di, ano habugrani thani tẃi di, ang habugrano bini imangni kókno saui khna rw anw” hwnwi saui kha.

²⁵Hakhe Ariok Danielno habugrani bwskango dodro tubu-ui hai hwnwi sa kha, “Ang Judani borok khaui tubujaknairokni bisingo habugrani imangni kókno saui mannai khoroksano man kha.”

²⁶Beltesajar hwnjaknai habugra Danielno hai hwnwi sa kha, “Nwng ang imang nukmani kókno sukhrubwi saui khna rwui ma de manno?”

²⁷Daniel habugrano hai hwnwi sa kha, “Elem kwrwngrok kók mwtai kwrwngrok, danda-baji phunuknairok, yapha nainairok, khoroksa phano habugra naimani bisingni a kókno saui rwui man glak.

²⁸Phiya ba chuknoha-o khoroksa susuk Kaitor tongo, bo se bisingni kókno phunugo, bo habugra Nebukadnejarno bwskangni salo tamo wngno wng ya abono phunuk kha, tabuk ang nwng thuyamo tong twtwi nukmani nini imangni kókno saui khna rw anw.”

²⁹Habugra, nwng nini thuyamo rokoui tong phuru nwng thinango tamo wngno wng ya abono nuk kha, bisingni o kókno phunuknai bo nono bwskangni salo tamo wngnai abono phunuk kha.

³⁰Tamo khe ang tei kubun bororokni slái elem kwrwng kuk wngmani hwnwi bisingni kókno phunukjakmani hai ya, phiya ba bisingni kókmungno habugrani thani sijak thung tei nini bwkhani uansukmarokno saui man thung hwnwi se si rwjago.

³¹Habugra nwng, nini imango kaisa mang takjak kotorma bachajak nuk kha, abo phan gwnang belai kwchẃngma tei kirimasingcha khe bachajak.

³²Aboni bokhorok khe rangchak kaham bai snamjak, khaklap bai yakrok khe rukphaini, bohok bai yaphungrok khe pitolni snamjak,

³³bini yakungrok khe sor bai snamjak tei bini yapha tola khe sor kisa tei ha kisa rwui snamjak.

³⁴Nwng abono naisigwi tong phuru khoroksani yak bai phano snamjak ya abo tẃi holong thutaiwi nang phaiwi sorni tei a hani yakungrokno swbaiwi phondrik-phandrak khe rw kha.

³⁵Hakhe sor, ha, pitol, rukphai tei rangchak bebak baksa khe phondrik-phandrak khlaijak kha, hakhe sachlangni mai kholani chwkap hai wng kha, nokbar abórokno kobon rwui tlang bai kha, kaisa phano abórok nukjak li ya. Phiya ba mang takjakno swbainai holong khe hachuk kotorma wngwi pái kha tei ha-o kupulung wng kha.

³⁶Omo se a imang nukmani—tabuk ang nono abono sukhrubwi sa anw;

³⁷o habugra, nwng joto habugrarokni slái kotor kuk. Chuknohani Kaitor nono bebak phankrak tei bóromrok yaphar kha.

³⁸Bo nini yago se bebak ha-o tong bainai bororokno, yabrwirokno tei toksa-tomilirokno muphunnani phan yaphar kha. Nwng khe rangchakni a bokhorok.

³⁹Nini ulo tei khoroksa bugra nini slái kotoi bachanai, aboni ulo tei kaisa pitolni bugra bachanai tei bebak ha gwnangwi bo muphunnai.

⁴⁰Aboni ulo tei khorokbrwi habugra bachanai, sor bai baksa abo kwrak wngnai, abo bebak manwirokno swbaiwi phindrik phandrak khlai-o. Sor bebak manwirokno sukhrupmani hai khe bo bebak swkangni bugrarokno sukhrup bainai.

⁴¹Nwng yakung tei yasimano baksa hani tei baksa sorni khe nuk kha. Abo wng kha hano swkakjakmani se, phiya ba aro baksa sor hai khe kwrak tongo, tamo khe aro sor tong phano ha bai buljak.

⁴²Yakungni yasima baksa khe sor tei baksa khe ha sindilni, abo khe, nini ha baksa khe kwrak tei baksa khe kebel wngnai hwna se.

⁴³Nwng sorno ha sindil bai buljak nukmani hai khe, hani bororok kubun dophani bororok bai kái lai[2] anw, phiya ba sor bai ha kwpha laiwi tong lai ya hai khe, bórok thansa khe tongwi man lai glak.

⁴⁴O habugrarokni jora-o chuknohani Kaitor, sokomorwi man ya tei kubun bororok bai sekjak ya ha songchanai. Tamo khe tei kubun harokno bebak sokomor bainai tei abo khe mol brúm brúm bachaui tongnai.

⁴⁵Nwng holong kaisano haino hachukni kagwi thángwi abo bahai khe sorni, pitolni, hani, rukphaini tei rangchakni mang takjakno swbai kha abono nuk kha. Kaitor kotor habugrano bwskangni salo tamo wngno wng ya abono phunuk kha. O imang khe kubui tei abono swbaiwi sama sói’-no.

⁴⁶Hakhe habugra Nebukadnejar khorok bomwi Danielno bórom khlai kha tei bono hilirok tei yapharmungrok yapharnani dagi kha.

⁴⁷Habugra Danielno hai hwnwi sa kha, “Nini Kaitor le bebak mwtairokni slái Kotor kuk Kaitor tei habugrarokni Subrai tei bisingni kók kuthukrokno phunuknai aboni bagwi nwng aswk kuthuk kókno saui mano.”

⁴⁸Hakhe habugra Danielno kuchuk khe bórom khlai kha tei kwbángma hilirok rw kha tei bebak Babilon ha gwnangwini barja kotor yaphar kha tei Babilonni bebak elem kwrwngrokni saka-o bokhorok snam kha.

⁴⁹Daniel habugrano koiwi bo Sadrak, Mesak tei Abednegono Babilonni hamkrai samungo barja yaphar bai kha, phiya ba Daniel khe habugrani noyungo’-no tong kha.