Read Kok Borok DANIEL 3 Bible Online

DANIEL 3 - Kok Borok bible

DANIEL 3

¹Habugra Nebukadnejar rangchakni mang takjak kaisa snam kha, abo kuchuk muk dokchi, kebengo khe muk dok, bo Babilonni Dura amchoi-o abono songcha kha.

²Hakhe habugra Nebukadnejar amchoini bebak tẃiphangrok, habugrarok naiphangrok, rangkhók mwrwknairok, buj thumnairok tei bebak bokhorokrokno, habugra snammani mang takjakno yapharmani panda-o phainani dagi kha.

³Hakhe bebak a tẃiphangrok yapharmung panda-o phaiwi mang takjakni bwskango bacha lai phai khe,

⁴khorang kotorma bai khlaiwi hai hwnwi kók sa khlaijak kha, “Joto dophani, bosongni tei joto kókni bororok.

⁵Norok totro kotorni, bokorongni tei budukni tammungrokni khorang khna khe jotono habugra snammani mang takjakno ma khulum bainai.

⁶Khoroksa swk bokhorok bomwi khulum ya hwn khe bono aphuru’-no hórjlai chẃngjago khiklaiwi rwjaknai.”

⁷Hakhe joto borok totro khorang tei bokorong tei budukrokni tammungni khorang khna bai khe joto dopharok, bosongni bororok tei kókni bororok pwtapsa khe klaiwi habugra Nebukadnejar snammani a mang takjakno khulum bai kha.

⁸Aboni bagwi aphuru baksa Babilonni borok phaiwi Judairokno belaino cha ya hwnwi ber lai kha.

⁹Bórok habugra Nebukadnejarno hai hwnwi sa kha, “Habugra, mol brúm kwthang tong thung!

¹⁰Habugra kaisa dagimung sakhlaiwi rw kha totro khorang bai budukni tammungrokni khorang khna khe’-no bebak bororok rangchakni mang takjak mwtaino khorok bomwi ma khulumnai.

¹¹Khoroksa swk bokhorok bomwi khulum ya hwn khe bono hórjlai jolo-jolo-o khiklaijaknai.

¹²Baksa Judairok Babilonni hamkraini bagwi barja chongmani; Sadrak, Mesak tei Abednego, o bororok nini kókno khna li ya; bórok, nwng rangchakni mwtai snammani mang takjakno bokhorok bomwi khulum ya gwja.”

¹³Hakhe Nebukadnejar belai khe jolijagwi Sadrak, Mesak tei Abednegono bini bwskango tubu di hwnwi dagi kha. Hakhe bórokno habugrani bwskango tubu kha.

¹⁴Nebukadnejar bórokno hai hwnwi sẃng kha, “Sadrak, Mesak tei Abednego, ang snammani rangchakni mwtaino khorok bomwi khulumnani lon ya hwnmani a kók kubui de?

¹⁵Tabuk norok totro khorang tei budukni tammungrokni khorang khnaui norokni bokhorok bomwi ang snammani mang takjakno khulum khe belai hamnai, phiya ba hai wng ya hwn khe norok logi logi’-no hórjlai-o khiklaijaknai, aphuru khe bu mwtai norokno ani yakni phiyógwi mannai tongno?”

¹⁶Sadrak, Mesak tei Abednego habugrano hai hwnwi sa kha, “Chwng omoni bagwi nono mungsa sana nang ya.

¹⁷Hakhe chwng poito khlaimani chini Kaitor hórjlaini chwngno phiyógwi mano tei nini yaknibo phiyóknai.

¹⁸Tamo khe bo chwngno phiyók ya wng phano, nwng kaham khe saui man di, chwng nini mwtaino mon glak tei nwng snammani rangchakni a mang takjakno khulum glak.”

¹⁹Nebukadnejar belai khe thamchi tungjagwi, Sadrak, Mesak tei Abednegono joliui bini mwkhang kwchak wng kha. Hakhe bo hórjlai hórkangno tei uáisni kwbáng tung rwnani dagi kha.

²⁰Bini sengkrak bodolni phan gwnang kukrokno Sadrak, Mesak tei Abednegono khaui hórjlai hórkango khiklaiwi rwna bagwi dagi kha.

²¹Hakhe o bororokno rí kanjak chumjak khe kaham khe khaui hórjlai hórkango khiklaiwi rw lai kha.

²²Habugra belai kók kwrak khe dagiui hórkangno teibo kutungma khlaiwi rwmani bagwi Sadrak, Mesak tei Abednegono tlangnai bororok hór kham kha.

²³O borok khoroktham Sadrak, Mesak tei Abednego hórjlai hórkango yakung yak khajak khe klaiwi tong bai kha.

²⁴Hakhe habugra Nebukadnejar belai uanajagwi ma bacha kha. Bo bini tẃiphangrokno hai hwnwi sẃng kha, “Chwng borok khorokthamno se khaui hórjlai-o khiklaiwi rohor ya diba?” Bórok hai hwnwi sa lai kha, “Iŉ bugra, kubui’-no.”

²⁵Bo hai hwnwi sa kha, “Phiya ba ang borok khorokbrwino khajak ya khe hórjlai kwcharo him laiwi tongmani nuk kha, bórokni mungsa khajakrok kwrwi tei bórokni bere khorokthamni ulnino khe mwtairokni bwsa[3] hai khe nugo.”

²⁶Hakhe Nebukadnejar hórjlai hórkang duglamo phaiwi Sadrak, Mesak tei Abednegono, o kuchuk Kaitorni selengrok ongkhorwi phai di hwnwi sa kha, hakhe bórok hórni ongkhorwi phai lai kha.

²⁷Bebak tẃiphangrok, habugrarok, habugrano kók phrwngnairok kuthum laiwi a borok khorokthamni bwsakrok bórokni bwkhnairok, bórokni rí-chumrok kisa phano kham li ya nuk kha tei hór khammani báhai kisa phano man li ya.

²⁸Nebukadnejar hai hwnwi sa kha, “Sadrak, Mesak tei Abednegoni Kaitor lobjak thung. Bo bini suarino rohorwi bono poito chánai bini selengrokno phiyók kha. Bórok ani kókno khna yaui tei bórok sakphangno bórokni sakni Kaitorno karwi tei kubun mwtaino khorok bomwi khulum lai li ya.

²⁹Aboni bagwi ang tabuk dagi-o, kaisa hani borok phano, eba bosongni tei kókni borok phano wng thung, bo Sadrak, Mesak tei Abednegoni Kaitorno hamya sanai borok bo yakung-yak khakjaknai tei bini nokrok sokomorjaknai tamni hwn ba tei kubun mwtairok abo hai phiyógwi mannai kwrwi.”

³⁰Hakhe habugra Sadrak, Mesak tei Abednegono Babilonni amchoi-o kuchuk achukthai-o achuk rw kha.