Read Kok Borok DANIEL 4 Bible Online

DANIEL 4 - Kok Borok bible

DANIEL 4

¹Habugra Nebukadnejar o hayungni bebak dophani, bosongni tei kókni bororokno khá kaham rohor kha.

²Kuchukni Kaitor ano kwmamsingcha tei soidomni samungrok phunukmano sanani nai-o.

³Bo phunukmani marirok bwswk se kotor, bo kwmamsingcha samungrok khlaimani bwswk phan gwnang. Bini ha kusung kusungno tongnai. Bo bugra chámani kusung kusung kwrwngwi’-no tongnai.

⁴Ang, Nebukadnejar, ani noyungo tongwi tong kwchang khe hamchaui tongo.

⁵Phiya ba ang thuyamo rokoui tong phuru imang kaisa nugwi belaino kiri kha.

⁶Aboni bagwino bebak Babilonni elem kwrwngrokno oro tubu-ui ani imangni kók saui khna rw phai bai thung hwnwi dagi kha.

⁷Hakhe joto thinangni kók sanairok danda-baji phunuknairok, yapha nainairokno, athukiri lekhanairokno tubujak bai kha, ang bórokno ani imangni kókno saui khna rw kha, tamo khe bórok abono sukhrubwi ano saui khna rwui man li ya.

⁸Páithago Daniel phai kha, ani mwtaini mung tẃi khe bini mung Beltesajarbo hwnjago, mwtai kwtharni phola bini bisingo tongo, hakhe ang bono ani imangni kókno saui khna rw kha, ang bono hai hwnwi sa kha:

⁹“O Beltesajar, thinangni kókrokno sanairokni bokhorok, ang saui mano mwtai kwtharrokni phola[4] nini bisingo tongo tei nwng bisingni kók kuthukrokno saui mano, ang imang nukmani omo hai se; ano abono sukhrubwi saui khna rw di.”

¹⁰Ang thu-ui tong phuru imang nukmani abo khe ahai, “Ang buphang phangsa kotorma hayung kwcharo bachajak nuk kha. Abo belai kuchukma.

¹¹Abo tor rwk tor rwk khe nokha-o khu-ui kha, hakhe bebak hayungni bororok bai nukjak kha.

¹²Bini bwláirok belai khe naithok tei bwtháirok kwbángma kupulung. Jotoni bagwino chámung kupulung tongo. Aboni saklomo bolongni yabrwirok lengla-o tei bedek buprarogo tokrok bothop thumo tei aboni bwtháirokno jotono chá-o.”

¹³“Ang ani thuyamo rokoui tong phuru khoroksa kwthar mwrwknaino chuknohani ongkhorwi phaimani nuk kha.

¹⁴Bo khorang kotorma bai khe chirigwi hai hwnwi sa kha, ‘Buphangno tanwi ha-o khiklai di tei bini bedekrokno tanwi khibi di, bwláirokno cherwi khibi di tei bwtháirokno saproui rw di. Yabrwirokno bini saklomni khárwi rohor di tei bedekrokni tokrokno bir rwui rohor di.

¹⁵Tamo khe buphang yaphangno khe sor tei pitolni buduk bai khaui klang di, abo panthorni sam kwlwirok bai tong thung. Tei abo nokhani siyari pantwi bai khe si thung; hakhe ha sakani samrok bai khe abo yabrwirok bai khe tong thung;

¹⁶bini bwkha borokni uansukmani sláijagwi yabrwirok uansuk tẃi khe wng thung; omo tẃi máng uáisni kitingwi ma manjak thung.

¹⁷Abo hai khe, a mwrwknai kwtharsa bai sakhlaijak kha, bebak borokno si thung tei kwplaisa Kaitor se o ha sakani bororokno kók khna rwnani suar rw-o, abono bo muchungma borokno rw-o tei bo koinenerokno abono rw-o.’

¹⁸Omono ang habugra Nebukadnejar imang nukmani. Hakhe Beltesajar, nwng ano sukhrubwi saui khna rw di, ani hani elem kwrwngrok ano o imangni kókno saui khna rwui man li ya. Phiya ba nwng khe mannai, tamni hwn ba mwtai kwtharrokni phola nini thani tongo.”

¹⁹Hakhe Daniel, bono Beltesajarbo hwnjago, mwlang chaui srapsa siring khe ma tong kha. Habugra bono hai hwnwi sa kha, “Beltesajar imangni kókno sukhrubwi sanani ta kiri di.” Beltesajar hai hwnwi sa kha, “Ani bugra, imang nono naislernairokni bagwi tei aboni kók sukhrubwi sama nini arirokni bagwi wng si thung.

²⁰Nwng buphang nukmani, abo torwi logwi nokha-o khu-ui kha tei abo hayungni joto bororok bai’-no nukjak kha.

²¹Aboni bwláirok belai naithokma tei bwthái kwbángma tei aboni bwthái jotoni bagwi chámung wngo, aboni saklomo bolongni yabrwirok lengla-o tei bedekrogo tokrok bothop thumo.”

²²O habugra, abo nwng se, nwng buphang hai belai khe tor kha lok kha tei phan gwnang wng kha. Nwng aswk khe tor kha abo nokha-o khu-ui kha; nini phan bebak swngchar gwnangwi koplok kha.

²³Habugra khoroksa borok kwthar mwrwknai chuknohani ongkhorwi phaiwi hai hwnwi sa phaimani nuk kha, “Buphangno tanwi sokomorwi khibi di, phiya ha-o aboni yaphangno klang di, abono sorni tei pitolni buduk khaui rw di tei abono ha-o jabrarok bai khe yakarwi klang di. Bini saka-o chuknohani pantwi klai thung, nokha bisisni jora hapharni yabrwirok bai tong si thung.”

²⁴“Abórokni kók khe omo hai se, o habugra, kuchukni Kaitor nini saka-o abo hai klainai hwnwi sakhlaimani se.

²⁵Nwng bororokni bisingni rwkhlaiwi rohorjaknai tei nwng bolongni yabrwirok bai ma tongwi nai. Nwng nokha bisisni jora musuk chwla hai khe jabra cháui ma tongnai tei nini saka-o pantwirok klainai. Hakhe nwng kuchukni Kaitor bebak borokni saka-o yak tongo tei bo muchungmani borokno yapharwi mano hwnwi saui mannai.

²⁶Buphangni yaphangno yakarwi klang di hwnwi dagijakmani hwn khe, nwng chuknohani Kaitorno siniui man phi khe nwng habugra ma chá phinai hwnma se.

²⁷Hakhe abo bai, o habugra ang samani kókno khna di, sumsok yakarwi samung kaham tang si di, kusupjakrokno khairok si di, hakhe nwng tong kwchang khe tei kwdwkma tongwi mannai.”

²⁸Abórok bebak habugra Nebukadnejarni saka-o sók phai kha.

²⁹Nokha talchinwini ulo Babilonni habugrani noyungni núkhúng saka-o himwi tong phuru,

³⁰habugra hai hwnwi sa kha, “Babilon bwswk kotor, abo ang ani phan bai habugrani tongthai tei ani chẃngsachani bagwi tangmani.”

³¹Bo kók sa bai ya sini hai hwnwi chuknohani khorang sakhlaijak kha, “O habugra Nebukadnejar nono se o kók sajago, nini ha nini aroni tlangjak kha.

³²Nwng bororokni bisingni rwkhlaiwi rohorjaknai tei nini tongthai bolongni yabrwirok bai baksa wngnai, nokha bisisni nwng musuk chwla hai khe jabrarok ma chánai. Hakhe nwng kuchukni Kaitor bebak borokni saka-o yak tongo tei bo muchungmani borokni yago, yapharwi mano hwnwi nwng saui mannai.”

³³Dakti’-no Nebukadnejarni sago o kókrok nang phai kha. Bo bororokni bisingni rwkhlaiwi rohorjak kha tei musuk chwla hai khe jabra cháui ma tong kha tei bini bwkhnai tolingni bwkrang bai baksa lok ya sak bini bwsago chuknohani pantwi klaijagwi ma tong kha tei bini yásku khe tokni yaching swk lok ya sak ma tong kha.

³⁴Nokha bisi kaisni láiwi thángmani ulo, ang Nebukadnejar chuknoha bwkhak naisa kha tei ani uansukmung kiphilwi phai kha. Ang kuchukni Kaitor mol brúm brúm o kwthang tongnaino hambai rwui bórom khlai kha. Bo mol brúm se bugra cháui tongnai, tei bini ha kusung kusung kwrwngwi tongnai.

³⁵Joto ha-o tong bainai bororok bini thani mungsa buya. Bo bini muchung tẃi khe chuknohani suarirok tei ha-o tong bainai bororokno khlai-o. Khoroksa phano bini muchungmano kasu-ui man ya tei tamni abo hai khlai lang hwnwibo sẃngwi man ya.

³⁶Ani uansukma kiphilwi phai khe ani bórom ani chẃngsacha tei ani ha kiphilwi rwjak kha. Ani tẃiphangrok tei kolok kotorrok ano yachaksok bai kha tei ani bugrani harok kiphilwi rwjak kha, swkangni slái teibo kwbáng kuk yapharjak kha.

³⁷“Tabuk ang Nebukadnejar chuknohani bugra Kaitorno lobo, kuchugo tisaui bórom khlai-o. Tamni hwn ba bo samung tangmarok bebakno chajak tei bini bujsói máng, kung chuknai borokno bo kebengo.”