Read Kok Borok DANIEL 6 Bible Online

DANIEL 6 - Kok Borok bible

DANIEL 6

¹Habugra Darias bini bebak ha gwnangwi khoroksara-chinwi tẃiphang chongnani uansuk kha;

²bórokni saka-o, o khoroktham khe achukphangrok, bórokni bere Danielbo khoroksa, bórok habugrano samungni buj rw-o tei bórok habugrani deramung phai ya tẃi khe bórokno barja rwjak.

³Hakhe Daniel kubun achukphang tei tẃiphangrokni slái sinijak kuk kha, tamni hwn ba bini thani buini slái chúkmani tong kugo, hakhe habugra bono bebak hani barja rwnani chong kha.

⁴Hakhe tei achukphangrok tei tẃiphangrok Danielno habugrani thani hamya sa laiwi majra bernani lama rutuk lai kha. Tamo khe bórok mungsa lama rutugwi man lai li ya. Tamni hwn ba bo belai khe kók narwgwi sói khe samung khlai-o, bini thani mungsa derajak-korójakrok nukjak li ya.

⁵Aphuru khe a bororok hai hwnwi sa lai kha, “Chwng Danielno bini Kaitorni kerong bai kwrwngjak khe rwksaui ber ya khe tei mungsa lama man glak.”

⁶Hakhe bórok kók thansa wng laiwi, habugrani thani phaiwi hai hwnwi sa lai phai kha, “Habugra Darias, mol brúm kwthang tong thung.”

⁷Hani bebak achukphangrok, tẃiphangrok, naikolphangrok, habugrani kókbiti rwnairok, baksa khe hai hwnwi kók chap lai kha, habugra kaisa raida sakhlai thung, khoroksa swk nokha salthamchini bisingo habugrano karwi tei kubun mwtai eba borokno suriui man glak, o habugra, wng ya khe a borok singhoni hakhoro khiklaiwi rwjaknai.

⁸Hakhe Mede tei Parsiani raida tẃi abono tei sláiwi man ya tẃi khe habugra omo hai kók sakhlaiwi mung swi rwui rohor di.

⁹Hakhe habugra Darias mung swi rwui kariui rohor kha.

¹⁰Raida kariui habugra mung swi rwui rohor kha hwnwi Daniel saui man khe bo bini nok sakani khotolo Jerusalem bwkhak naharjak tailam phiyokjago tháng kha; hakhe swkango khlai tẃi khe salo uáitham yáskú sungwi Kaitorni thani suriui hambai rw kha.

¹¹Hakhe a bororok Danielno Kaitorno khulumui suriui tongmani saui man kha.

¹²Bórok habugrani thani phai laiwi a kók rwjakno tẃiwi hai hwnwi sa lai phai kha, “O Habugra, o nokha salthamchini bisingo nono karwi khoroksa swk, mwtairok eba borokno koiwi suri khe a borok singhoni hakhoro khiklaiwi rwjaknai hwnwi nwng kók swiwi mung swi rwui rohor ya diba?” Habugra hai hwnwi sa kha, “Mede tei Parsiani a raida kwrak khe tongnai, abono sláiwi man glak.”

¹³Hakhe bórok habugrano hai hwnwi sa kha, “Judani khoroksa khaui tubujaknai, Daniel, nini dagimani kók khna li ya, habugra, nini dagimungno khna yaui se bo salo uáitham khe suri sano.”

¹⁴Hakhe habugra o kókrokno khna khe belai bwkha hamya wngjak kha tei Danielno phiyóknani bagwi bwkha chap kha; hakhe bo sal hap ya sak aboni bagwi sakthar kha.

¹⁵Hakhe a bororok kók baksa wng laiwi habugrani thani phai laiwi hai hwnwi sa lai phai kha, “Habugra karimani Mede bai Parsiani raidano khoroksa phano sláiwi man ya hwnwi saui mano.”

¹⁶Hakhe habugra Danielno tubu-ui singhorokni hakhoro khiklaiwi rwnani dagi kha. Habugra Danielno hai hwnwi sa kha, “Nwng monmani nini Kaitor nono phiyók thung.”

¹⁷Hakhe khoroksa phano Danielno phiyógwi man ya tẃi khe, holongdap kaisa tubu-ui hakhorni búkhúgo kholobwi rw kha tei habugrani tẃiphangrok sil bai khe holongo mari bu-ui rw kha.

¹⁸Hakhe habugra bini noyungo kiphilwi thángwi hopung chá yaui tei thu-ui man ya wngwi tongwi kha.

¹⁹Hakhe habugra ai kheno bachaui dakti khe singhoni hakhoro tháng kha.

²⁰Bo Daniel tongmani hakhor gana-o sók phai khe belai bwkha khamjagwi Danielno hai hwnwi ringhor kha, “O Daniel, Kaitor kwthangni seleng, nwng monmani nini Kaitor nono singhorokni yakni phiyógwi de man kha?”

²¹Hakhe Daniel habugrano hai hwnwi sa kha, “Habugra, mol brúm brúm kwthang tong thung!”

²²“Ani Kaitor bini suarino rohorwi singhorokni búkhúkno muthup kha, abórok ano mungsa phano khlaiwi man bai li ya, tamni hwn ba ang bini thani tei nini thani mungsa hamya khlaima kwrwi. O habugra, ang mungsa cha ya khlai ya.”

²³Hakhe habugra belai khe bwkha tongthokjak kha tei Danielno hakhorni tisanani bagwi dagi kha, hakhe Daniel singho hakhorni tisajak kha, bini bwsago mungsa kwsarok man li ya, tamni hwn ba bo Kaitorno poito chá-o.

²⁴Hakhe habugra Danielno omo hai khlainai bororokno romwi singhoni hakhoro khiklaiwi rwnani dagi kha, bórok bai baksa bórokni chwrairok tei bihiksongno khiklaiwi rwjak kha. Bórok tola-o sógwi ya sini’-no Singho bórokno uátharwi bórokni bekrengrokno phondrik-phandrak khlai bai kha.

²⁵Hakhe habugra Darias ha-o tong bainai joto dophani, bosongni tei kókni thani hai hwnwi swiwi rohor kha, “Norokni thani khakchangma tong thung.

²⁶Ang dagiui sa-o, ani ha-o tong bainai bororok Danielni Kaitorno kiriui bórom ma khlai bainai. “Tamni hwn ba, Bo se kwthang Kaitor, mol brúm tong phlainai, Bini hano sokomorwi man glak. Bini yak ha páithak jora tongo.

²⁷Bo mwthango tei phiyógo. Bo kwmamsingcha tei soidomni samung khlai-o, chuknoha-o tei o ha saka-o. Bo Danielno singhorokni búkhúkni phiyók kha.”

²⁸Hakhe Daniel Darias tei Parsiani Sairas habugra cháui tongmani jora-o hamcha kha.