Read Kok Borok DANIEL 7 Bible Online

DANIEL 7 - Kok Borok bible

DANIEL 7

¹Belsajar Babilono habugra chámani nokha puilani bisi-o, Daniel thuyamo thu-ui tong phuru imang kaisa nuk kha. Hakhe bo a imangni kókno swiwi narwk kha tei aboni bisingni kókrokno saui khna rw kha.

²Daniel hai hwnwi sa kha, “Ang horo imango nuk kha, nai di babai brwi bwkhakni nokbar kotor sipsaui twijlang kotorno lilak rw phai kha.

³Mak brwi kotorma yabrwirok twijlangni nongkhorwi phai kha, abórok masa bai tei masa sol lai ya.

⁴Puilani khe singho hai, tamo khe toling hai bwkrangrok tongo. Ang abono naiwi tong phuru bwkrangrok phuijak kha, abo hani tisajak kha tei borok hai khe yakung kongnwi bai bacha rwjak kha tei abono borokni bwkha rwjak kha.

⁵Hakhe nai di, tei masa yabrwi khe gongno kosol; abo uklokni yakung bai bacha rwjak kha, bini búkhúkni bua kwcharo kongtham barani bekrengrok tongo, abono hai hwnwi sajak kha, “Bacha di, kwbángma bahan chá di.”

⁶Aboni ulo ang naiba, tei masa yabrwi mwsá khukutaino kosol, aboni phikungo tokni bwkrang kangbrwi tongo, aboni bokhorok tháibrwi tongo, bini thani phan yapharjak kha.

⁷Aboni ulo ang horo nuk phi kha tei masa yabrwi nukjak phi kha, abo belai phan gwnang kirimasingcha, uanamasingcha, bini sorni buarok tongo, abo bai uákhrubwi chá-o tei kádulo. Abo teirokni slái juda kuk, bini bokorong kongchi tongo.

⁸Ang bokorongrokno uansugwi tong phuru, nai di tei kongba bokorong kotoi abórokni bisingni nongkhorwi phaima nuk kha, abo swkangni kongtham bokorongrokni yaphang sokok kha tei o bokorongo borokni mokol hai mokol tongo tei búkhúk bai khe kók kotor sa-o.

⁹Ang naiwi tong phuru, achukthayungrok berajak kha, yaphangni molni simi tongnai borok aro achuk kha. Bini rírok kothor kwsap hai kuphurma tei bini bokhorokni bwkhnai khulni khutwng hai. Bini achukthayung hórjlai hai tei bini gorgori hór kwchẃng hai.

¹⁰Bini bwskangni hórni twisa nongkhorwi phai-o, aro borok sai-sai bono monwi tongo tei chisai-chisai bini bwskango bachaui tongo, buj nogo buj thumna achuk kha tei bijaprok phiyokjak kha.

¹¹Ang naiwi tong phuru bokorongno pungmani tei kótorok samani khorang khna kha. Ang naiwi tong ba yabrwi butharjak kha, aboni bwsakno hóro khiklaiwi sokomorjak kha.

¹²Tei yabrwirokni khe bórokni aroni phan rosaui najak kha, phiya ba kwthang tongnani bagwi tei kisa jora pholokjak kha.

¹³Ang horo imango nuk kha, nai di nokhani chumui-o khe borokni sajlano kosol khe phai kha, bo yaphangni simi tongnai borokni thani thángwi sakno yaphar kha.

¹⁴Bini thani bebak phan, bórom tei chẃngsacha yapharjak kha, joto dophani, bosongni tei kókni bororok bono ma mon bainai. Bini phan mol brúm tongnai tei bini ha sokomorjak glak.

¹⁵Ang Daniel, ang nukmani imang ano hus khlaiwi rw kha tei ani khá udru mudru wng kha.

¹⁶Ang aro bachaui tongnai khoroksani thani thángwi bono abórok bebak tamo sẃng kha. Hakhe bo ano abórokni kókno sukhrubwi saui khna rw kha.

¹⁷O kotor mak brwi yabrwirok wng kha; o ha saka-o khorokbrwi habugrarok bacha anw, aboni kók.

¹⁸Phiya Kaitor kwplaini bororok hano man anw tei mol brúm bórokni yago tong anw.

¹⁹Hakhe ang tei kubunni slái juda kuk yabrwirokni kókno teibo saui mannani muchung kha, abórok belai kirimasingcha, abórokni bua khe sorni, yáskurok pitolni abo bai uákhrubwi chá-o tei bini yakung bai khe kádulo,

²⁰bokhorokni a bokorong kongchino tẃiwi phiya tei bokorong achaisaui phainai a bokorong kongtham swbaiwi rw phai kha; abórokni mokolrok tei búkhúk tongo, abo kók kotor sa-o. Abo tei kubunrokni slái kotor hai khe nukjago. Abórokno tẃi sina muchung kha.

²¹Ang naiwi tong phuru, a bokorong se Kaitorni borok kwtharrok bai choba nang laiwi bórokno mechen kha.

²²Hakhe mol brúm kwthang tongnai phai kha tei Kaitor kwplaini bororokni bwkhak wngwi buj thumna sakhlaijak kha, Kaitorni bororok ha mannani jora sók phai kha.

²³Abo hai khe ang saui khna rwjak kha: Mak brwi yabrwirok wng kha, khorokbrwi habugra, o ha saka-o bugra chá langnai tei kubun hani slái abo juda wngnai. Abo bebak hano uákhrubwi kádul bainai.

²⁴Bokorong kongchi wng kha, khorokchi habugra bachanairok, aboni ulo tei khoroksa habugra bachanai bo swkangrokni slái juda wngnai tei khoroktham habugrarokno ha-o khiklainai.

²⁵Bo kwplai Kaitorno hamya sanai tei Kaitorni bororokno kusupnai. Bo jora tei raidarokno sláinani nai anw, bini yago Kaitorni bororok bisiktham khaksa ma tong bainai.

²⁶Phiya ba chuknohani buj thummung achukjaknai, bini phan sekjaknai, páithago khe bebak sokomorjaknai.

²⁷Ha tei phanrok, bebak hani slái kotor kuk khe kwplaisa Kaitorni borok kwtharrokni thani yapharjaknai, bórokni ha mol brúm chorwi tongnai tei bebak bugrarok bórok ma monnai tei kók ma khna bainai.

²⁸Orono aboni kók pái kha. Ang belai khe kiriui borsaui se ma tháng si-o, phiya ani bwkha bisingo khe bebak a kókrokno chu-ui ton kha.