Read Kok Borok DANIEL 8 Bible Online

DANIEL 8 - Kok Borok bible

DANIEL 8

¹Belsajar habugra chámani nokha bisiktham wng phuru ang tei uáisa imang nuk phi kha.

²Imango ani sakno Elam amchoini kamiyung Susa-o khe nuk kha, ang a imango Ulai twima-o.

³Aro ang naiwi ba mera bwsa masa twima rukungo bachajak. Aboni bokorong kongnwi tongo, bokorong kongnwnwi’-no kolok, tamo khe kongsa lok kugo tei achaimanibo ulo se.

⁴Ang merano bini bokorong bai salthángbai bwkhak, salsibai bwkhak tei salgrabai bwkhak khaiwi tongmani nuk kha, yabrwirok masa phano aboni bwskango bachaui mannai se kwrwi tei masa phano aboni yakni phiyógwi mannai kwrwi. Bini muchung tẃi’-no khlai-o tei sak sak torsaui tongo.

⁵Ang abono uansugwi tong phuru khe aro achomsa khe punjua masa salthángbaini yakung ha nang ya khe doui phaisa kha. Punjuani mokol kolnwi kwcharo nukjagwi tongnai bokorong kongsa tongo.

⁶Ang a twisa rukungo bokorong kongnwi gwnang nukmani a merani bwkhak katswi doui a punjua khachigwi tháng kha.

⁷Ang abono merani gana-o phaimani nuk kha tei abo aswk khe jolijak kha a merano khaiwi bini bokorong kongnwi swbaiwi rw kha. Mera abono kasunani phan kwrwi, bo abono ha-o khiklaiwi kádul kha, kebo bono bini yakni phiyógwi man li ya.

⁸Hakhe punjua belai phankrak wng kha; tamo khe bo phan gwnang wng phuru khe bini bokorong báiwi tháng kha. A báima jidolo tei bokorong kongbrwi babaibrwi suhorjak khe achai kha.

⁹A bokorongrokni aroni tei bokorong kotoi kongsa achai phi kha, abo salgrabai, salka tei chẃngsacha ha bwkhak torsaui bachasa kha.

¹⁰Abo torwi loksa te loksa te nokhani athukirirokni aswk jora thángwi khu-ui kha tei baksa baksa athukirirokno ha-o khiklaiwi suda kádul kha.

¹¹Abo sak sakno a athukirirokni bubagra bai baksa hwnwi saui tong kha, sal brúm brúm bini bagwi yapharmung yapharmanobo mwthagwi rw kha tei noktharnobo bo kwthar ya khlaiwi dera rw kha.

¹²Bororok sógwi yapharmano karwi aro sumsok se khlai bai si-o tei kubuino khe ha-o khibiui rwjak kha. Tei bokorong bini muchung tẃi khlaiwi belai cha sa kha.

¹³Hakhe ang khoroksa suari kwtharno kók saui tongma khna kha tei khoroksa suari kwthar bono hai hwnwi sẃng kha, “Ang imang mukthango nukmani abo nokha sal bwswk wngnai? Sal brúmo sógwi yaphar thani khe nokha sal bwswk a selengmasingcha sumsok tongnai? Noktharno tei chuknohani suarirokno sal bwswk káduljaknai?”

¹⁴Bo hai hwnwi sa kha, “Nokha nwisai tei thamra phung tei sanja jora abo hai khe tongnai. Aboni yagulo khe noktharno tei uáisa kwthar khlaijaknai.”

¹⁵Ang Daniel, imang-mukthang nuk khe abo tamo saui manna bagwi ma chaitok kha, aphuru khe aro borok khoroksa achomsa ani bwskango bacha phai kha,

¹⁶ang Ulai twima rukungni borokni khorang khe hai hwnwi sama khna kha, “Gabriel, bono imang mukthangni kókno saui mannani chuba di.”

¹⁷Hakhe bo ani gana-o phaiwi bacha phai khe ang belai kirima chaui ha-o botok khe klai kha. Tamo khe bo ano hai hwnwi sa kha, “Borokni bwsa, aboni kókno khnaui narwk di, o imang-mukthang mol pái phuruni kók se.”

¹⁸Bo ano saui tong phuru khe, ang ha-o klaiwi muktrwi láiwi tháng kha; aphuru khe bo ano romwi yakung bai bacha rw kha.

¹⁹Bo ano hai hwnwi sa kha, “Nai di, ang nono Kaitor jolimani ulo tamo wngnai abono phunuknai, nwng nukmani abo chongjak mol pái phuruni se.

²⁰Nwng mera masa bokorong kongnwi khe nukmani abo Media bai Parsiani habugra khoroknwirok se.

²¹Punjua[8] nukmani abo Grisni habugra tei bini mokol kolnwi kwcharo bokorong nukmani wng kha puilani habugra.

²²Bokorong kongsa báiwi aro tei bokorong kongbrwi achaimani wng kha; o hani habugra khorokbrwi bachanai, phiya ba abórok bo hai phan gwnang wng glak.

²³Bórok bugra cháma pái twtwi phuru khe bórok sumsok bai kupulung wng khe, khoroksa habugra; bwkha kwrakma, buino bandinai, kók kuthukrokno buchinai bacha anw.

²⁴Bini phan kotor wngnai, bo kirimasingcha khe sokomornai, bini samung bebak chanai, phan gwnang bororok tei Kaitorni borok kwtharrokno sokomornai.

²⁵Bo belai hus gwnang khe bandiui samung khlaimani bai bini samung chanai tei bo sak sakno kotor kuk hwnwi uansuknai. Bororokno sakno kirina kwrwi khom-khom hwnwi chongwi tong phuru bo borok kwbángmano sokomornai, phiya naikolphangrokno kebengwi bachanai. Páithago khe bo borokni yak nang yaui’-no sokomorjaknai.

²⁶Phung aidrop bai sanja-o phunugui yapharmano tẃiwi phunukjakmani abo kubui’-no, tamo khe o phunukjakmano sil bu-ui ton di, tamni hwn ba abo ulo nang phainani kók se.”

²⁷Ang Daniel, bwkha tongthok ya khe sak hamya wngwi sal kisa swk thu-ui tong kha. Yagulo khe ang bachaui habugrani thani tháng phi kha. Ang a imang mukthangno nugwi belai ma uana kha, tamni hwn ba ang a imang mukthangni kókno romwi man liya ba.