Read Kok Borok HOSEA 1 Bible Online

HOSEA 1 - Kok Borok bible

HOSEA 1

¹Ujia, Jotham, Ahas tei Hejekiasong Judani habugra tongma jora-o, phiya Joasni bwsajla Jeroboam khe Israilni habugra wngwi tongma jora-o, Berini bwsla Hosea Subraiyung bai kók sajago.

²Subraiyung puila Hoseano sakhlai phuru sa kha, “Tháng di, buitali sak phalnai bwrwi khoroksa bai káijagwi di tei o buitalijwkma bai’-no bwsarokbo man di, tamni hwn ba o ha Subraiyungno yakarwi belai balik kha.”

³Hakhe bo abo hai’-no khlai kha, Diblaimni bwsajwk Gomer bai káijagwi kha tei a bwrwi sakderiya wngwi bini bagwi bwsa chwla khoroksa bá kha.

⁴Hakhe Subraiyung bono hai hwnwi sa kha, Bono Jejril[1] hwnwi mung phar di; tamni hwn khe Jejrilni thẃini bagwi yagul su-ui Jehuni bosongno[2] swpraknai tei ang Israil habugrarokni bosongno sokomornai.

⁵A salo Jejrilni hapharo Israilni badukhung swbainai.

⁶Bo tei uáisa sakderiya wngwi bwsa bwrwi khoroksa bá kha. Subraiyung Hoseano sa kha, bono Lo-ruhama hwnwi phar di, tamni hwn ba ang bórokno tei khairok glak tei Israil bosongrokno nakar glak.

⁷Phiya ba ang Judia bosongrokno khairoknai tei bórokni Subraiyung Kaitorni bising tẃi bórokno phiyóknai; ang bórokno badukhungrok, sengrok, choba bai korai tei korai kanairokni bising tẃi phiyók glak.

⁸Gomer Lo-ruhama abuktwi yakar khe, bo tei uáisa sakderiya wng u kha, aphuru tei khoroksa bwsa chwla bá kha.

⁹Subraiyung sa kha, “Bono Lo-ami hwnwi mung phar di, tamni hwn ba norok ani borok ya phiya angbo norokni Kaitor ya.”

¹⁰Israilrok twijlangni hasing hai bángnai, abo rwtauibo man ya lekhauibo man ya; hai phano nwng ani borok ya, hwnwi sajak phano bórok Kaitor kwthangni bwsa hwnjaknai.

¹¹Judia bosongni bororok bai Israil bosongni bororokno kwrẃngsa-o khe thumjak anw tei bórok kiching bórok ojama khoroksa chong anw; tei bórok thángwi a hano bórokni sakni khlainai; tamo khe Jejrilni[3] a sal kotor khlaijak anw.