Read Kok Borok HOSEA 11 Bible Online

HOSEA 11 - Kok Borok bible

HOSEA 11

¹Israil chwrai phuru ang bono hamjak kha, tei ani sajlano ha Ijipni ring kha.

²Ang bórokno ring rwrwk, bórok khe ang bai chalwi tháng rw rwk; bórok mwtai Balni thani ratharwi yapharwi tong kha, tei takjak mwtairokno satrai sógwi tong kha.

³Ang se Ephraimno himna phrwngmani, bórokno ani khuri-o khe tonmani; tamo khe bórok Ang se bórokno hamyani ham rw-o hwnwi bórok si liya.

⁴Ang bórokno borokni khairokma buduk tei hamjakma khamung bai tẃi kha; Ang bórokni bangorani horbakno na kha tei chá rwna bagwi bom rw kha.

⁵Bórok Ijip ha-o kiphilwi ma tháng anw; tei Asiriya bórokni habugra wngnai, tamni hwnma le bórok ani thani kiphilna lon ya.

⁶Bórokni kamiyungrok sengrok bai tantharjak bainai tei abo bai bórokni duglamrokni thongla swbaiwi bórokni nok kwrakrokno swbainai, tamni hwn ba bórok hamya chapmungrok chap lai kha.

⁷Ani bororok ano yakarwi thángna uphiljak. Bórok kuchuk khe bórom khlaijaknai hwnwi le sa lai-o, aile bono kuchuk khlaiwi bo se bóri lai ya.

⁸O Ephraim ang nono bahai khe khibiui mannai? O Israil bahai khe ang nono buini yapha-o yapharwi rwnai? Ang nono bahai khe Adma hai snamnai? Bahai khe Ang nono Jeboimno khlai tẃi khe khlainai? Ani bwkha bisingo dundrogwi tongo; ani khairokma báng rw rwgo.

⁹Ang thamchi tungsaui joli glak; Ephraimno tei uáisa sokomor glak; tamni hwn ba ang Kaitor norokni thani kwtharsa se, thwiblang ya, ang sokomorna tháng glak.

¹⁰Bórok singho hai sokromnai Subraiyungno rwktharnai; bo sokrom khe bini bwsarok salthángbaini kwlwibraui phainai.

¹¹Bórok kwlwibraui tokrok hai khe ha Ijipni phainai tei pharukrok hai Asiriya hani phainai; tei Ang bórokni tongthai kiphilwi rw phinai hwnwi Subraiyung sa-o.

¹²Ephraim tatalrok bai tei Israilni bororok khe bandimung bai ano kiting kha; phiya ba Judia tabukbo Kaitorni thani kubui khe tong kho.