Read Kok Borok HOSEA 13 Bible Online

HOSEA 13 - Kok Borok bible

HOSEA 13

¹Ephraimrok kók sa phuru kwlwibra kha; bo Israilo lobsajak kha; tamo khe bo Bal mwtairokni bising tẃi cha ya-o kubul kha tei thwi kha.

²Tei tabuk bórok teibo sumsok khlai rwk khlai rwk tei bórok sakni bagwi mwtai-mangrok tak kha tei rukphaini mwtai mangrokno bórok khá ka tẃi khe tak kwrwngrok tak kha, abórok bebakno tak kwrwngrokni samung se. Oro se ratharwi barok di hwnwi bórok sa lai kha. Bororok a musuk bwsano motom su lai kha!

³Aboni bagwi bórok phung-ai jorani siyari hai, eba aisirisirini pantwirok dakti’-no ranwi thángmani hai kwmaui thángnai tei mai súk phuru rwsamni gundak kobonwi tháng tẃi khe eba tailam tẃi hoku ongkhor tẃi khe kwmaui páinai.

⁴Tamo khe ang’-no nini Subraiyung Kaitor, ang se nono ha Ijipni tikhlaiwi tubu-o. Nwng ano karwi tei khoroksano phano Kaitor hwnwi lonwi man glak, ano karwi tei mwthangnaisa kwrwi.

⁵Ang se nono ransajak hasinglwngo naikolwi tubu-o.

⁶Ang bórokno chá rw khe bórok ok kochomo; ok pung khe bórok kung chuk lai-o; hakhe bórok ano pogwi thángo.

⁷Aboni bagwi ang bórokni thani-o singho hai khe se phainai tei geguma hai khe choprokna bagwi lama-o naisingwi tongnai.

⁸Bwsa kwmajak gong choprok tẃi khe ang bórokni saka-o choproknai tei bórokni khaklap chikhaknai; Ang singho hai khe bórokno uátharwi chánai, bolongni yabrwirok uásik tẃi khe bórokno chiki-chakai khlainai.

⁹Ang nono sokomornai; O Israil nono sabo chubanai?

¹⁰Nono mwthangnai habugra buko buro? Buko buro nini kamiyungni tẃiphangrok? Nwng Ano habugra tei tẃiphangrokno rw di hwnwi sanmani bórok le buko?

¹¹Ang joliui nono habugra rw kha tei ang bono thamchi kaui tlangwi pái kha.

¹²Ephraimni samung hamya rochongsa kha tei bini sumsokrok rúngwi tonjak kha.

¹³Sak kengna phuru bwrwirok bohok sajakma jora hai binibo abo hai jora sók phai kha, phiya bo tal sók ya absa hai bini jora-o bwsa-khók duglamo phai ya.

¹⁴Ang bórokno mwnakma mangkhorni phi de phiyókno? Ang Bórokno thwimungni yakni phi de phiyókno? O thwimung, buro nini bok nang rwma? O mangkhor nini phan le buko? Ang nuk phano tei khairok glak.

¹⁵Bo takhuksongni bere ersajak phano, salkabaini nokbar phaiwi Subraiyungni aroni nokbar hasinglwngni simi sibchaui phainai, hakhe bini twimuk ransanai tei twisarokno rampra rw bainai. Abo bini hamjakma manwirokno segwi páinai.

¹⁶Samaria bini cha yani bagwi yagul sujaknai, tamni hwn ba bo bini Kaitorno kebengwi bacha kha; bórok seng bai tantharjaknai, bórokni chwrairok búpháiwi phindrik-phandrak khlaijak bainai tei bórokni sak kupulung bwrwirok khe bohogo bu-ui bwsa chokhrai rwjak bainai.