Read Kok Borok HOSEA 14 Bible Online

HOSEA 14 - Kok Borok bible

HOSEA 14

¹O Israil nwng nini Subraiyung Kaitorni thani kiphil di, tamni hwn khe nwng nini cha yarokni bagwi thutai kha.

²Norok kóktháirok bai khe Subraiyungni thani kiphilwi phai di; bono hai hwnwi sa di ani sumsokrokno tlangwi pái si di; kaham tongmano yachak di, chwng chini khukrokni bwtháino yapharnai.

³Asiriya chwngno mwthang glak; chwng korai kasa glak; chwng tei chini Kaitor, chini yakni samungrok, ma-pha kwrwirokno nwng khairogo hwnwi sa glak.

⁴Ang bórokni kók khna ya wngmano ham rwnai; Bórokno kha sutrang khe hamjaknai, tamni hwn ba ang bórokno jolima ham kha.

⁵Ang Israilrokni bagwi pantwi hai wngnai; bo lili khum hai barsanai, tei bini yarwng Lebanonni buphang hai suhornai;

⁶Bini bosokrok torsanai; bini bedekrok suhorsanai, bini naithokma olib buphang hai naithok wngnai bini motomma Lebanonni sidar hai wngnai.

⁷Bororok haino hai bini saklomo tong phinai Bórok buphang bwlwng hai khe er sanai; bo angur buphang hai khe hom-hom khe hamchanai, bini motomma Lebanonni angur bwtwi hai wngnai.

⁸O Ephraim, takjak mwtairokno Ang tamo khlainai? Ang bwlái kormosa ya pain buphang hai wngnai; nini bwthái ani oroni se phai-o;

⁹Khá sinairok, cherwi nainairok o kókno si-o; tamni hwn ba Subraiyungni lama khe kaham, borok kahamrok a lama tẃi himo, tamo khe borok hamyarok le aro thutaiwi klai-o.