Read Kok Borok HOSEA 2 Bible Online

HOSEA 2 - Kok Borok bible

HOSEA 2

¹Nini takhuk Ammi[4] tei nini bukhuk Ruhamano[5] sa di.

²Nwmano kul di, bono kudiui kul di tamni hwn ba bo ani ya angbo bwsai ya. Bo bini sak phalma mwkhangno tei khajani buitali wngna muchungmano khibi thung.

³Ang bini rí khengwi bo achai phuruni hai khe sak lánga khlainai, bono hasinglwngo tonma hai khe twi kwrwi khe tonwi twi kang rwui butharnai.

⁴Bini bwsaroknobo ang khairok glak, tamni hwn ba bórok uaijanaini bwsa se.

⁵Bórokni buma uaijaui se bórokno ogo chu-o, abo belai lachimasingcha. Phiya ba bo hai hwnwi sa-o, “Ang ani hamjakma chwlani logi thángnai, bo se ano chámung-nungmung, rí-chum, thok tei arak rw-o.”

⁶Aboni bagwi ang bini lama-o busuni bera rwnai; tei bono lama naitugwi man ya khlaina bagwi deual tisanai

⁷Bo bini hamjakma chwlarokno rwkthar anw, hai phano bórokno slap glak; tei bo bórokno naituk anw, hai phano malai glak. Aphuru bo hwnnai, Ang ani swkangni bwsaini thani kiphilnai, tamni hwn ba tabukni slái aphuruni se ham kugo.

⁸Bo saui se man ya, ang se bono bwthái bwchlwirok, chuak, thokrok rw-o, bo Bal mwtaino khulum thani thepama rukphai tei rangchakbo bono ang se rw-o.

⁹Aboni bagwi ang ani bwthái bwchlwi, jorani angur bwtwi; tei bo sak bólma rí-chumrokno kiphilwi na phinai.

¹⁰Tabuk ang bono bini hamjakma chwlarokni bwskango kharak-kharak khe lachimung rwnai, khoroksa phano bono ani yaphani phiyógwi man glak.

¹¹Ang bini bebak tongthok-cháthok, terrok, tal kwtal, sabatrok tei bebak chongjak terrokno sokomor súknai.

¹²Omorokno ani hamjakma chwla ano rwmani hwnwi bo samani bini angur buphangrok tei khwichang buphangrokno ang hamya khlainai. Ang abórokno bolong se khlainai hakhe yabrwi mal matarok abórokno monoknai.

¹³Bo Bal mwtairokno barogwi satrai sógwi tei sakno yasitem tei gwina-ganthirok kanwi naithok rwui ano pogwi bini hamjakma chwlarokni utung utung wngma bagwi ang bono sátoknai.

¹⁴Aboni bagwino, tabuk ang bono phemlogwi hasinglwngo tubu anw tei kók kwchang sa anw.

¹⁵Aro ang bono angur bwlwng rwnai, abono Birmanni Harung tei khatungma dugar rwnai. Bo aro ha Ijipni ongkhorwi phai phuruni hai tei sikla jora phuruni hai wngnai.

¹⁶Subraiyung sa-o, a salo nwng ano angsai hwnwi ring anw tei nwng ano ani Bal[6] mwtai hwnwi ring glak.

¹⁷Tamni hwn ba ang bini khukni Balrokni mungrokno hu-ui khibinai, bórokno tei bórokni bumung khu rw glak.

¹⁸Ang nwng bai auarni yabrwi mal-matarok, nokhani birnai tokrok tei ha-o malnairok bai kók khanai; tei ang badukhungrok, seng tei chobano sokomor suknai tei uanama kwrwi khe muthunai.

¹⁹Ang nono mol brúmni bagwi hik snamnai; ang nono bujsói tei pái phlai ya hamjakmung bai khe khairogwi hamjagwi ani hik khlaiwi tonnai.

²⁰Ang nono bwkha beraui hiksongnai; hakhe nwng Subraiyungno sininai.

²¹Ang a salo sakhlainai, ang sakani simi swngcharo sakhlainai hwnwi Subraiyung Kaitor sa-o;

²²aphuru swngcharo bwthái bwchlwi thokrok Jejrilno rwnai;

²³tei ang bono ani bagwi hakungo káinai, tei ang Lo-ruhamano khairok kha hwnwi Lo-amino sanai tei norok ani borok hwnwi bo sanai, bo khe nwng ani Kaitor hwnwi sanai.