Read Kok Borok HOSEA 4 Bible Online

HOSEA 4 - Kok Borok bible

HOSEA 4

¹O Israilsarok, Subraiyungni kókno khna di; tamni hwn ba Subraiyung hani bororokno majra ber kha. Aro tei poito eba kók khnamung kwrwi kha tei ha-o Kaitorno sininai kwrwi kha.

²Swmai tang laima, tatal, buthar laima, khok laimung tei, buthar láimani saka láiwi buthar lainai!

³Aboni bagwi o ha ma kapnai; aro tongnairokbo lengpraui ma tongnai; aro yabrwi mal-matarok, nokha-o birnai tokrok; tei twibomni árok suda thwinai.

⁴Phiya ba khoroksa bai tei khoroksa ta ber lai thung, tamni hwn ba o ochai ang nonobo bero.

⁵Nwng salo thutainai; diyarirokbo horo thutainai tei ang nini nwmano sokomornai.

⁶Simung kwrwini bagwi ani bororok komor kha; tamni hwn ba nwng simungno yakar kha, aboni bagwi ang nono ochai sokok kha. Nwng ani kerongno pokmani bagwi angbo nini bwsarokno poknai.

⁷Bórok aswkno bángrwrwk, yang ani bwskango aswkno sumsokbo khlai rwrwk; bórok bórokni chẃngsachano lachimasingcha se khlaiwi pái si-o.

⁸Bórok bórokni sumsogo se ok supung lai-o; bórok sumsok samungni bagwi se phor-phor.

⁹Ochairokbo tei ahaino borok haino; bo tamo khlai ang si-o aboni bagwi ang bórok cha ya khlaimani bagwi yagul sunai.

¹⁰Bórok chá anw hai phano ok pung glak; bórok uaijaui sak gwdal anw hai phano bwsa man glak; tamni hwn ba bórok Subraiyungno khibiui sakno se mon lai si-o.

¹¹Buitali-buitala tongmung, arak kwcham tei kwtal kwnwino ani bororokni simano sokomoro.

¹²Ani bororok buphangni mwtai mangrokni thani se sẃngphnego tei bórok sungmani dangno se sakhlainai hwnwi khatungo. Balik rwnai phola bórokno lama koró rw kha, hakhe bórok Kaitorno yakarwi sak motók tong kha.

¹³Bórok hachuk bochlongo tei hapung saka-o, uk buphang tola-o, poplar tei terebint tola-o yapharmung yaphar lai-o, tamni hwn khe abórokni saklom tongo. Aboni bagwi bini sajwksong uaija-o, bórokni hamjwksong balik lai-o.

¹⁴Nini sajwksong, nini hamjwksong baligwi tong phuru ang bórokno sátok glak; tamni hwn ba bórokni chwlarok se baliknairokni utung utung rwkthar laijak tei sak phalnairokni mwtai nogo thángwi ratharmung ratharwi-o, abo tẃi khe si ya wngwi bororok komoro.

¹⁵O Israil nwng uaija phano Judano cha ya ta khlai di. Gilgalo yapri ta rw di, eba Bethaben jora phano ta tháng di, Subraiyung kwthang hwnwi saui swmaibo ta tang di.

¹⁶Israilrok kók khna ya musuk damri hai; bórokno Subraiyung merarokno kuarma auaro jabra chá rw tẃi khe chá rwui man ya diba?

¹⁷Ephraim takjak mwtairokno hamjagwi khulumma bagwi bo saichung susuk khe klangjak kha.

¹⁸Bórok chuak nungwi pái khe sak motók tongwi uaijamung uaija lai-o; tei samung kahamrokni slái lachimasingcha samung khlaina hamjago.

¹⁹Nokbar bórokno bini bwkrang bai kholobo tei bórok bórokni mwtai háyáni bagwi lachimasingcha wng anw.