Read Kok Borok HOSEA 5 Bible Online

HOSEA 5 - Kok Borok bible

HOSEA 5

¹O ochairok, omono khna di! O Israil bosongrok khna di! O habugra bosongrok khunju kaichom di! Norok buj thumjaknai; tamni hwn ba Mijpa-o khẃi thon kha tei hachuk Taboro chei sahar kha,

²tei Sitimo hakhor kuthuk khur kha; phiya ba ang bórokno aboni bagwi sátoknai.

³Ang Ephraimno sini-o, tei Israilbo ani thani huijak ya; tamni hwn khe O Ephraim nwng baligwi sak phalnai wng kha, Israilbo hamya wng kha.

⁴Bórokni samungrok bórokno Kaitorni thani kiphilna rw ya khlai-o. Tamni hwn ba sak phalwi uaijana phola bórokni bisingo tongo tei bórok Subraiyungno saui man ya.

⁵Israilrokni kung chugui kók khna ya wngma bono kebengmano phunugo; Ephraim bini sumsogo thutai kha; Juda bo thutai-o.

⁶Bórok sakni musuk, pun bodol tẃiwi Subraiyungno naitukna tháng anw, tamo khe bórok bono manẃi glak; bo bórokni aroni kutulwi tháng kha.

⁷Bórok Subraiyungni thani kubui khe tong li ya; tamni hwn ba bórok mung nangjak chwrai mano. Tabuk tal kwtalni ter bórok bai bórokni auarno monoknai.

⁸Gibea-o totro tam di, Rama-obo abo hai khe tam di. Bethabeno khorang kotor bai sakhlai di; o Benjamin uphilwi naisik di!

⁹Sátokjakmani molo Ephraim manwi hamya hai selengmasingcha wngnai; Israil hodarokni bisingo ang o kókno sakhlai-o.

¹⁰Judani habugrarok yak lái súk kha, ang bórokni saka-o twi lukhlai tẃi khe ani jolimano lukhlainai

¹¹Ephraim sátokjak kha, swbaiwi buj ma thumjak kha, tamni hwn ba bo bini chúk ya lama tẃi himna bagwi bwkha chap kha.

¹²Aboni bagwi ang Ephraimni thani kwsani yóng hai tei Judani bosongrokni thani sok rwnai hai wng kha.

¹³Ephraim bo lummano saui man khe tei Juda bini kwsano si phuru khe Ephraim Asiriya-o habugra kotorni aro do lang kha. Tamo bo nini kwsarokno ham rwui man ya.

¹⁴Tamni hwn ba ang Ephraimni thani singho tei Judia bosongrokni thani singho bwsa hai wng anw. Ang baithang bórokno sichigwi klangnai, ang bórokno sopreui tlangnai, hakhe khoroksa phano ano kati rwui man glak.

¹⁵Bórok sak sakni cha yano lon ya sak tei ano naituk phiya sak ang ani tongthai-o kiphilwi thángnai. Bórok ani thani chubamung san anw.