Read Kok Borok HOSEA 8 Bible Online

HOSEA 8 - Kok Borok bible

HOSEA 8

¹Nini búkhúk bai totro supsa di! khoroksa Subraiyungni nok saka-o toling hai khe bir khlai phai kha, tamni hwn ba bórok ani kerongno swbai kha tei raidarokno sak nang ya wng kha.

²Bórok ani thani, o ani Kaitor chwng Israilrok nono saui mano! hwnwi kap kha.

³Israilrok kahamno khibi kha; kebengnairok bórokni uklok uklok riphriknai.

⁴Bórok habugrarok chong kha, tamo khe abo ani bising tẃi ya; bórok bugrani bwslasongno chong kha, arobo ani gosimung kwrwi. Bórokni rangchak tei rukphai bai bórok mwtai mang snam kha, bórok sakno sokomorna bagwi se khlai si-o.

⁵Nini a musuk bwsa hai mwtai-mangno khitarwi rohor kha, ang bórokno joli suk kha. Bórok tei bwswk abo hai khe si yaui tong sinai?

⁶Omo Israilsarokni aroni se, khoroksa tak kwrwng abono takma se; abo Kaitor ya. Samariani a musuk bwsa hai mwtai-mang phondrik-phandrak khe swbaijak anw.

⁷Tamni hwn ba bórok nokbar bwchlwino saro tei bangkundrino khe bwthái ranai, a bwchlwini bumuk kwrwi, abo bwthái thái glak; abo thái-thui phano, phatarsarok se abono monok bainai.

⁸Israil monokjak bai kha; tabuk khe kubun bosongrokni bisingo samung chúk ya twk hai wng kha.

⁹Tamo khe bo bolongni masa korai chirka beraiwi tongnai hai bórok Asiriya jora sógwi kha; Ephraim khe hamjakmungrokni bagwi rang rw kha.

¹⁰Bórok phatarsarokni thani rang man phano, ang tabuk bórokno kwrẃngsa khe thumnai. Bórok dakti’-no habugra tei naikolphangrokni aroni sátokmung mannai.

¹¹Ephraim sumsokni yapharmung barokna bagwi kwbángma háyá snam kha. Aboni bagwino háyárok bini bagwi kwbángma sumsok hai wng kha.

¹²Ang bini bagwi ani raida kai chisai swi kha, phiya ba abórok bini thani samung chúk ya manwi hai khe se najak si-o.

¹³Ano yapharjak yapharmung yaphar phano, a bahanrok tlangwi cháui phano Subraiyung bórokno bwkha phurjak li ya. Tabuk bo bórokni hamyarokno muitu khlainai tei bórokni sumsokni bagwi bórok sátokjaknai, bórok Ijibo kiphil phinai.

¹⁴Israilrok bini snamnaisano pok kha tei kwbángma noyungbo snam kha; Juda teibo sengkrak bai kasujak noyung snam kha; tamo khe ang bini a bebak noyungrogo hór rohornai tei abo bini bebak sengkrakrok sókpronai.