Read Kok Borok HOSEA 9 Bible Online

HOSEA 9 - Kok Borok bible

HOSEA 9

¹Israil song ta tongthokjak di! Kubun bosongrok tongthok tẃi ta tongthok di; tamni hwn ba nwng nini Kaitorno yakarwi sak phalwi uaija kha. Nwng nini mai nagwi manmarokno baliknairokno painani bagwi se khlai si-o.

²Nagwi manmani bwtháirok eba angur bwthái sepmarokni bórok chámung man glak tei angur bwtwi kwtalroknobo bórok keplenai.

³Bórok Subraiyungni ha-o tongwi máng ma tong glak; phiya Ephraim ha Ijibo kiphilwi ma thángnai tei Asiriya-o bórok kwthar ya chámungrok ma chánai.

⁴Bórok Subraiyungno nungmung yapharna bagwi angur bwtwi lukhlai glak tei bórokni ratharmungrokno Subraiyung bwkha phurjak glak. Abo tẃi yapharmungrok bwkha khamwi auang barokma hai se wngnai; abono chánairok kwthar ya, bórokni chámungrok bórokni ok khuimano simi supungnai; bórok nok kwtharo ratharmungrok yapharwi man glak.

⁵Hakhe nwng terni salrogo tei Subraiyungni chámung pandarogo norok tamo khlainai?

⁶Bororok komor ya phano, Ijip bórokno gerepsaui romnai, Mopho bórokno phobjaknai. Bórokni rukphaini kaham kuk manwirok sichu buphang bai kobolnai; bórokni rí nokrogo busuphangrok achainai.

⁷Sátokjaknani sal phai kha, yagul sujakna sal phai kha; Israilsarok ahai hwnwi chirik anw, diyari khe butua, Phola bai tẃijak borok khe kobor! Bórokni belai cha yani bagwi nini yagul sujakma belai tor kha.

⁸Diyari khe Ephraimno Kaitorni wngwi mwrwgo, tamo khe bórokni lama-o mui romnairokni khẃi thonjak, Kaitorni nogo suda se bororok diyarirokni kena ari gwja.

⁹Gibeani jora-o wngma hai bórok sak-sakno belai sitra rw kha; bo bórokni sumsokrokno muitu narwknai tei bórokni a cha yarokni bagwi yagul sunai.

¹⁰Hasinglwngo angur bwthái manma hai ang Israilno man kha. Khwichang buphango tháiskangni bwthái hai bini molo nukma hai ang nwphasongno nuk kha. Phiya ba bórok Bal-piorni thani thángwi lachimasingcha samungni bagwi sak-sakno swkagwi kha tei bórok hamjakma manwi hai khe bórok selengmasingcha wng bai kha.

¹¹Ephraimni bórom tok bir tẃi birwi thángnai, aro achaima kwrwi, sakderiya wngmarok tong glak!

¹²Bórok chwrai bwsarokno naikini khlaiwi tong phano khoroksa kwrwi tẃi khe ang tlangnai. Bórokno Ang yakarwi tháng khe abo bwswk se kirimasingcha wngno!

¹³Ang salsa Ephraimno twima rukungni ha kahamo káijak khajuri phang khe nukmani, tamo khe tabuk Ephraim bini bwsarokno tantharna tlang kha.

¹⁴O Subraiyung bórokno tamo rwnai? Nwng rw di. Nwng bórokno bwsa ogo chu ya tei khája-o abuktwi kwrwi khlai di.

¹⁵Gilgalo bórokni sumsok chengo; aro’-no Ang bórokno seleng kha. Bórokni tongmung sitrarok tei tongmung khechrarokni bagwi Ang bórokno ani nokni rwkhlainai. Ang bórokno tei hamjak glak; bórokni tangphangrok kebengwi bachanai.

¹⁶Ephraim swprakjak kha, bórokni yarwng ransa kha, bórok tei bwthái thái glak. Bórok bwsa bá phano ang bórokni hamjakma chwrairokno buthar phainai.

¹⁷Bórok ani kókno khunju kan li ya gwja, aboni bagwi ani Kaitor bórokno yakarwi rwnai; bórok hoda-bosongrokni bisingo kitingwi berainai wngnai.