Read Kok Borok JOEL 3 Bible Online

JOEL 3 - Kok Borok bible

JOEL 3

¹“Tamni hwn ba a salrokni a jora-o ang Juda bai Jerusalemno phiyók phuru tei hamcha rw phuru,

²ang dopharokno thumsa khlainai tei bórokno Jihosapatni harungo kiphilwi tubunai, aro ani sompoti, abo khe ani borok Israilsarokno tẃiwi ang bórokno buj thumnai, tamni hwn ba bórok bórokno dopharokni thani pisa-piring khlai kha. Bórok ani hano khak kha tei,

³ani borokno banta khe na laina bagwi patkar rw lai kha, sak phalnai bwrwini bagwi chwla chwrairokno phal kha tei angur bwtwi paiwi phegwi nungna bagwi bwrwi chwrairokno phal kha.

⁴“Hakhe o Tur, Sidon tei Philistiani bebak amchoi, norok ang bai tamo khe kwrwng ba? Mungsa swkni bagwi da norok ano yagul su-ui tong? Tumung norok ano yagul su-ui tongma tong khe angbo abo hai kheno norokno aphuru’-no dakti dakti khe yagul su phinai.

⁵Tamni hwn ba norok ani bebak rangchak-rukphairok naui pái kha tei ani rang-mairokno norokni mwtai nokrogo tlangwi tháng kha.

⁶Norok Judia tei Jerusalemni bororokno bórokni hani hakchalo tlangwi Grikrokno phalwi rwui kha.

⁷Tamo khe ang tabuk norok bórokno phalwi rwima harokni kiphilwi tubu phinai tei norok bórokno khlaima haino angbo norokno khlainai.

⁸Ang norokni sajwk-sajlarokno Judani bororokni thani phalwi rwnai tei bórok khe bórokno hakchal Sabian hani bororokno phalwi rohor phinai; tamni hwn ba Subraiyung hai hwnwi sa-o.”

⁹Dopharokno o kók sakhlai rw di: chobani bagwi tiyar wng di, phan gwnang sengkrakrokno ring di. Bebak sengkrakrok gandaro khe seder thung, bórok phai thung.

¹⁰Norokni al baima phalrokni seng tak si di, chekhrarokni khe koslu snam si di; phan kwrwisa phano “Ang sengkrak” hwnwi sa thung.

¹¹Yang ayang tongnai dopharok doui phai bai si di. O Subraiyung, nini sengkrakrokno tubu si di.

¹²Dopharok Jihosapatni harungo thumsa khe thumjak thung, tei aro seng tisa lai si thung; tamni hwn ba aro ang arini dopharokno buj thumnani achuknai.

¹³Chekhra khocha di tamni hwn ba mairok mun bái kha. Phai di, phere phai si di tamni hwn ba angur pherejaknai pherekhor pung súk kha. Marua pungwi kwsar kha, tamni hwn ba bórokni hamya aswk khe báng kha.

¹⁴Chongma harungo kwbángma kwbángma! Tamni hwn ba Subraiyung a sátokna harungo phaina sal sampha kha.

¹⁵Sal tei tal mwnaksa kha, athukirirokbo chẃng li ya.

¹⁶Subraiyung Siyonno tongwi sokrom kha, tei Jerusalemo tongwi bo kók sa khe nokha bai ha jangrijak kha. Tamo khe Subraiyung se bini bororokni khorok berathai tei Israilrokni nok kwrak.

¹⁷“Hakhe nwng ano Subraiyung nini Kaitor, Siyonno ani hathái kwtharo tongnai hwnwi saui mannai. Jerusalem kwthar wng phlainai, buini hani bororok bono tei segwi naui man glak.

¹⁸“A jora-o hatháirokni kwtẃi angur bwtwi chorom khlainai, hachukrokni khe abuktwi chorom khlainai, Judani twikherengrok tẃi twi kochok khlainai; tei Subraiyungni noktharni twisa boui Sitimni harungo twi lunai.

¹⁹“Ha Ijip bukcha wngnai tei Idom hasinglwng bukcha khanai, tamni hwn ba bórok Judani bororokno kosonwi swprak kha, tei bórokni ha-o borok kosongrokni thẃi kochok rw kha.

²⁰Tamo khe Juda bororok tong phlainai, Jerusalemobo kusung kusungno tong phlainai.

²¹Ang bórokni thẃini yagul sunai, ang bórokni cha ya khlaimano yakarwi rw glak tamni hwn ba Subraiyung Siyono tongo.”