Read Kok Borok AMOS 3 Bible Online

AMOS 3 - Kok Borok bible

AMOS 3

¹O Israilni bororok, norokno berwi samano, abo khe Subraiyung ha Ijipni tikhlaiwi tubumani a dophano bo berwi samano khna di:

²“Swngcharni bebak dopharokni bisingo ang norokno kaisa se saui mano; aboni bagwino ang norokni bebak sumsokrokni bagwi sátoknai.

³“Kók baksa wng lai yaui khoroknwirok thansa khe him laiwi de man?

⁴“Mui romjaknai kwrwi khe singhorok ba bolong bisingo so de sokrom ba? “Mungsa swk romwi man ya kheba singho bwsa hagurungo tongwi am am da pung ba?

⁵“Khẃi kwrwi-o toksa masa swk kw da kwcha ba? “Mungsa swk nang ya khe khẃi keplesaui de tháng ba?

⁶“Kamiyungo totro pung khe bororok kiri yaui da tong ba? “Subraiyung khlai ya khe kamiyungo digi-sigi nangwi da man ba?

⁷“Kubui’-no, Subraiyung Kaitor bini diyarirokni thani bini chongmarokno phunuk yaui mungsabo khlai ya.

⁸“Singho sokrom khe, sabo kiri ya tongnai? Subraiyung Kaitor bai sanani sajak khe sabo kók diyari sa yaui tongwi mannai?”

⁹Ha Ijipni tei Asdodni nok kwrago tong báinairokno hai hwnwi sakhlai di, “Norok Samariani hathái-o kuthum lai di; bini bisingo urumuru nang laimani tei bórok kiching bórok kusup laimani nai di.”

¹⁰“Bórok bahai khe sói khe khlainai abono saui man ya” hwnwi Subraiyung sa-o, bórokni nok kwrakrogo bórok sekpromani tei kusupmani manwirokno rúngwi ton lai-o.

¹¹Aboni bagwi Subraiyung Kaitor hai hwnwi sa-o: “Kena arirok hano kitingwi gerepsanai tei nini kasunairokno butharnai phiya nok kwrakrok segwi najak bainai.”

¹²Subraiyung hai hwnwi sa-o: “Mera mwrwknaisa singho búkhúkni yathek kongnwi, khunju chikhiksa man rwkma hai Samaria-o tong bainai Israilrokbo bórokni chuki yakung tei miyali bokocho simi se man rwgwi mannai.”

¹³“Khna di, tei Jakobni bosongno khoraiwi sakhlai rw di,” hwnwi kwplaisa Subraiyung Kaitor sa-o,

¹⁴“Israilno sumsokni bagwi sátokmani salo ang Bethelni háyároknobo swbai bainai; aphuru háyáni bokorongrok báiwi ha-o klai tong anw.

¹⁵Ang masing phuru tongjaknai nokrokno tei sachlang phuru tongjaknai nokrokno swbai bainai, mayung buani nokrok báiwi klai bainai, nok kotor bebak kwma suknai,” hwnwi Subraiyung sa-o.