Read Kok Borok AMOS 4 Bible Online

AMOS 4 - Kok Borok bible

AMOS 4

¹“Basanni musuk bwrwi kuphung hai phungnai, Samaria hathái-o tongnai, kwrwirokno kusupnai, chúk ya borokno bandinai tei ‘Chwng abono nungnani tubu di!’ hwnwi bórokni bwsaisongrokno sannai, norok o kókno khna di.

²Subraiyung Kaitor bini mung kwthar bai swmai tangwi sa-o: nai di, omo hai sal sók phainai, aphuru bórok norokno biching bai khaui sopreui tlangnai tei norok matheno khẃi-o kwchajak árok hai wng bainai.

³Norok joto’-no bwskangni chokdeual kwbai tẃi khe nongkhorwi ma tháng bainai; tei Harmonno khibiui rwjaknai,” hwnwi Subraiyung sa-o.

⁴“Bethelo thángwi sumsok khlai di; tei Gilgalo thángwi teibo sumsok báng rw di; phung ai brúm brúm nini yapharmungrok tubu-ui phai di saltham brúm brúm norokni chi-o kaisano tubu di;

⁵o Israilni bororok, chuan buljak auangno hambai yapharmung khlaiwi yaphar di tei norok a bwkha phurwi yapharma manwino tẃiwi kung chuk lai di; tamni hwn ba norok le abo hai khlaina hamjakma ba!” hwnwi Subraiyung Kaitor sa-o.

⁶“Ang norokno norokni kamiyungrogo bua kwchẃng khe ton kha tamo khe aro chámung rw li ya, hai phano se norok ani thani kiphil li ya,” hwnwi Subraiyung Kaitor sa-o.

⁷“Mairok ranani nokha taltham swkang ang uatwi rohor li ya; kami khungsa-o uatwi ua rwui tei khungsa kami-o khe ang uatwi ua rw ya khe ton kha. Panthor kaisa-o khe uatwi ua kha tei kaisa-o khe ha ransaui mwransaui tong kha;

⁸hakhe kami khungnwi khungthamrok tei khungsa kami-o nungjaknai twini bagwi tháng lai-o, tamo khe man ya; phiya ba norok ani thani kiphil ya,” hwnwi Subraiyung sa-o.

⁹“Ang norokno maiphang-khulphango yóng klai rwui swprak kha; nini tháiblwngrogo tei angur barino bukcha khlai kha; kukrok bebak norokni khwichang buphangrok tei Olib buphangrokno chá bai kha; hai phano norok ani thani kiphil li ya,” hwnwi Subraiyung sa-o.

¹⁰“Ang ha Ijibo khlaima hai norokni thani bok nang rw kha; ang norokni siklarokno seng bai buthar kha; norokni korairokno segwi na bai kha; norokni sengkrak bathamni mwnamno norokni bukungo sógwi rw kha; hai phano norok ani thani kiphil li ya,” hwnwi Subraiyung sa-o.

¹¹“Ang norokni bisingni baksa baksano Kaitor Sodom tei Gomrano sokomor tẃi khe sokomor kha, tei norok khe hór khamjak bisingni kariui narwkjak bol hai se; hai phano se norok ani thani kiphil li ya,” hwnwi Subraiyung sa-o.

¹²“Aboni bagwi’-no, o Israil, ang norokno sátoknai; tamni hwn khe ang norokno obo hai khlainai, o Israil nini Kaitorni bwskango bachanani tiyar wng di!”

¹³Muitu narwk di, hapung-hatháino snamnaisa, nokbarno snamnaisa tei bororokni thani bini chapmungrokno sakhlainaisa pohorno mwnak rwnai tei o ha sakani hapung-hathái saka tẃi himnai, bini mung wng kha Phankrak Subraiyung Kaitor!