Read Kok Borok AMOS 5 Bible Online

AMOS 5 - Kok Borok bible

AMOS 5

¹O Israilni bororok ang norokni bagwi ang tamo hwnwi saui kap kha khna di:

²“Israil bwrwi sikla klai kha, bo tei bacha phi glak; bono bini ha-o khibijak kha, khoroksabo bono sochanai se kwrwi.”

³Subraiyung Kaitor hai hwnwi sa-o, “Israil kamiyungni sengkrakrok khorok sasai nongkhorwi tháng khe, khorok sara se kiphilnai, tei sara nongkhorwi tháng khe, khorokchi se kiphilwi phai anw.”

⁴Aboni bagwino Subraiyung Israilno hai hwnwi sa-o, “Norok ani thani phai di hakhe thangnai;

⁵tamo khe Bethelo ta tháng di, Gilgalo bo ta hap di tei Birseba-obo ta tháng di, tamni hwn ba Gilgal khaui tlangjaknai, Bethel bo mungsa chúk ya wngnai.”

⁶Subraiyungni thani se tháng di, hakhe thangnai, wng ya khe bo Josepni bosongo hór bacha tẃi khe bachanai tei abo Bethelno kham rwui páinai, aroni khoroksa swk phano abono butharwi man glak.

⁷Norok bujsóino khe kwkha khlai kha, tei borok kahamroknobo ha-o khiklai bai kha!

⁸Bo se takhuksni athukirirokno tei athukiri tokma kokrorokno snamo, bo se mwnakmano sal pohor khlai-o, tei salno hor khlai-o, bo twijlangni twino ringwi ha saka tẃi kochok rw-o, bini mung’-no Subraiyung Kaitor,

⁹bo phan gwnangrokno choprogo hakhe bórokni nok krakrok sokomorjago.

¹⁰Bórok kamiyungni duglamo cha yano kebengnai borokno naislerjago tei kók kubui sanaino sak nangjak ya wngo.

¹¹Norok kwrwirokno sátogo, phan khe bórokni mai-khul segwi na-o, aboni bagwino norok holong bai nok kotor kotorrok tang phano aro ma tong glak; kaham kaham angur bwlwng snam phano aroni angur bwtwino ma nung glak.

¹²Tamni hwn ba norokni sumsok bwswk kwbáng tei bwswk samung cha ya khlai kha ang saui mano! Norok borok kahamrokno hanang-pinang khlai-o tei rang chá lai-o; duglamo bigrarokno sak nang ya khlai-o.

¹³Aboni bagwi siyan kwrwng borok khe abo hai jora-o siring siring tongo; tamni hwn ba jora le hamya ba.

¹⁴Norok thangwi tongwi manna tẃi khe kahamni uklogo se rwkthar di, hamyani uklogo ya; hakhe kubu kubui’-no norok sama hai Phankrak Subraiyung Kaitor norok bai tongnai.

¹⁵Hamyano seleng di tei kahamno khe hamjak di, kamiyungni duglamo bujsóini samung khlai di; hakhe kwplaisa Subraiyung Kaitor Josepni yógwi tong rwknai bosongrokno khairokna phano tongo.

¹⁶Aboni bagwi kwplaisa Subraiyung Kaitor hai hwnwi sa-o: “Bebak kamiyungni lamprarogo kap lainai; tei bebak lahar kotorrogo ‘Ham li ya! ham li ya!’ hwn lainai, bórok tangwi chánairokno kap di hwnnai tei bwthái kholwi kapna kwrwngroknobo kapna bagwi sanai;

¹⁷bebak angur barirogo kap laimung wngnai, tamni hwn ba ang norokni kwchar tẃi láinai,” hwnwi Subraiyung sa-o.

¹⁸Subraiyungni salni bagwi muchungwi tongnairok bwswk se hamya sitrano! Tamni bagwi norok Subraiyungni salno manna muchung? Abo le mwnakjak se, pohor kwrwi;

¹⁹abo le borok khoroksa singhoni aroni khárwi gong bai malaimani hai; tei nogo sók phaiwi nokni deualo yak rw khe chibuk bai sukjakma hai se.

²⁰Subraiyungni sal mwnakma se, kipir ya, abo sal mwnaksese wngnai, aro kipir da wngno ba?

²¹“Ang norokni terrokno naislero, tei norok kuthum laimarokno ang chajak ya.

²²Norok ani thani sógwi yapharmarokno tei bwthái bwchlwi yapharmarokno ang yachak glak; norokni kwthamungni yapharmungni bagwi mal kuphung yapharmano ang naisigwi nai glak.

²³Norok keche-keche rwchap laimano thak rw bai di; ang norokni chongpreng tammarokni khorangrokno ang khna glak.

²⁴Tamo khe bujsói twirok hai khe yorsaui tong thung, phiya kók narwkma khe twisani twi hai khe kochok khlai tong thung.

²⁵“O Israilsarok norok hasinglwngo nokha bisi brwichi tongwi phai phuru ani thani mungsa swk ratharmung eba yapharmungrok de yaphar kha ba?

²⁶Norok norokni habugra Sakutno tẃi lai kha, tei norok snammani norokni athukiri mwtai Kaiuanni takjak mwtai mangno tẃi lai kha;

²⁷aboni bagwino ang norokno ha Damaskosni ayang naro khaui tlang bainai,” hwnwi Subraiyung sa-o, bini mung khe kwplaisa Kaitor.