Read Kok Borok AMOS 7 Bible Online

AMOS 7 - Kok Borok bible

AMOS 7

¹Omo Subraiyung Kaitor ano phunukmani: Bwlái kwlwi rotomna jora-o bo kúkrokno snam kha; abo habugrani sam ra baimani ulo samrok achai phir phuru se wngo.

²Abórok hani kwkhrang samrok chá bai khe ang hai hwnwi sa kha, “Subraiyung Kaitor nakar ja si di, ang ma koi ja-o! Jakob bahai khe thangnai? Bo le belai kotoi ja se!”

³Subraiyung bini bwkha slái kha; “Abórok tei wng glak,” hwnwi Subraiyung sa kha.

⁴Omo Subraiyung ano phunukmani: nai di Subraiyung Kaitor buj thumnani bagwi hórno ring kha, hakhe abo twijlangrokno ransa rwui rw kha, tei hakungno mwlagwi pái kha.

⁵Hakhe ang hai hwnwi sa kha, “O Subraiyung Kaitor, bathak ja si di hwnwi ang koi ja-o! Jakob bahai khe thangnai? bo le belai khe kotoi ja se!”

⁶Hakhe Subraiyung bini bwkha sláiwi hai hwnwi sa kha, “Abórokbo tei wng glak,” hwnwi Subraiyung sa-o.

⁷Bo ano tei kaisa phunuk kha: Nai di ang Subraiyungno buduk bai su-ui snamjak nokni chokdeual gana-o bachajak tei sumani budukno yago tẃijak khe nuk kha.

⁸Subraiyung ano hai hwnwi sa kha, “Amos, nwng tamo nuk?” “Kaisa sumani buduk,” hwnwi ang sa kha. Hakhe Subraiyung hai hwnwi sa kha, “Nai di ang ani borok Israilrokni bagwi o suma budukno phnangnai; ang bórokno tei sátok yaui yakarwi rw glak;

⁹Isakni bosongrok kuchugo snamjak khulumma háyárok swbaijaknai, tei Israilni tei háyárokbo sokomorjaknai, ang habugra Jeroboamni núkhungno seng bai khe kebengsaui bachanai.”

¹⁰Aphuru khe Bethelni ochai Amajia Israilni habugra Jeroboamni thani hai hwnwi sa rw hor kha, “Amos Israil bororokni bisingo tong twtwi nini kena wngwi hamya chabwi bacha kha; hani bororok bini aswk kókrokno soiwi man li ya.

¹¹Amos ahai hwnwi sa-o, ‘Jeroboam seng bai butharjaknai tei Israilrok khe bini hani tei kaisa hakchalma ha-o khaui tlangjaknai.’ ”

¹²Hakhe Amajia Amosno hai hwnwi sa kha, “O diyari, tháng di, ha Juda-o tháng di, aro thángwi nini chámung ajiui di tei kók diyari saui di;

¹³tamo khe Bethelo tei kók diyari ta sa si di, tamni hwn ba omo habugrani khulumma nok tei dophani nokthar.”

¹⁴Hakhe Amos Amajiano hai hwnwi sa kha, “Ang diyari buya tei diyarini sajla buya; ang mera mwrwknaisa se tei khwichang buphangrokno naikini khlainai se,

¹⁵tamo khe Subraiyung ano ang mera mwrwgwi tongmani aroni tlangwi ahai hwnwi sa kha: Tháng di, Israil bororokni thani thángwi ani kók pírwi di.’

¹⁶Hakhe tabuk Subraiyung tamo sa khna di. Nwng ano, ‘Israil bororokno kebengwi kók diyari ta sa di tei Isakni bosongno kebengwi kók ta pír di’ hwnwi sa-o.

¹⁷Aboni bagwi Subraiyung hai hwnwi sa-o: ‘Nihik khe kamiyungo uaijaui sak phalnai wngnai, tei nini sajwk sajlasong choba-o butharjak bainai, nini harokno su-ui buino banta khe rwjaknai; nwng khe kwthar ya abo tẃi ha-o se thwinai, tei Israilsarok khe bórokni hani khaui kubun ha-o tlangjaknai.’ ”