Read Kok Borok OBADIA 1 Bible Online

OBADIA 1 - Kok Borok bible

OBADIA 1

¹Obadia phunukjakmani. Subraiyung Kaitor ha Idomno tẃi o kók sa-o: Chwng Subraiyungni aroni kaisa kóktma khna kha, tei dopharokni thani tẃitun rohorwi hai hwnwi sanani rohor kha: “Bacha di! phai di bórokno kebengwi choba nang lainai.”

²Nai di, ang nono dopharokni bisingo kotoi snamnai; nwng belai khe sak nangjak ya wngnai.

³Nini kung chukma bwkha nono bandi kha, tamni hwn ba nwng holongthai[1] kwrak bai kitingjak; tei hathái kuchugo nok tangjak. Nwng nini bwkha-o, “Sabo ano ha-o khiklai mannai?” Hwnwi satiro.

⁴Nwng toling hai kuchugo bir phano, athukirirok tong thani bothop thum phano, ang nono aroni tikhlai tubunai, hwnwi Subraiyung sa-o.

⁵Tumung nini thani sikhok phai khe tei horo dagait hap phai khe nwng bahai khe sokomorjak kha mun! Bórok tlangna muchungmano simi tlang glak kha mun diba? Nini thani angur bwthái khaknairok phai khe, bórok ba tháisa-thuisu karwi klang glak de? Tamo khe nini arirok le nono sokomor súk kha.

⁶Esau le pái súgwi tlangjak kha, bini rang gola huijakrokbo tlangjak kha!

⁷Nini bayaprok kók narwk yaui nono bandi bái kha; bórok nono nini hani rwkhlai rohor kha; nwng bai kiching khanairok nini ari wngwi bacha kha; nini aroni mai chánairokbo nini bagwi khẃi thon kha hai phano nwng abo mungsa saui man li ya.

⁸Subraiyung ahai hwnwi sa-o: Ang a salo Idomni elem kwrwngrokno tei Esau Hatháini sinairokno sokomor glak diba?

⁹O Teman, nini phan gwnang bororok sundru báinai, hakhe Esau hatháini bebakno tantharjak báinai.

¹⁰Nini takhuk Jakobno butharwi sátok-pitok khlaima bagwi, nwng lachimung mannai, tei mol brúmni bagwi ma kwma langnai.

¹¹Borok sini yarok rang-rí tlangma salo nwng konorwi bachaui tong kha, tei phatarsarok Jerusalemni duglamo habwi banta khlai lai phuru nwngbo bórokni bisingni borok haino wng kha.

¹²Nini takhukni birmanni salo nwng naisigwi simi tongthai tongmani ya; Judani bororok komorma salo nwng tongthokna nangmani ya; digi-sigi tongmani salo kung chugui tongna nangmani ya.

¹³Nwng ani bororok digi-sigi klaima salo bórokni duglam tẃi hap yaui tongna nangmani; Juda birman nangwi digi-sigi klai tong phuru naisigwi simi tongnairok bai baksa wngna nang ya wngmani; bini digi-sigini salo nwng bini manwi-khwnwirok sekprona nang ya wngmani.

¹⁴Bo yókna bagwi khárwi tháng phuru nwng bono lama kasu thai tongma ya; digi-sigini salo yógwi tong rwknairokno kena arirokni thani bórokno yapharwi rw thai tongmani ya.

¹⁵Tamni hwn ba Subraiyung bebak dopharokno buj thumna sal sampha kha. Nwng buino khlaima haino nwngbo abo hai khlaijaknai, nini samung khlai tẃi’-no abo nini bokhorok saka klai phinai.

¹⁶Nwng ani hathái kwtharo phegwi nungma hai nono kitingwi tongnai dopharokbo ma nungnai; bórok nungwi ma monoknai tei abo swk kwkhano bórok uáisa phano mabo ma nung ya kho.

¹⁷Tamo khe Siyon hathái-o baksa yógwi tong rwknai, tei abo kwthar wngnai; tei Jakobni bosongrok bórokni manthai hano mannai.

¹⁸Jakobni bosong khe hór hai wngnai, Josepni bosong khe hórjlai hai wngnai, tei Esauni bosong khe chwkap hai wngnai; bórok abono sógwi pái báinai tei aro Esauni bosongni khoroksa phano tong rwk glak, hwnwi Subraiyung sa-o.

¹⁹Negebo tongnairok khe Esauni hatháino mannai, Sephela-o tongnairok khe Philistiano mannai; bórok ha Ephraim tei ha Samariano mannai, Benjaminni bororok khe Giliadno mannai.

²⁰Ha Hala-o khaui tlangjaknai Israilsarok khe Phoinikiani Sarepat jora mannai; Jerusalemni buini ha Sepharado khaui tlangjaknairok khe, Negebni kamiyungno mannai.

²¹Phiyóknairok Siyon hatháini simi Esauni hathái jora bugra wngna bagwi thángnai; tei Subraiyung se bugra wngnai.