Read Kok Borok JONA 1 Bible Online

JONA 1 - Kok Borok bible

JONA 1

¹Salsa Subraiyung Amitaini bwsla Jonano hai hwnwi sa kha;

²“Bacha di, kamiyung kotor Ninobi-o thángwi chirigwi bórokno saui di; tamni hwn ba ani bwskango bórokni sumsok belai khe báng kha.”

³Tamo khe Jona bachaui Subraiyungni bwskangni khárwi Tarsis bwkhak thángna lam rw kha. Bo Jopa-o thángwi Tarsiso thángnai rungkotor khungsa manẃi kha; hakhe Subraiyungni bwskangni khárna bagwi, bo rungkotoro kaui khárwi thángnani rang rwui kasaui kha.

⁴Tamo khe Subraiyung twijlango nokbar kotor rwui rohor kha, a nokbar aswk kotor, rung kotor se báiwi kwlwk thotok wng kha.

⁵Hakhe rungkotor choknairok kirijak laiwi sak-sakni mwtairokno chuba di hwnwi chirigwi ring lai kha. Bórok rungkotor heleng rwna bagwi aroni manwirokno twijlango khiklai lai kha. Tamo khe Jona khe a jora-o rungkotor bisingni beser khotolo rokoui kaham khe thu-ui tong kha.

⁶Choknairokni bokhorok bini aro phaiwi hai hwnwi sa phai kha, “Nwng oro tamni thu-ui tong! bachaui nini mwtaino suri diba! Hakhe o mwtai chwngno khairogwi mwthangna phano tongo.”

⁷Rungkotor choknairok khoroksa tei khoroksano hai hwnwi sa lai kha, “Phai di, chwng pat karwi nai lai anw, hakhe saboni cha yani bagwi ba chwng omo hai manjak khna saui man anw.” Hakhe bórok pat kar lai khe Jonani mung manjak kha.

⁸Aphuru khe bórok bono hai hwnwi sa lai kha, “Chwngno sa di, chini saka-o tamni bagwi omo tẃi birman ba klai khna, nwng khe tamo samungrok khlai? Nwng ba bu hani? Bu dophani borok?”

⁹Jona hai hwnwi sa kha, “Ang Hibrusa se, ang Subraiyungno khulumnaisa se, hakung tei twijlangno snamnaisa chuknohani Kaitor bo se.”

¹⁰Hakhe a rungkotor choknairok teibo kirijak lai kha tei bono hai hwnwi sa lai kha, “Nwng ba tamo khlaima klai kha!” Subraiyungni bwskangni khármani kókno Jona bórokno saui khna rwma bagwi bórok saui man kha.

¹¹Aphuru khe bórok bono hai hwnwi sa kha, “Nokbar kotor mwthakna bagwi chwng nono tamo khlaiwi man?” Tamni hwn ba yang twijlangni twi aphal teibo se kirimasingcha wng rwrwgwi tong kha.

¹²Bo bórokno hai hwnwi sa kha, “Ano romwi tisaui twijlango khiklaiwi rw di; hakhe twijlang kwchang kwchang wngwi thángnai; tamni hwn khe ang kaham khe saui mano omo ani bagwi se norok abo hai nokbar kotor ma manjago.”

¹³Tamo khe choknairok rungkotorno hakung babai tlangna bagwi bórokni phan tong sak káphraui nai lai kha, tamo khe nokbar kotor teibo se báng rw rwkma bagwi kutulwi thángwi man li ya.

¹⁴Hakhe bórok Subraiyungni thani chirigwi hai hwnwi kap lai kha, “O Subraiyung, nwng o borokni langmani bagwi chwngno ta buthar ja di hwnwi chwng suri ja-o. O borok kahamno buthar rwui chwngno sumsok ta khlai rw ja di; o Subraiyung nini bagwi, nono bwkha ham rwna bagwi se, nini muchung tẃi’-no bebak khlai-o.”

¹⁵Hakhe bórok Jonano romwi twijlango khiklai rw lai kha; tei twijlangbo kwchang kwchang wngsa kha.

¹⁶Aphuru khe bororok Subraiyungno teibo kirijak kha, hakhe Subraiyungni thani ratharwi yaphar lai kha tei monnani bagwi swmairok tang lai kha.

¹⁷Tamo khe Subraiyung á kotorno Jonano monokna bagwi dagi kha; tei Jona hortham saltham áni bohogo tong kha.