Read Kok Borok JONA 4 Bible Online

JONA 4 - Kok Borok bible

JONA 4

¹Phiya ba omo bai Jona bwkha hamya wngjak kha tei belai jolijak kha.

²Hakhe bo Subraiyungno hai hwnwi suriui sa kha, “O Subraiyung! Nwng omo hai khlai anw hwnwi ang ani ha-o tong phuru ma sa ya diba? Aboni bagwi se ang swkango Tarsiso khárwi thángna bagwi ma káphra-o; tamni hwn ba ang si-o, nwng khe khairoknai Kaitor tei maya gwnang, doui thamchi tung ya, hamjakmung bai kupulung, sátoknano tẃi khe bwkha slái-o.

³Hakhe tabuk, o Subraiyung, ano butharwi pái si di, ang thangwi tongmani slái thwimani se ham kuk si-o.”

⁴Kaitor hai hwnwi sa phi kha, “Nwng jolima cha de cha ba?”

⁵Hakhe Jona kamiyungni salka phaising thángwi achugwi kha tei bo sakni bagwi tongthai kaisa snamwi aboni saklomo achugwi Ninobi-o tamo wngno hwnwi naisingwi naiwi tongwi kha.

⁶Hakhe Subraiyung Kaitor Jonano saklom kwchangdodo khlainani bagwi buphang[3] phangsa achai rw kha; hakhe Jona a buphangni bagwi belai bwkha tongthokjak kha.

⁷Teini phung aichugo khe Kaitor aro bebuma masa a buphangno uárwi sokomor thung hwnwi rohor kha.

⁸Sal kasa khe Kaitor salkabaini nokbar kutung sip rw kha, hakhe Jonani bokhorogo a sal tungmani bai bo lengpraui thwina muchungjak kha. Bo hai hwnwi sa kha, “Ang thangwi tongmani slái thwimani se ham kuk si-o.”

⁹Tamo khe Kaitor Jonano hai hwnwi sa kha, “Nwng o buphangni bagwi thamchi kasanani na de nang?” Bo hai hwnwi sa kha, “I’n ang joliui thwiwi se mano.”

¹⁰Aphuru khe Subraiyung bono hai hwnwi sa kha, “Nwng o buphangno se aswk khá súgo, omono nwng kabo kái ya, tobo tor rw ya; omo horsani horo abo achai kha tei horsani horono kobo komor kha.

¹¹Hakhe Ang Ninobino le tamni bwkha súk ya wngnai, abo bwswk se kotor, aro khorok 1,20000 bororok tongo, bórokni kaham hamya uansukna si se si ya gwja, aro aswkni musuk-toknokrok khe kwrwi diba?”