Read Kok Borok LEKHAMUNG 1 Bible Online

LEKHAMUNG 1 - Kok Borok bible

LEKHAMUNG 1

¹Israilrok ha Ijipni nongkhorwi phaimani nokha talnwini puilani salo Sinai hasing panthorni rínok bisingo Subraiyung Musino hai hwnwi sa kha,

²“Nwng Israilni bebak bororokno núkhung tei buphani bosongni bumung berem mareui bebak chwlarokno bokhorok thwgwi lekha di.

³Nokha bisiknwichi tei aboni okrarokno Israilni bebak choba-o thángwi mannaino nwng bai Aronni logisong bodol bai logisong bodol khe ma lekhanai.

⁴Bosong matheni bokhorok khoroksa khe nono chubanani ma tongnai.”

⁵Omorok’-no nono chubanairokni mung: Ruben bosongni, Sedeurni bwsla Elijur.

⁶Simion bosongni- Jurisadaini bwsajla Selumiel.

⁷Judai bosongni- Aminadabni bwsla Nason

⁸Isakar bosongni- Juarni bwsla Nethanel

⁹Jebulun bosongni- Helonni bwsla Eliab

¹⁰Josepni bwslasongni khe; Ephraim bosongni- Amihudni bwsla Elisama tei Manase bosongni- Pedajurni bwsla Gamaliel.

¹¹Benjamin bosongni- Gideonini bwsla Abidan.

¹²Dan bosongni- Amisadaini bwsla Ahiejer.

¹³Aserni bosongni- Ochranni bwsla Pagiel,

¹⁴Gadni bosongni- Deuelni bwsla Eliasap

¹⁵tei Naptali bosongni khe Enanni bwsla Ahira.

¹⁶Omorokno Israil bosongrokni bisingo chongjaknai bokhorokrok.

¹⁷Musi bai Aron o bumung khujaknai bororokno tlang kha.

¹⁸Nokha talnwini puilani salo bórok bebak lukurokno kwrẃngsa khe kuthum rwui borokrokno bosong bosong tei núkhung núkhung khe mung swi kha. Abórok bebakno nokha bisik nwichi tei aboni slái okrarokno se lekhajago.

¹⁹Subraiyung Musino dagimani hai kheno Musi Sinai hasing panthoro lekha ka.

²⁰Choba-o thángwi mannairokno naiwi nokha bisiknwichi tei aboni slái umor kwbángrokno bosong tei núkhung mareui lekha bai kha. Swkang Israilni bwsla okra Rubenni simi lekhajak gra kha:

²¹Ruben bosongrok bebagwi khorok 46,500,

²²Simionni bwsarokno bórokni bosong bai núkhungno rwgwi bebak choba-o thángwi mannai, nokha nwichi bisini slái kwbáng kuk umorni bororokno lekhamarok wng kha omo hai:

²³Simion bosongni bebagwi khorok 59,300 ká-o.

²⁴Gadni bwsarokni bosongno rwgwi núkhungni choba-o thángwi mannai, nokha bisik nwichini slái kwbáng kuk umorni bororokno lekhamarok wng kha omo hai;

²⁵Gad bosongni bebagwi khorok 45,650 ká-o

²⁶Judani bwsarokni bosongno núkhungni choba-o thángwi mannai nokha bisiknwichini slái kwbáng kuk umorni bororokno lekhamarok wng kha omo hai;

²⁷Juda bosongni bebagwi khorok 74,600 ká-o,

²⁸Isakarni bwsarokni bosongni núkhungno rwgwi nokha bisik nwichini slái kwbáng kuk umorni choba-o thángwi mannairokno lekhamarok wng kha omo hai:

²⁹Isakar bosongni bebagwi khorok 54,400 ká-o,

³⁰Jebulunni bwsarok, bórokni bosongni núkhungno rwgwi lekhamani nokha bisiknwichini slái kwbáng kuk umorni choba-o thángwi mannairok wng kha omo hai;

³¹Jebulun bosongni khe bebagwi khorok 57,400 ká-o.

³²Choba-o thángwi mannai nokha bisiknwichini slái kwbáng kuk umorni Josepni núkhungni bororok bai Ephraim núkhungni bororok wng kha omo hai;

³³Ephraim bosongni bebagwi khorok 40,500 ká-o,

³⁴Manaseni núkhung rwksaui nokha bisiknwichini slái kwbáng kuk umorni choba-o thángwi mannairokno lekhamarok wng kha omo hai;

³⁵Manaseni bebagwi khorok 32,200 ká-o.

³⁶Benjaminni bwsarokno bosongni núkhung rwgwi nokha bisiknwichini slái kwbáng kuk umorni choba-o thángwi mannairokno lekhamani wng kha omo hai;

³⁷Benjamin bosongni bebagwi khorok 35,400 ká-o.

³⁸Danni bwsarokno, bórokni bosongni núkhung rwgwi choba-o thángwi mannairokno lekhamani umor nokha bisi nwichini slái kwbáng kukrokno lekhamarok wng kha omo hai:

³⁹Dan bosongni bebagwi khorok 62,700 ká-o.

⁴⁰Aserni bwsarokno bórokni bosongni núkhung rwgwi choba-o thángwi mannai nokha bisiknwichini slái kwbáng kuk umorni bororokno lekhamarok wng kha omo hai;

⁴¹Aser bosongni bebagwi khorok 41,500 ká-o.

⁴²Naptalini bwsarokno bórokni bosongni núkhung rwgwi choba-o thángwi mannai umor nokha bisiknwichini slái kwbáng kukrokno lekhamarok wng kha omo hai:

⁴³Naptali bosongni bebagwi khorok 53,400 ká-o.

⁴⁴Omorokno wng kha Musi bai Aron Israilni tẃiphangrokno tẃiwi lekhamarok; aro bosong mathenino khoroksa khe khorokchinwi tongo.

⁴⁵Aboni bagwino bebak Israil bosongni núkhung mareuini choba-o thángwi mannai umor nokha bisiknwichini slái kwbáng kukrokno lekhajak bai kha;

⁴⁶bórok bebagwi khorok 603,550 ká-o.

⁴⁷Phiya ba Lebirok khe bórok bai pal khe lekhajak li ya.

⁴⁸Tamni hwn ba Subraiyung Musino hai hwnwi sa kha,

⁴⁹“Israilrokni bisingo Lebi bosongrokno nwng ta lekha di.

⁵⁰Hwn ba Lebirokno ani ríni nok tei aboni manwi-khwnwirokni barja chong di, bórok ríni nokno tei aroni manwirokno ma tẃinai, ma monnai tei abono kitingwi samung ma khlainai.

⁵¹Norokni bathamni kutulwi tháng phuru khe Lebirok ríni nokno ma karinai tei ríni nokno sẃng phirna hwn khe Lebirok se abono ma swngnai. Khoroksa swk aboni samo phai khe thwinai.

⁵²Israil bororok bórok sakni logisong bodolni bathamno se ma snamnai, borok mathe sak sakni bodol bai sakni bana ma songchanai.

⁵³Hwn ba Lebirok khe ríni nokno kitingwi se batham ma khanai hakhe Israil bororokni saka-o ani jolima klai ya tẃi khe Lebirok abono ma mwrwknai.”

⁵⁴Abo hai khe Israil bororok Subraiyung Musino dagimani hai khe khlai bai kha.