Read Kok Borok LEKHAMUNG 10 Bible Online

LEKHAMUNG 10 - Kok Borok bible

LEKHAMUNG 10

¹Subraiyung Musino hai hwnwi sa kha,

²“Borokno ringhorwi kwrẃngsa khe khlainani tei bathamni kuruk lainani bagwi atura bai tokjak rukphaini kainwi totro snam di.

³O totro kainwino tam khe bebak bororok Subraiyungni thani ríni nok duglamo ma kuthum bainai.

⁴Phiya ba totro uáisa’-no pung rwjak khe tẃiphangrok, Israil dophani bokhorokrok simi nini thani ma kuthum bainai.

⁵Nwng chobani totro pungmano khna khe salka bwkhak tongnairok batham ma sé lainai.

⁶Nwng chobani totrono tei uáisa pung rw phuru khe salgrabai bwkhago tongnai bathamni ma kutulnai. Nongkhornani jora phai khe o dangduno tamjaknai.

⁷Bororokno kuthum phuru khe o totrono ma tamnai hai phano dangduno khe pung rw yaui’-no ma tongnai.

⁸Aronni bwsla ochairok se totrono ma tamnai, “Omo hai khe’-no norokni kusung kusung omo raida wngwi tong sinai.

⁹Norokno kusubwi tongnai norokni arirok bai norokni ha-o choba-o tháng phuru khe chobani totro bai totrono ma tamnai. Hakhe norokni Subraiyung Kaitor bai muitu khlaijaknai tei norokno arirokni yakni phiyóknai.

¹⁰Norokni tongthokma salo tei norokni chongjak chámung pandarogo tei tal yaphango norokni sógwi yaphar phuru tei khakchangma yaphar phuru totrono ma tamnai, omo hai khe norokni Kaitorni bwskango norokno muitu khlaimani wngnai. Ang Subraiyung norokni Kaitor.”

¹¹Nokha bisiknwini talnwi talni nwichini salo rínok sakani chumui rosaui tlangjak kha.

¹²Hakhe Israil bororok Sinai hasing panthorni lam rw lai kha tei chumui hasing panthor Parano bathak phai kha.

¹³Musini khúk tẃi Subraiyung samani haino bórok omono puila lam rwui tháng lai gramani.

¹⁴Judiani bororok bórokni bathamni chúkmani tẃi logisong bodolno tẃiwi swkang tháng lai kha, bórokni logisong bodolni bokhorok wng kha. Aminadabni bwsla Nason.

¹⁵Tei Isakar bosongni bokhorok wng kha Juarni bwsla Nethanel.

¹⁶Jebulun bosongni bokhorok wng kha Helonni bwsla Eliab.

¹⁷Rínokno karijak khe Gersonni bwsarok bai Merarini bwsarok omono bal laiwi lam rw lai phi kha.

¹⁸Aboni yagul o Rubenni bororok bórokni chúkmani tẃi khe logisong bodol bai tháng lai kha bórokni bokhorok wng kha Sedeurni bwsla Elijur.

¹⁹Simion bosongni bororokni bokhorok wng kha Jurisadaini bwsla Selumiel.

²⁰Gad bosongni bororokni bokhorok wng kha Deuelni bwsla Eliasap.

²¹Hakhe Kohatsarok khe kwthar manwirok tẃi laiwi lam rw lai kha. Ríni nokno khe bórok tei kaisa bathamo sók phai ya sini swkang’-no songcha lai kha.

²²Aboni ulo khe Ephraimni bathamrok bórokni logisong bodolrok chúkma tẃi lam rw lai kha. Bórokni bokhorok wng kha Amihudni bwsla Elisama.

²³Manase bosongni bokhorok wng kha Pendajurni bwsla Gamaliel.

²⁴Benjamin bosongni bokhorok wng kha Gideonini bwsla Abidan.

²⁵Ulo bebak bathamno mwrwknai khe Danni bosongni bororok bórokni logisong bodol bai khe tháng lai kha, bórokni bokhorok wng kha Amisadaini bwsla Ahiejer.

²⁶Aser bosongni bokhorok wng kha, Ochranni bwsla Pagiel.

²⁷Naptali bosongni bokhorok wng kha Enanni bwsla Ahira.

²⁸Israil bororok omo hai khe se logisong bodol bai mareui bórok ma kutul lainai.

²⁹Musi bini bwkra Midiano tongnai Reuelni bwsla Hobabno hai hwnwi sa kha, “Chwng khe Subraiyung chwngno ‘Ang nono rwnai’ hwnma-o thángwi tongo; chini logi-o phai di, chwng norokno kaham kwrwng khe tong rw anw; tamni hwn ba Subraiyung Israilni bagwi kaham khlainai hwnwi swmai tangjak.’ ”

³⁰Tei bo bono, “I’nhi, ang tháng ya ang ani ha-o tei ani bororokni thani kiphilwi thángnai,” hwnwi sa kha.

³¹“Chwngno yakarwi ta tháng di, nono koi ja-o,” hwnwi Musi sa khe, bórok hai hwnwi sa kha, “Chwng bahai khe hasing panthoro batham khanani nang abo norok saui mano, hakhe nwng chwngno naikol ja di.

³²Nwng chwng bai pal tháng khe Subraiyung chwngno kaham khlaimani hai’-no chwngbo nono abo hai khlainai.”

³³Hakhe bórok Subraiyungni hachukni nokha salthamni lama tháng lai kha tei Subraiyungni Swmai bokhok saltham swkang swkang bórokni bagwi lengla thai rutuknani tháng kha.

³⁴Tei bórok bathamni kutulwi tháng phuru khe Subraiyungni chumui bodol salo khe bórokni saka-o tong tongo.

³⁵Swmai bokhok lam rw phuru khe Musi hai hwnwi sa kha, “O Subraiyung, bacha di, nini arirok oroi-poroi wng bai thung tei nono naislernairok nini bwskangni ma khár bai thung.”

³⁶Hakhe omo hai khe lenglaui tong phuru bo, “O Subraiyung Israilrokni thani lekha bai ya chisai-chisai khe kiphilwi phai ja di,” hwnwi sa kha.