Read Kok Borok LEKHAMUNG 11 Bible Online

LEKHAMUNG 11 - Kok Borok bible

LEKHAMUNG 11

¹Tei bororok Subraiyungni thani bórokni tekto manmani bagwi tentai lai kha, Subraiyung omorokno khwna khe jolijak kha tei bororokni bisingo Subraiyungni hór doba bachaui bathamni phatar khaksa khe khamwi pái kha.

²Hakhe bororok Musini thani chirigwi kap lai kha tei Musi Subraiyungni thani suri khe hórjlai thwiwi tháng kha.

³Aboni bagwi o thaini mung khe Tabera[1] hwnwi pharjak kha tamni hwn ba Subraiyungni hór doba bororokni bisingo kham kha.

⁴Bórokni bisingo tongnai borok hamyarok muihan chánani muchungjak bai kha tei Israil bororokbo haino hai kap laiwi hai hwnwi sa lai kha, “Chwng muihan ma chá khe se wng kha!

⁵Chwng Ijip ha-o ahai’-no árok chámani muitu mano, aroni dorompairok, mompholrok, tháichumu, piyojo, risumrok bo muitu mano.

⁶Tamo khe tabuk chini phan kwrwi kha tei oro mungsa bo manthok ya, Manna simi se wng si-o.”

⁷Manna khe khundrupui bwchlwi hai phublo-bolo bini bukur.

⁸Bororok thángwi omorokno khocha lai-o, hului wng ya khe súgwi bono twi-o rugo tei auang belep snam lai-o, omoni thokmung khe thok bai serjak auang hai.

⁹Bathamo pantwi klai phuru khe manna bo klai-o.

¹⁰Musi bebak núkhungni bororok sak sakni rínokni duglamo kap lai tong bai kha hwnwi khwna kha. Omoni bagwi Subraiyung belai jolijak kha tei Musi aro bwkha tongthokjak ya wng kha.

¹¹Musi Subraiyungno hai hwnwi sa kha, “Tamni aswk nini selengno tekto rw lang? Tamo wngwi ano ba aswk chajak li ya wng lang ba? Tei ani saka-o máng aswk bororokni barja boksinwi tong kha?

¹²Ang da o bororokno ogo chu ba? Ang da bórokno bá lang? Omoni bagwi da nwng bórokno chuchusongni thani-o o hani kókno swmai tangmani absa kwlwino buma khaklabo tẃiwi ma tongmani hai khe ano ba khaklabo tẃiwi tong thung hwnwi ba sa lang?

¹³Aswk bororokno chá rwnani bagwi ang buro muihan man sinai? Borok ani bwskango kap laiwi chwngno muihan chá rw di hwn bai kha.

¹⁴Aswk borok kwbángmani barja hilikmano ang saichung-susuk ruju-ui man li ya.

¹⁵Ang tei ani cha yano nuk ya wngna tẃi khe, nwng omo hai khlaiwi ano ton kha tei tumungno nwng ano khairok khe, dakti’-no ano butharwi pái si di.”

¹⁶Aphuru Subraiyung Musino hai hwnwi sa kha, “Nwng Israilrokni bisingo sinimani khorok snichi okra chakrarokno thumwi ani kuthum laima rínok bwskango tubu di bórok nwng bai pal kheno ma bachanai.

¹⁷Ang aro nongkhorwi phaiwi nwng bai khe kók sanai tei nini aro tongmani suarno kisa naui bórokno rwnai tei bórok nwng bai baksa barja ma tẃichrunai hakhe nwng saichung tei barja tẃina nang li ya wng sinai.

¹⁸Nwng bórokno hai hwnwi saui di, ‘Norok khwnani bagwi sak sakno kwthar khlai bai di tei norok muihan ma chá bainai; tamni hwn ba norok Subraiyungno khna rwui kap laiwi, “chwngno sabo muihan chá rw sinai? chwng Ijibo se kaham khe ma chá kukmani,” hwnwi sa lai kha. Aboni bagwi Subraiyung norokno muihan rw sinai, norok ma chá sinai.

¹⁹Norok salsa, salnwi, salba, salchi, salnwichi ma chánai o kók ya,

²⁰phiya ba nokha talsa khwrangsa supungwi se ma chánai, norokni bukung tẃi kosor ya sak tei akai yasak’-no ma chá bai sinai tamni hwn ba norokni bisingo tongnai Subraiyungno norokno sak nang ya wng bai kha tei bini bwskango kap laiwi chwng tamni ha Ijipni nongkhorwi phai laijak lang hwnwi sa lai kha.’ ”

²¹Aphuru khe Musi hai hwnwi sa kha, “Ani oro tong bainai bororok yakung bai himnai simino khorok dok-rasai ká-o tei nwng ba sa-o, ang borokno talsa khwrangsa khe muihan chá rw bainai.

²²Borokno chá rwnani bagwi mera bai musukrok da ma manthokno? eba khe bórokni bagwi twijlangni árok da manthokno?”

²³Subraiyung Musino hai hwnwi sa kha, “Subraiyungni yak ba aswk barasa de? Tabuk ang samani kók ba kubui de tatal de nwng nuk anw!”

²⁴Hakhe Musi nongkhorwi thángwi Subraiyungni kókno sa bai kha tei bo Israilni khorok snichi okra chakrarokno thum kha. Tei Kaitor bai malaima rínok bwskango bacha lai kha,

²⁵hakhe Subraiyung chumui bai khe nongkhorwi phaiwi bono sa phai kha tei bini oro tongmani suarno kisa naui khorok snichi okrarokni thani rw kha tei bórok kók diyari sa kha, aboni ulo khe tei sa li ya.

²⁶Khorok snichini bisingo khoroknwini mung khe Eldad bai Medad, bórok khoroknwino bathamo tong rwk kha. A bathamo bórokni saka-o kobol phai kha, hakhe bórokbo bathamo kók diyari sa lai kha.

²⁷Khoroksa sikla khachigwi thángwi Musino, “Eldad bai Medad khoroknwi’-no batham bisingo kók diyari sa lai tong kha,” hwnwi saui kha.

²⁸Nunni bwsla Josua bini sikla jora phuruni simi Musino chubaui tongnai tei chongwi najak, bo Musino hai hwnwi sa kha, “Ani bugra Musi, bórokno mwthak di.”

²⁹Phiya ba Musi bono, “Nwng ani wngwi bórokno risi da nang? ang nai-o Subraiyungni suarno bebak bini borokni saka-o rw lang thung tei kók diyaribo sa lai thung,” hwnwi sa kha.

³⁰Hakhe Musi bai Israilni okrarok bathamo kiphilwi tháng lai kha.

³¹Ulo Subraiyungni aroni nokbar sibwi phaiwi twiyungni tokrurokno tubu-ui bathamni samo rw phai kha, abórok hani mitar kaisa saka-o batham kitingwi babaisa salsani lama tẃi tei babaisa salsani lama chalmani jora tẃi kitingwi tong bai kha.

³²Sapung hopung teini sal jora bororok nongkhorwi tháng laiwi tokrurokno rom lai kha. Bórokni bisingo khoroksa phano, bamtwk tháibachini slái bára rom lai li ya, bórok omorokno batham kwrwngwi ton lai kha,

³³phiya ba bórok muihanrokno chá bai ya sini’-no Subraiyung bórokno belai jolijak kha, hakhe bórokno kirimasingcha bemuk bai buthar bai kha.

³⁴Aboni bagwi o thaini mung khe Kibrot-hataba hwnwi pharjak kha. Tamni hwn ba borok aro kubun chámung chána muchungnairokno phob lai kha.

³⁵Kibrot-hatabani bororok Hajerot bwkhak tháng lai phi kha. Bórok Hajerotono tong lai kha.