Read Kok Borok LEKHAMUNG 12 Bible Online

LEKHAMUNG 12 - Kok Borok bible

LEKHAMUNG 12

¹Bórok Hajeroto tong phuru Miriam bai Aron Musino hamya sa lai kha, tamni hwn ba bo Kusjwk bai káijak kha.

²Bórok hai hwnwi sa lai kha, “Subraiyung ba Musini bising tẃi simi da kók sa ba? Chini bising tẃi khe sa ya diba?” Subraiyung omorokno khna kha.

³O hayung saka-o bebak bororokni slái Musi khe belaino borok koinene.

⁴Achomsa khe Subraiyung Musi, Aron tei Miriamno, “Norok khoroktham nongkhorwi kuthum laima rí nogo phai lai di,” hwnwi sa kha. Hakhe bórok khoroktham nongkhorwi phai lai kha.

⁵Hakhe Subraiyung chumuini thong bai khe nongkhorwi rínokni duglam bwskango bacha phai kha tei Aron bai Miriamno ring kha, bórok khoroknwi’-no bwskango phai lai kha.

⁶Subraiyung hai hwnwi sa kha, “Ani kókno khna di, ‘Norokni bisingo khoroksa swk diyari tong khe ang Subraiyung baithang bo bai nukjagwi sinijaknai ang bono imango kók sanai.’

⁷Tamo khe ani seleng Musini thani khe omo hai wng ya, bo khe bebak ani nogo kók khnaui tongnai borok.

⁸Ang bo bai khe mwkhang pháng-pháng khe kók sa lai-o, kók kuthukma bai ya, srai-srai khe se sa lai-o; bo Subraiyungni sakdukno bo dak-dak khe nuk kha. Hakhe tamni norok ani seleng Musino hamya sa lainani kiri ya wng lai lang?”

⁹Hakhe Subraiyung bórokno belai jolijak kha, hakhe bórokni aroni tháng kha.

¹⁰Chumui rínokni norsajagwi tháng phuru khe aro Miriam biyadi chájak wng kha, abo kothor kwsap hai wng kha. Aron Miriamni bwkhak naisigwi nai ba, bo biyadi gwnang wng kha.

¹¹Aron Musino hai hwnwi sa kha, “O ani bugra, chwng butua wngwi sumsok khlaimani bagwi chwngno ta sátok ja si di.

¹²O bwrwino kwthwi hai khe bumani oksingni nongkhorwi phai phuruni simi kosa chájak ta khlai ja si di.”

¹³Hakhe Musi Subraiyungni thani chirigwi, “O Kaitor, ang koi ja-o, o bwrwino ham rw ja si di,” hwnwi sa kha.

¹⁴Hai phano Kaitor Musino hai hwnwi sa kha, “Bini bupha bini mwkhango khuktwi musu khe bo nokha salsni jora lachima manẃi ma tong ya da? Bo bathamni phatarni daikungo nokha salsni jora chopjagwi tong gra thung, bini yagulo bono haino hai bisingo tubujak phinai.”

¹⁵Omo hai khe Miriam bathamni phataro daikungo nokha salsni jora chopjagwi ma tong kha tei Miriamno bisingo tubu phijak ya sak jora bororok kutul lai li ya.

¹⁶Aboni yagulo bororok Hajerotno yakarwi hasing panthor Paran o batham khlai phi kha.