Read Kok Borok LEKHAMUNG 13 Bible Online

LEKHAMUNG 13 - Kok Borok bible

LEKHAMUNG 13

¹Subraiyung Musino hai hwnwi sa kha,

²“Kanan hano naichomnani bagwi borok rohor di, ang abono Israilsarokno rwnai tei bórok bebaknino bosong thwgwi khoroksa khoroksa khe tẃiphangrokno rohor di.”

³Omo hai khe Subraiyung dagimani tẃi’-no Musi Paran hasing panthorni rohor kha, bórok bebakno Israil bosongni bokhorok máng’-no.

⁴Bórokni mungrok khe omo hai: Ruben bosongni khe Jakurni bwsla Samua;

⁵Simion bosongni khe Horini bwsla Saphat

⁶Juda bosongni khe Jephuneni bwsla Kaleb

⁷Isakar bosongni khe Josepni bwsla Igal

⁸Ephraim bosongni khe Nunni bwsla Hosia

⁹Benjamin bosongni khe Raphuni bwsla Palti

¹⁰Jebulun bosongni khe Sodini bwsla Gadiel.

¹¹Manase bosongni khe (Josep) Susini bwsla Gaddi.

¹²Dan bosongni khe Gemalini bwsla Amiel;

¹³Aser bosongni khe Mikailni bwsla Sethur,

¹⁴Naptali bosongni khe Bopsini bwsla Nabi.

¹⁵Gad bosongni khe Makini bwsla Geuel.

¹⁶O bororokni mungno se Musi chongwi hano naichomwi phainani rohor bai kha. Tei Musi Nunni bwsla Hosiano Josua hwnwi mung phar kha.

¹⁷Kanan hano naichomwi phainani bagwi rohor phuru Musi bórokno sa kha; Norok o lama tẃi thángwi salgrabai bwkhak Negebo habwi di. Tei hathái kami-o thángwi kasaui di.

¹⁸Tei aroni harok bahai bo nai lai di tei aro tongnai bororok phan gwnang da, phan kwrwi da nai di, borok kwbáng da, kisa da nai di,

¹⁹tei bórok tongmani ha kaham da, hamya tei bórok tongmani kami kotorrok chokdeual kwrak rwjak da rwjak ya da nai di,

²⁰tei bórokni ha kaham da, hamya, aro buphangrok to da tong, kwrwi, norok kiri ya khe aroni bwtháirok tubu-ui phai lai di; Aphuru’-no angur thái kwtal khakmani jora.

²¹Hakhe bórok lam rwui hano huijagwi naichom laiwi salsibai bwkhak hasing panthor Sinni simi Rehob tei salgrabai Lebohamat gandar jora tháng lai kha.

²²Bórok swkang salsibai bwkhak tháng laiwi Negebo habwi Hebrono phaiwi kasa lai phai kha, aro Ahiman, Sesai tei Talmai Anakni khoroktham bwsarok tong bai-o. (Ijipni Joan kami kotorni nokha bisisni swkang Hebron tangjago).

²³Ulo bórok Uadi Eskolni harungo phai sók phai khe aroni angur bedek deksa hilikma bwthái kupulung tháiwi tongmano tanwi chwlaknwi khe balwi na lai kha tei bórok khwichang bai dalim bwtháibo tubu-ui phai lai kha.

²⁴Israil bororok angur bwchapno tansumani bagwi abono khe Eskol harung[2] hwnwi mung pharjak kha.

²⁵Nokha sal brwichi jora hano naichommani yagulo bórok kiphilwi phai lai kha.

²⁶Bórok hasing panthor Paranni Kadeso Musi, Aron tei bebak bororokni bwskango bebak kókrokno saui khna rw lai kha tei bwtháirokno bo phunuk lai kha.

²⁷Tei bórok Musino hai hwnwi sa lai kha, “Nwng rohormani ha-o chwng tháng lai kha abo dut bai piya bwtwi yorjakno tei omono aroni bwthái.

²⁸Aro ha-o tongnairok belai phan gwnang tei kamiyungrok bo chokdeual kwrak ma kotorma khe tangjak tei omorok karwi chwng Anakni bosongrokno bo aro nuk kha.

²⁹Salgrabai bwkhago khe Amalekrok tong bai-o tei hatháini kamirogo khe Hitirok, Jebusrok tei Amorni bororok tong bai-o tei Kananrok khe twijlangni samo Jordanni rukungo tong bai-o.”

³⁰Hai phano Kaleb khe Musini bwskango bororokno siringcha khlai baiwi hai hwnwi sa kha, “Phai di, chwng achomsa khe tháng laiwi a hano segwi na lainai tamni hwn ba chwng bórokno mechenwi mano.”

³¹Hai phano bo bai thángnai bororok khe, “Chwng bórokno pái glak, bórok chini slái phan gwnang kuk,” hwnwi sa kha.

³²Hakhe bórok Israilrokno naichommani hani kóktma hamya hai hwnwi sa phai kha, “O naichommani ha abo seknani belaino kutuk wngnai tamni hwn khe habo kotor tei aroni borokrokbo belai kuchuk kotor gwja máng.

³³ Chwng aro Anakni bosong phan gwnangrokno nugwi kha. Bórokni thani chwng sak sakno kukrok hai se wngjak si-o tei bórokni thani-o bo chwng omo hai’-no.”