Read Kok Borok LEKHAMUNG 16 Bible Online

LEKHAMUNG 16 - Kok Borok bible

LEKHAMUNG 16

¹Lebi bosongni Kohat, bini bwsla Isar, Isarni bwsla Kora, bo Ruben bosongni Eliabni bwsla Dathan bai Abiram tei Peletni bwsla On, gut kha laiwi,

²bórok Musini bwskango bacha lai kha tei khorok 250 Israil bororok lukurokni bokhorok, dopha bai chongjak tẃiphang kahamrokbo tongo.

³Bórok thansa wngwi Musi bai Aronno kebengwi hai hwnwi sa lai phai kha, “Norok belai hakchalo tháng lai kha! Tamni hwn ba bebak lukurok khoroksa khoroksa kwthar máng se; tei bórok bebakni bisingo Subraiyung tongo, tamni norok Subraiyungni lukurokni saka-o sakno kuchugo ma tisa lai lang?”

⁴Musi omono khwna kheno ha-o klaiwi khorok bom kha.

⁵Hakhe bo Kora tei bini bebak palsongno hai hwnwi sa kha, “Khwna phungo khe, Subraiyung sabo bini borok, sabo ba kwthar, phunuk anw tei khoroksa swk kwthar khe bini samo phaiwi mano, bo chongmani borokno bo bini samo phai rwui mano.

⁶Kora tei nini palrokno omo hai khlai lai di, Dugolrok na lai di,

⁷tei aro hokhi bogwi Subraiyungni bwskango khwna-o satrai sók lai di, aswk khe Subraiyung chongmani borokno kwthar wngnai, o Lebi bosongrok norok belai hakchalo tháng lai kha!”

⁸Musi Korano hai hwnwi sa kha, “Lebini bosongrok, tabuk khna di,

⁹Israilni Kaitor norokno Israil lukurok bai swkagwi norokno bini samo tubumani, Subraiyungni rí nogo samung khlainani tei lukurokni bwskango bachaui bórokno monnani belaino ste da wngjak tamo;

¹⁰hakhe bo nono tei Lebi bosongni bebak nini takhukrokno bini samo tubu kha, phiya ba tabuk norok ochai bu da wngna muchung?

¹¹Phiya ba nini bebak palrok kuthum laimani abo Subraiyungno kebengmani se klai-o. Tei Aron le sabo ba norok bono hunu-hanai sa lai?”

¹²“Ulo Musi Eliabni bwsarok Dathan bai Abiramno ringhornani borok rohor kha phiya ba bórok, ‘Chwng phaiwi man ya,’ hwnwi sa kha.

¹³Nwng chwngno oro hasing panthoro butharnani bagwi dut bwtwi bai piya bwtwi yorjak ha-o tubu-ui phaimani abo aswk lai te-te khe da nwng ba chong? Tei chini saka-o sak sakno bugra chánainai tong kho?

¹⁴Tei bo nwng ba chwngno dut bai piya bwtwi yorjak ha-o tu se tubu ya bla tei panthor bai angur barini habo chwngno rw li ya. Nwng ba aswk bororokni mokol da kheregwi khibi bai sinai? Chwng phaiwi man ya!”

¹⁵Aphuru khe Musi belai jolijagwi Subraiyungno hai hwnwi sa kha, “Bórokni yapharmano ta yachak di, ang bórokni yakni Koraichirka masabo na ya kho. Tei bórokno hamya khlaimanibo kwrwi kho.”

¹⁶Tei Musi korano hai hwnwi sa kha, “Nwng bai nini bebak palrok Aron bai baksa khwna Subraiyungni bwskango ma phai bainai.

¹⁷Norok bebakno khoroksa khoroksa khe dugol naui aro satrai rwui, khoroksa khoroksa khe Subraiyungni bwskango dugolno ma tubunai. Omo hai khe khorok 250 dugol ma sók phainai tei nwng bai Aron bo sakni dugol ma tubunai.”

¹⁸Hakhe bórok khorok thwgwi bini dugol na lai kha. Aro hokhi bok lai kha tei satrai bo rw laiwi Musi tei Aron bai pal khe rínok duglam bwskango bacha lai kha.

¹⁹Kora khe bini bebak lukurokno rínokni bwskango babaisa khe bacha rw bai khe bebak lukurokni thani Subraiyungni chẃngsacha phaiwi klai phai kha.

²⁰Hakhe Subraiyung Musi bai Aronno,

²¹“Norok o lukurok bai hakchal wng di, ang mukphilik kaisa bai bórokno pái rw sinai,” hwnwi sa kha.

²²Hakhe bórok ha-o pwtapsa klaiwi hai hwnwi sa lai kha, “O Kaitor, bebak mangno langma rwnai Kaitor, khoroksa borok sumsok khlai kheno da nwng bebak lukurokno joli sinai?”

²³Subraiyung Musino,

²⁴“Nwng lukurokno hai hwnwi saui di, norok Kora, Dathan tei Abiram tongmani rírokni hakchalo tháng bai di,” hwnwi sa kha.

²⁵Hakhe Musi bachaui Israilni okra chakrarok bai khe Dathan tei Abiramni thani-o tháng lai kha.

²⁶Bo lukurokno hai hwnwi saui kha, “Ang koi ja-o, norok o borok khechrarokni rínokni tháng bai di, bórokni mungsa manwino phano ta rom bai di wng ya khe bórokni sumsok bai norokbo ma komornai.”

²⁷Hakhe bórok Kora, Dathan tei Abiramni rírokni kutul lai kha. Tei Dathan bai Abiram khe bórokni bihiksong bwslasong tei chwrairok bai khe phataro nongkhorwi phai laiwi bórokni rírokni bwskango bachaui tong lai kha.

²⁸Hakhe Musi hai hwnwi sa kha, “Subraiyung ano o samungrokno khlainani bagwi rohoro, omorok ani muchungmani bai ya.

²⁹Borok kahamrok thwi tẃi’-no bórokbo thwi khe tei bebak borok tekto man tẃi’-no bórokbo tekto man khe Subraiyung ano rohormani klai ya.

³⁰Phiya ba Subraiyung mungsa swk samung kwtal khlai khe tei o ha khuaui bórokno tei bórokni bebak tong kwrwi monogwi pái khe, hakhe a bororok kwthangwi’-no Kaitorno sak nang ya wng kha hwnwi norok saui man bainai.”

³¹Musi o kókrokno sa baiwi páidrobo khe Dathan bai Abiram bachaui tongmani ha pekhogwi kuak kha.

³²Ha kuagwi bórokno, bórokni núkhungni borokno, Korani palrokno tei bórokni tong kwrwi bebakno monok bai kha.

³³Hakhe bórok tei bórokni núkhungni bebak borok kwthangwi ha bisingo klaisonwi tháng bai kha. Ha bini búkhúk gorop rw kha. Omo hai khe bórok lukurokni bisingni kwmaui tháng bai kha.

³⁴Bórokni chirikma khorang khnama bagwi babaibrwini bebak Israilsarok, “Chwngbo ha bai monogwi páijaknai kha!” hwnwi khárwi tháng bai kha.

³⁵Tei Subraiyungni aroni hór doba klai phaiwi satrai motom sóknai khorok 250 bororokno khampra rwui pái bai kha.

³⁶Aboni yagulo Subraiyung Musino hai hwnwi sa kha,

³⁷“Nwng ochai Aronni bwsla Eliasarno hórjlaini dugolrokno kariui narwk di hwnwi sa di, aroni hokhino hakchalo sarwi rw di, tamni hwn ba dugolrok khe kwthar se.

³⁸Bórokni sumsokni bagwi butharjak bainairokni dugolrokno naui tokcherebwi háyáno kholopjaknai snamjak si thung. Tamni hwn ba bórokni abórok Subraiyungni thani yapharjak tei kwthar máng se. Omo hai khe Israil bororokni thani khoraimani mari wngwi tong si thung.”

³⁹Hakhe ochai Eliasar khamnairok yapharmani dugolrokno thumwi abórokno togwi háyá thuklupjaknai mairang snam kha.

⁴⁰Omo Israil bororokni muitu narwkjaknai wng kha, tamni hwn khe Aronni achaimani bosongno karwi tei khoroksa phano Subraiyungni bwskango satrai sóknani hwnwi ta phai thung, wng ya khe Kora tei bini palrok hai wngnai, Subraiyung Musini khúk tẃi khe sa kha.

⁴¹Phiya ba teini salo Israilni bebak lukurok Musi bai Aronno, “Norok Kaitorni bororokno buthar kha,” hwnwi hunu-hanai sa lai kha.

⁴²Lukurok Musi bai Aronno hunu-hanai sa laiwi kuthum lai tong khe bórok rínok bwkhak nahar lai kha, aro chumui kobol phai kha tei Subraiyungni chẃngsacha nukjak kha.

⁴³Hakhe Musi bai Aron rínok bwskango phai lai kha.

⁴⁴Subraiyung Musino,

⁴⁵“Norok o lukurokni aroni kutulwi tháng lai di, ang muphlik kaisa-o bórokno sokomor sinai,” hwnwi sa kha. Hakhe bórokni mwkhang ha-o pwtapsa khe bom lai kha.

⁴⁶Musi Aronno hai hwnwi sa kha, “Nini dugolno naui háyá-o hokhi tonmano bogwi, aro satrai rwui, dakti khe lukurokni thani tlang gra di, bórokno sumsok súcha bai gra di, tamni hwn ba Subraiyungni aroni jolima nongkhor kha, bok nangna cheng kha.”

⁴⁷Hakhe Aron Musi sama hai’-no abono tlangwi lukurokni thani khachigwi tháng kha, hai phano nai di, bok nangmani chengwi se pái kha tei bo satrai rwui bororokni sumsok súchanani samung khlai kha.

⁴⁸Bo kwthwirok bai kwthangrokni kwcharo bacha kha, hakhe bok thagwi tháng kha.

⁴⁹Tabuk bok bai thwinairok bebagwi khorok 14,700 wng kha. (Kora deraui thwi baimarokno karwi.)

⁵⁰Bok nangmani thak khe Aron rínok duglamo Musini aro kiphilwi tháng kha.