Read Kok Borok LEKHAMUNG 17 Bible Online

LEKHAMUNG 17 - Kok Borok bible

LEKHAMUNG 17

¹Subraiyung Musino hai hwnwi sa kha,

²“Israilrokno sa di tei bórokni aroni chinwi raidang na di, bosong thwgwi tẃiphangni aro kongsa kongsa khe kongchinwi raidang thum di, raidang naui bini bumung swi rw di,

³tei Lebini raidango khe Aronni mung swi di, tamni hwn ba khoroksa bosongni tẃiphangni kongsa khe raidang ma tongnai.

⁴Hakhe kuthum laima rínok bai malaimani jidolo, Swmai bokhok bwskango, nwng omorokno ton di.

⁵Yagulo khe omo hai wngnai, ang chongmani borokni raidang rotomsanai, omo hai khe Israilsarokni bisingni hunu-hanai sa laimano mwthaknai.”

⁶Musi Israil bororokno sa bai khe, bórokni bebak ojamarok raidangrokno bórokni bosong thwgwi raidang kongsa khoroksa ojamani wngwi raidang kongchinwi rw phai bai kha, aboni bisingo Aronni raidangbo tongo.

⁷Hakhe Musi raidangrokno naui rí nogo Subraiyungni swmai bokhok bwskango ton rw kha.

⁸Teini salo Musi kuthumma rínok bisingo habwi khe Lebi bosongni Aronni raidang rotomwi bwkhrwirok wngwi, bubar barwi, badam bwthái tháiwi tongmani nuk kha.

⁹Hakhe Musi Subraiyungni bwskangni bebak raidangrokno kariui bebak Israil bororokni thani-o tubu-ui phai kha tei bórok nai laiwi bebakno sak sakni raidangno na lai kha.

¹⁰Tei Subraiyung Musino, “Nwng Aronni raidangno haino hai swmai bokhok bwskango ton rw phi si di, omo kebengnairokni mari khe tonjak si thung. Omo bai khe bórok ano hunu-hanai sa laimani nwng mwthak si di, wng ya khe bórok thwi bainai kha,” hwnwi sa kha.

¹¹Musi Subraiyung dagimani hai khe’-no khlai bai kha.

¹²Israil bororok Musino hai hwnwi sa lai kha, “Nai di, chwng thwi kha! Chwng kwma kha bebak kwma bai kha.

¹³Subraiyungni rínokni samo phainai borok bo’-no ma thwinai, chwng omo hai kheno da bebak’-no ma thwi bai sinai?”