Read Kok Borok LEKHAMUNG 18 Bible Online

LEKHAMUNG 18 - Kok Borok bible

LEKHAMUNG 18

¹Hakhe Subraiyung Aronno hai hwnwi sa kha, “Nwng bai nini bwsarok tei nini bosongrok nwng bai baksa ani nok kwtharno tẃiwi majrano ma ruju bainai tei nwng bai nini bwsarok nwng bai baksa ochaini samungni majranobo ma ruju bainai.

²Tei nini takhukrok, nini sandai masa tei Lebi bosongrokno nwng bai baksa nini samungo tangchru phai bai thung, nwng bai nini bwsarok khe Swmai bokhok bwskango ma tangnai.

³Bórok nono ma nainai tei rínokni bebak samungno ma khlai bainai phiya ba bórok aroni kwthar manwirokni eba háyáni samo ma phai glak wng ya khe bórokbo thwi bainai tei nwngbo ma thwinai.

⁴Bórok nwng bai pal khe rínogo ma phai bainai tei aroni bebak samungrokno ma khlai bainai. Phiya ba khoroksa phano nini samo ma phai glak.

⁵Israilsarokni saka-o tei jolima sók phai a tẃi khe, nwng háyá kwtharni samungno ma khlainai;

⁶tei nai di, Israil bororokni bisingo Lebi bosongni, nini takhukrokno sauina kha, Bórok nini bagwi hili hai khe kuthum laimani rínogo samung khlainani bagwi Subraiyungno yapharjak kha.

⁷Aboni bagwi nwng tei nwng bai baksa nini bwsarokno bebak háyá-o tei aroni rínok bisingo ochaini samung ma tang bainai, ang hili hai khe ochaini samungno norokni thani-o yaphar kha, kubun khoroksa swk samo phai khe o borok ma thwinai.”

⁸Hakhe Subraiyung Aronno hai hwnwi sa kha, “Nai di, ano yapharmani bebak kwthar manwirokno tei Israil bororok yapharmarokno ang nono rw kha. Ang nono tei nini bwsarokno mol brúmni bagwi banta manthai khe rw kha.

⁹Hór bai sókjak ya khe narwkjak kwthar kuk yapharjakrok nini wngnai, ani bagwi kwthar kuk manwi yapharmani bisingo, bórokni bwthái bwchlwi yapharmung, sumsokni yapharmung, deramani yapharmungrok nini tei nini bwsarokni wngnai.

¹⁰Omono belai kwthar hwnwi nwng ma chánai, chwla borok mathe omono ma chánai, nwng omono kwthar hwnwi ma chongnai.

¹¹“Israil bororok hili yapharmani abo nini wngnai, ang omorokno nono, nini bwsarokno tei nini sajwkrokno rw kha, nini núkhungo kwthar bororok omono chá si thung.

¹²“Subraiyungno bórokni thok kaham kuk, arak kwprap kuk tei bwthái tháikra bwchlwirok hwnwi yaphar baimani bebakno ang nono rw kha.

¹³Bórokni ha-o bebak thái swkang bwthái thumwi Subraiyungni thani tubu baimarok nini máng wngnai. Nini núkhungo borok kwthar omono chá si thung.

¹⁴“Israilrokni bisingo yapharjakmani bebakno nini wngnai.

¹⁵“Borok phano tei mal-mata phano swkang achaiwi Subraiyungni thani yapharjakmani omo nini wngnai. Hwn ba swkang achainai borok bwsano khe nwng rang bai yakarwi ma rohornai tei kwthar ya swkangni mal-matani bwsanobo rang bai phiyógwi ma rohornai.

¹⁶Bórok talsa ká bai khe nwng rang naui yakarwi ma rohornai, omo rang chongmani háyá kwtharni chongjak nwichi gera bai baksa rukphaini sekel kaiba ma wngthai.

¹⁷Phiya ba nwng swkang achainai musuk, mera tei punrokno rang bai ma rohor ya, tamni hwn ba oborok kwthar máng se. Abórokni thẃino háyá saka-o sarchaui rw di, Subraiyungni thani satrai motom sógwi yapharmani hai khe buphamno hóro sók di.

¹⁸Abórokni khája bai yagra bwkhakni biyarok nini wngma hai bahanrokbo nini’-no wngnai.

¹⁹“Israil bororok Subraiyungni thani bebak kwthar manwi yapharmarokno ang nono, tei nini sajwk-sajlarokno rw kha. Omono mol brúmni manthai khlaiwi rw kha. Omo Subraiyungni mokolo nini tei nini bosongni bagwi kaisa mol brúmni swbaiwi man ya swmai wngnai.”

²⁰Hakhe Subraiyung Aronno, “Nwng bórokni ha-o ha banta man glak tei nwng bórokni aro mungsa manthai tong glak, Israil bororokni bisingo ang se nini banta, ang se nono manthai rwnai,” hwnwi sa kha.

²¹“Lebirokno khe bórok kuthumma rí nogo samung khlaimani bagwi bebak Israilrokni chi-o kaisano ang rw bai kha.

²²Tabukni simi Israil bororok sakni sumsok ruju-ui ma thwi bai ya tẃi khe bórok kuthumma rínokni samo ta phai bai si thung.

²³Hwn ba Lebirok khe kuthumma rínogo samung ma khlai bainai tei bórok sak sakni sumsokno ma rujunai. Omono norokni bagwi kusung kusungni wng sinai. Israil bororokni bisingo bórokni baithangni hwnwi mungsa tong glak.

²⁴Tamni hwn ba Israil bororok Subraiyungni thani yapharmani chi-o kaisano ang Lebirokno rw kha, bórok tei mungsa man glak hwnwi ang bórokno sa kha.”

²⁵Subraiyung Musino hai hwnwi sa kha,

²⁶phiya nwng Lebirokno hai hwnwi sa bai di, “Ang norokno Israil bororokni aroni chi-o kaisa rwmano norok na phuru khe, Subraiyungni thani aroni chi-o kaisani, chi-o kaisa yaphar phi di.

²⁷Norokni yapharmarokno bo tangwi chánairok bórokni habani kwtal bwthái bwchlwi tei angur bwtwi kwtal yaphar gramani hai kheno chongjaknai,

²⁸Omo hai khe norokbo Israil bororokni chi-o kaisano yachakmani, aroni Subraiyungni thani o yapharwi, Aron ochaino ma yapharnai.

²⁹Norokno bebak hili rwjakmani, aroni kaham kukno Subraiyungno yaphar phi di.

³⁰Aboni bagwi nwng bórokno sa bai di, ‘Norok kaham kukno yaphar bai khe habani thái kwtal tei angur bwtwi kwtal yapharma hai norokni wngnai,’

³¹Nwng bai nini núkhungni bororok bebago’-no omorokno cháui mannai. Tamni hwn ba kuthumma rí nogo samung tangmani omo nini manthai.

³²Tei aroni kaham kukno yaphar bai khe norokni sumsokno ma ruju glak, hakhe Israilrok kwthar manwi yapharmabo dera li ya tei nwngbo thwi li ya.”