Read Kok Borok LEKHAMUNG 19 Bible Online

LEKHAMUNG 19 - Kok Borok bible

LEKHAMUNG 19

¹Subraiyung Musi bai Aronno hai hwnwi sa kha,

²Subraiyungni kerongo dagimani khe omo hai se, Israil bororokno Musuk kwchak beres masa khait kwrwi, uáisa phano jual bokjak ya khono norokni thani-o tubu di hwnwi sa di,

³tei norok khe musukno Eliasar ochaino rw di, bo o musukno bathamni phataro tlangwi bini bwskango ma ratharnai.

⁴Tei Eliasar ochai omoni thẃino bini yasi bai naui kuthumma rínok bwskango úaisni sarchaui ma rwnai,

⁵o musukno bini bwskango bukur, bahan, bwthẃi tei bikhirokno hóro sógwi ma páinai.

⁶Ulo Ochai sidar buphang, hisop tei khul kwchak naui musukno sógwi tongmani a hóro khichonwi ma rwnai.

⁷Hakhe ochai bini ríno sú baiwi, twi tukunai, yagulo bathamo phai phinai, hai phano ochai sanja jora sak kusum wngwi tongnai.

⁸Musuk sóknai borok bo bini rírokno ma sú bainai tei twi ma tukunai tei sanja jora bo sak kusum wngwi ma tongnai.

⁹Ulo khoroksa swk kwthar borok musukni thaplano thumwi bathamni phataro kwrẃngsa kwthar jidolo ma tonnai, omo Israil lukurokno twi bai súchanani tei sumsok swkaknani bagwi se.

¹⁰Tei musukni thaplano thumnai borok bini rírokno ma sú bainai tei sanja jora sak kusum wngwi ma tongnai. Omo wng kha Israil bororok bai bórokni bisingo tongnai phatarsa borokni mol brúmni bagwi kerong wngnai.

¹¹Khoroksa swk borok kwthwini mangno rom khe bo nokha sal sini jora sak kusum wngwi ma tongnai;

¹²bo nokha salthamni salo eba salsnini salo twi bai sakno kwthar ma khlainai, hakhe bo kwthar wngnai phiya ba bo nokha salthamni salo eba salsnini salo sakno kwthar khlai ya wng khe bo tei kwthar wng li ya,

¹³khoroksa swk borok kwthwini mangno romwi sakno kwthar khlai ya wng khe Subraiyungni rínokno sum rwmani klai-o, o borokno Israilrokni bisingni norwi rohorjaknai tamni hwn ba súchama twi bai bono sarjak li ya, bini sak kwthar wng ya kho, sak kusum bini sago’-no tong kho.

¹⁴Khoroksa swk borok rínok bisingo thwi khe, bebak aro hapnai bororok nokha salsni jora sak kusum wngwi ma tongnai.

¹⁵Tei phiyókjak manwirokbo thuklupjak ya wng khe kusum wng bainai.

¹⁶Khoroksa swk borok panthoro seng bai tanjaknaino eba kwthwi mangno eba borok bekrengno eba khe simalwngno romnai borok bo nokha salsni jora sak kusum wngwi ma tongnai.

¹⁷Lukurok o sak kusum borokni bagwi sumsokni sógwi yapharmani thaplano kaisa manwi-o tonwi aro twi kwtal lu di.

¹⁸Hakhe kwthar borok khoroksa phaiwi kaisa hisop bedekno naui, abono twi-o chomsaui rínogo, aroni bebak manwirogo tei aro tong bainai bororokni saka-o bekreng romnai borokni saka-o, eba borok kwthwini saka-o, eba simalwngo sarwi ma rw bainai;

¹⁹borok kwthar nokha saltham eba salsnini salo sak kusum borokni saka-o twi sarchaui rwnai, omo hai khe nokha salsnini salo bono kwthar khlainai, bo bini rírokno sú baiwi twi tuku-ui sanja jora-o khe bo kwthar wng sinai.

²⁰Phiya ba sak kusum borok bo sakno súcha ya khe, bo lukurokni bisingni swkagwi rohorjak sinai tamni hwn ba bo Subraiyungni kwthar thaino sum rw kha. Tei súchamani twi bai saka-o sarjak liyani bagwi bo kwthar wng li ya.

²¹Omono bórokni bagwi tong suknai kerong wng sinai, súchamani twino sarchanai borok bo bini rírokno ma sú bainai tei o súchamani twino romnai borok bo sanja jora sak kusum khe ma tongnai.

²²Sak kusum borok rommani manwirok kusum wngnai tei o kusum manwino romnai borok bo sanja jora sak kusum khe ma tongnai.