Read Kok Borok LEKHAMUNG 21 Bible Online

LEKHAMUNG 21 - Kok Borok bible

LEKHAMUNG 21

¹Kanan bosongni, Negebo tongnai Aradni habugra Israilrok Atharimni lama tẃi phaiwi tong kha hwnwi khna khe Israilrok bai choba nang laiwi baksa borokno romwi tlang bai kha.

²Israilrok Subraiyungni thani swmai tangwi, “Nwng o bororokno chini thani yaphar khe chwng bórokni kamiyungrokno sokomor súgwi rw bainai,” hwnwi sa lai kha.

³Hakhe Subraiyung Israilrokni khorangno khnaui Kananrokno yapharwi rw bai kha, bórokno tei bórokni kamiyungrokno sokomor súgwi pái bai kha, hakhe aroni mungno Horma[4] hwnwi pharjak kha.

⁴Bórok Hor hachukni kutulwi Idom ha-o tháng lainani bagwi Twijlang Kwchak tẃi lam rw lai kha tei bororok lama-o sak soiwi man ya wng bai kha.

⁵Hakhe bororok Kaitorno tei Musino, “Tamni chwngno hasing panthoro butharnani bagwi ha Ijipni tubu-ui ma phai? Oro maibo kwrwi twibo kwrwi! Aswk thokyama chámungno cháui leng lai súk kha,” hwnwi hamya sa lai kha.

⁶Hakhe Subraiyung bororokni bisingo kirimasingcha chibukrokno rohor kha, O chibukrok kwbángma Israilrokni bororokno sugui buthar bai kha.

⁷Aphuru bororok Musini thani phaiwi hai hwnwi sa lai kha, “Chwng Subraiyungno tei nono hamya saui sumsok khlai kha, tabuk nwng o chibukrokno norwi tlang ja di hwnwi Subraiyungni thani suri san gra di.” Hakhe Musi bororokni bagwi suri san kha.

⁸Subraiyung Musino, “Nwng kirimasingcha chibuk masa snamwi buphangni thong buchugo khachiui rw di, khoroksa swk chibuk bai sukjak phuru khe bo omono nahar khe bo thang sinai,” hwnwi sa kha.

⁹Hakhe Musi pitolni chibuk masa snamwi thongo khe khachiui rw kha, khoroksa swk chibuk bai sukjagwi o chibukno naisanai borok bo thang kha.

¹⁰Aboni yagulo Israil bororok kutul laiwi Oboto batham kha lai phai kha.

¹¹Bórok Obotni lam rwui sal pamani bwkhak Moab bai mwkhang nahar laijak hasing panthor Iye-abarimo batham kha lai kha.

¹²Aroni bórok kutulwi Jered harungo batham kha lai phi kha.

¹³Aronibo bórok kutul phirwi Amorsarokni ha bai kwrwngwi thángjak hasing panthor Arnonni tei babaisa bwkhago batham khlai kha, Arnon khe Moabni ha ari, Moab bai Amorni kwcharo klai-o.

¹⁴Aboni bagwi Subraiyungni choba bijabo omo hai khe swijak se tongo, “Suphani bisingo Uaheb tei Arnon harung,

¹⁵Tei harungrokni ha Ar kami kotor jora lokhlaijak, Moabni ha ari jora kwrwngjak.”

¹⁶Aroni khe bórok Bir, twikhor tongmani ha-o sók phai lai kha. O twikhorni kókno’-no Subraiyung Musino hai hwnwi samani, “Bororokno kwrẃngsa khlai di ang bórokno twi rw anw.”

¹⁷Aphuru’-no Israilrok omo hai khe rwchap lai kha, “O twikhor, twimuk phai si di, hakhe chwng rwchap lai anw.

¹⁸Habugrani bwslasongni khurmani twikhor, bórokni tẃiphangrok bai habugrani raidang bai tei manwirok naui raidang bai khurjaknai.” Bórok hasing panthorni khe Matana-o tháng lai phi kha.

¹⁹Matanani khe Nahaliel o tei Nahalielni khe Bamoto,

²⁰Bamotni khe Moab amchoini harungo, omo Pisga hachuk o hasing panthor naikhlaimani-o sók phai lai kha.

²¹Hakhe Israil tẃitun rohorwi Amorni habugra Sihonno hai hwnwi sa hor kha,

²²“Nini ha kwchar tẃi láiwi thángna rw ja di, chwng lama kotorno yakarwi panthoro eba angur bari-o hap ya, twikhorni twirokno bo nung lai ya, nini hani ari lái tháng bai ya sak chwng habugrani lama kotor saka tẃi simi tháng lai anw.”

²³Hai phano Sihon bini ha kwchar tẃi Israilno lái thángnani rw li ya. Bo bini bororokno thumwi hasing panthor Jahaso thángwi Israilrok bai choba nang lai kha.

²⁴Aphuru khe Israil bono seng bai tanwi Arnonni simi Jabok jora teibo Ammonsarokni[5] ha jora bini hano segwi na lai kha, tamni hwn ba Ammonsarokni ha ari jora kwrak khe naichom rwui tonjak.

²⁵Israil bebak kamiyungrokno na bai kha tei Israilrok Amorrokni bebak Hesbonni kamiyungrok tei aroni bebak kamirogo achuk lai kha.

²⁶Tamni hwn khe Hesbon khe Amorni habugra Sihonni kamiyung tongmani, bo Moab hani swkangni habugra tongma bai choba nang laiwi bini yakni Arnon ha jora bebak bini hano segwi na kha.

²⁷Aboni bagwi kóktang swi kwrwngrok swiwi hai hwnwi rwchap kha; “Phai di, Hesbonno tang lai phai anw, Sihonni kamiyungno songcha lai anw,

²⁸Tamni hwn ba Hesbonni simi hórjlai Sihon kamiyungni hór doba nongkhorwi tháng kha. Omo Moab hani Arno, tei Arnonni hathái kuchuk bochlongo khampra rw bai kha,

²⁹Moabo tongnairok, norokni bwswk kirimasingcha wng kha! Kemos mwtaini bororok, norok sokomorjak bai kha. Bini bwsarokno khárjak tei bwsajwksongno khachopjak hai khe Amorni habugra Sihonno yaphar bai kha.

³⁰Hakhe bórokni bosongrok Hesbonni[6] simi Dibon jora sokomorjak bai kha, tei chwng Nophani Medeba[7] jora sókchaui pái bai kha.”

³¹Omo hai khe Israil Amorrokni ha-o tong lai kha.

³²Ulo Musi Jaser hano naui páinani bórok rohor kha tei bórok aroni kamirokno, Amorrokni yakni bebak segwi na baiwi yak bukcha khe rw bai kha.

³³Hakhe bórok uphilwi Basanni lama tẃi khe tháng lai kha tei Basanni habugra Og bini bebak sengkrakrokno thumwi Edrei-o choba nang lainani nongkhorwi tháng lai kha.

³⁴Hai phano Subraiyung Musino hai hwnwi sa kha, “Nwng bono ta kiri di, ang bono bini bororokno, bini hano nini yago yaphar kha; Hesbonno tongnai Amorni habugra Sihonno khlaimani haino nwng bono bo khlai di.”

³⁵Hakhe borok bono, bini bwsarokno bini bororokno, khoroksano phano karjak ya tẃi khe bebakno buthar bai kha bórok bini hano na lai kha.