Read Kok Borok LEKHAMUNG 25 Bible Online

LEKHAMUNG 25 - Kok Borok bible

LEKHAMUNG 25

¹Israilrok Sitimo tong lai phuru khe Moabni bwrwirok bai thu lai-chá lai wng lai kha.

²O bwrwirok bórokni mwtai-o barokmarogo kobogwi tlang kha tei bórok bai baksa chá lai kha tei bórokni mwtairoknobo khulum lai kha.

³Hakhe Israilrok Peoro Bal mwtaino khulummani-o dai lai kha, aboni bagwino Subraiyung Israilrokno belai khe jolijak kha.

⁴Subraiyung Musino, “Nwng Israilrokni tẃiphangrokno tlangwi satung kwprapma-o bórokno Subraiyungni bwskango khachiui rwui di. Hakhe Subraiyung Israilrokno jolima ham anw,” hwnwi sa kha.

⁵Hakhe Musi Israilrokni buj thumnairokno, “Norok bebakno Peoro Bal mwtaino khulumui jual thansa wngnairokno ma buthar bainai,” hwnwi sa kha.

⁶Nai di, Israilni khoroksa borok, Midianni bwrwi khoroksano bini núkhungo Musini bwskango tei bebak Israil bororokni bwskango tubu-ui phai kha. Bórok Subraiyung bai malaimani rínok bwskango kap lai tong phuru khe

⁷Eliasarni bwsla Phinehas, ochai Aronni busuk bono nuk khe bororokni aroni kutulwi thángwi koslu kolokma yago naui,

⁸Israil tongmani rínok khotol bisingo habwi tháng kha. Tei koslu bai khe bórok khoroknwino yórtharwi pái kha. Omo hai kheno Israilrokni bisingo bok sók phaimani thagwi pái kha.

⁹Hai phano aphuru bok bai khe khorok 24,000 bororok thwiwi pái bai kha,

¹⁰Subraiyung Musino hai hwnwi sa kha,

¹¹“Ochai Aronni busuk Eliasarni bwsla Phinehas Israilrokni saka-o ani jolimano ham rw kha, bo ani slái tei bo risi gwnang wng kha, hakhe ang Israilrokno joliui sokomor li ya.

¹²Aboni bagwi nwng o kókno hai hwnwi saui di, ‘Nai di, ang bono khakchangmani kók khaui ma rw kha.

¹³Omo bini sak tei bini bosongrokni bagwi mol brúm ochai wngnai, tamni hwn ba bo bini Kaitorni wngwi risi gwnang wng kha tei Israilrokno nakarwi rw kha.’ ”

¹⁴Israilni borok khoroksa Midianni bwrwi khoroksa bai butharjaknaini mung wng kha Salu, bo Simrini bwsla Simion bosongni bokhorok.

¹⁵A Midianni bwrwi khoroksa butharjaknaini mung wng kha Kosbi, bo Surni bwsajwk, Sur Midian bosongni khoroksa bokhorok tongmani.

¹⁶Subraiyung Musino hai hwnwi sa kha,

¹⁷“Midiansarokno tekto rwui buthar bai di.

¹⁸tamni hwn ba bórok norokno Peorno tẃiwi hamya bai phemlok kha tei bórokni hanok Kosbi, Midiano tongnairokni bokhorokni bwsajwk Peor bok kwphaui ma thwi kha.”