Read Kok Borok LEKHAMUNG 27 Bible Online

LEKHAMUNG 27 - Kok Borok bible

LEKHAMUNG 27

¹Yagulo khe Selophehad swkangwi phai kha. Selophehad khe Hepherni bwsla, Hepher khe Giliadni bwsla, Giliad khe Makirni bwsla, Makir khe Manaseni bwsla, Manase khe Josepni bwsla, bórok Manase bosongni. Bini bwsajwksongni mung wng kha: Mala, Noa, Hogla, Milka tei Tirja.

²Bórok bebak Musini bwskango tei Eliasar ochaini bwskango tei tẃiphangrokni bwskango tei bebak Israil lukurokni bwskango Subraiyung bai malaimani rínokni duglam bwskango bacha laiwi hai hwnwi sa lai kha,

³“Chini apha hasing panthoro thwi kha. Bo Subraiyungno kebengwi bacha lainai Korani bodolo khopjak ya ba, bo bini sumsok bai’-no ma thwi kha tei bini khoroksa phano bwslasong kwrwi.

⁴Bini bwsarok khoroksa phano kwrwi hwnwi ba bini mungno dopharokni swkwmaui páinani klai lang ba? Chini aphani takhukrokni bisingo chwngnobo ha banta khe rw di.”

⁵Musi bórokni kókno Subraiyungni bwskango tubu kha.

⁶Tei Subraiyung Musino hai hwnwi sa kha,

⁷“Selophehadni bwsajwksongrok sói’-no sa kha. Tei nwng bórokni buphani takhukrokni bisingo ha banta khe bórokno rw bai di, buphani manthaino bwsajwksongno rwjak thung.

⁸Nwng Israil bororokno hai hwnwi sa di, ‘Khoroksa swk borok, bwsa chwla khoroksa phano man ya khe thwiwi tháng khe bini bwsajwksong bini ha banta manthaino mannai.

⁹Bini bwsa bwrwi phano kwrwi hwn khe nwng bini ha manthaino bini takhukrokno rw di.

¹⁰Bini takhukrok bo kwrwi hwn khe aswk khe nwng bini ha manthaino bini buphani takhukrokno rw di.

¹¹Bini buphani takhukrok kwrwi hwn khe, hakhe nwng bini ha manthaino bini núkhungni gana kuk sandairokno rw di tei bo omono mannai. Omo tẃi kheno Subraiyung Musino dagimani Israil lukurokni bagwi kerong wngwi tong sinai.’ ”

¹²Subraiyung Musino I’n hwnwi sa kha, “Nwng Abarim hachugo kasaui tháng di tei ang Israil bororokno yapharmani hano naharwi di.

¹³Nwng abono nai bai khe, nini takhuk Aron thwimani hai khe nwngbo ma thwi sinai,

¹⁴tamni hwn ba norok khoroknwnwino hasing panthor Sino ani dagimungno kebéng kha. Bebak lukurok Meriba-o twini bagwi ano kebéngwi tentai lai phuru bórokni bwskango nwng ani phan kwtharno bórom khlai li ya.” (Meriba khe Kadesni twimuk abo Sin hasing panthoro.)

¹⁵Musi Subraiyungno hai hwnwi sa kha,

¹⁶“Subraiyung Kaitor, bebak langmani nokphang, ang koi ja-o, lukurokni saka-o khoroksa borokno chongwi rw di,

¹⁷o borok, bórokni bwskango phataro thángwi mannai tei bórokno phataro tlangwi mannai tei bisingo tubu-ui mannai, hwn ba Subraiyungni bororok mera mwrwknai kwrwi mera bodol hai ta wng si thung.”

¹⁸Hakhe Subraiyung Musino hai hwnwi sa kha, “Nunni bwsla Josua phola bai tẃiduljak, nwng bono tubu-ui bini bokhorok saka-o yak bera di.

¹⁹Eliasar ochai tei bebak lukurokni bwskango bono bacha rwui bórokni mokol bwskango nini yak bai khúk bai yaphar di.

²⁰Hakhe bebak Israil lukurok bini kókno khna baina tẃi khe nini phanno bonobo yaphar di.

²¹Hakhe bo Eliasar ochaini bwskango bachanai tei Eliasar bini wngwi Subraiyungni bwskango Urim bai pat kar rwui Subraiyungni muchungmani tamo abo nai anw, bini kók tẃi khe bo tei bebak lukurok phataro tháng lai anw tei bisingo hap phai lai anw.”

²²Musi, Subraiyung bono dagimani haino khlai bai kha, bo Josuano tubu-ui Eliasar ochai tei bebak lukurokni bwskango bacha rw kha.

²³tei bo bini bokhorok saka-o yak beraui Subraiyung samani tẃi’-no yak bai khúk bai yapharwi rw kha.