Read Kok Borok LEKHAMUNG 3 Bible Online

LEKHAMUNG 3 - Kok Borok bible

LEKHAMUNG 3

¹Sinai hathái-o Subraiyung Musi bai kók sa laima jora-o Aron bai Musini núkhungni bororok wng kha omo hai.

²Omorok khe Aronni bwsarokni mungrok, okra kuk khe Nadab tei Abihu, Eliasar tei Ithamar.

³Bórokno Aronni bwslasong, ochaini bagwi thok phulwi chongjak tei ochaini samung tang barja yapharjak.

⁴Phiya ba Nadab bai Abihu khe Sinai hasing panthoro Subraiyungni thani kwthar ya abo tẃino hóro sógwi yapharmani bagwi thwi kha. Bórokni bwsa-bẃtẃirok kwrwi gwja. Hakhe Eliasar bai Ithamar kwthang tongsak’-no ochaini samung tang lang kha.

⁵Subraiyung Musino hai hwnwi sa kha,

⁶“Lebini bosongrokno Aron ochaino monwi manna tẃi khe bórokno bini thani-o tubu di.

⁷Bórok rínokni samung tangthai tongmarokno tangnai tei bórok ochairokni tei bebak lukurokni bagwi ma tangnai.

⁸Bórok ríni nokni bebak manwirokni barja ma nanai tei bebak Israilrokni bagwi samung ma tangnai.

⁹Nwng Lebirokno Aron bai bwsarokni thani ma yapharnai, Israilrokni bisingo bórokno monnani bagwi barja yapharjak kha.

¹⁰Nwng Aron bai bini bwslasongno ochaini samung khlaina bagwi ma chongnai, phiya ba khoroksa swk o samungno khlaina nai khe bo butharjaknai.”

¹¹Subraiyung Musino hai hwnwi sa kha,

¹²“Nai di, ang Israilrokni bisingni bebak bwsa okrano karwibo Lebirokno na kha, tabuk bórok ani wng bainai.

¹³Ha Ijibo ang bwsa okrarokno buthar phuru bebak swkang achainairok khe ani máng se, ang Israilni bisingo swkang achainai borok eba mal-matarokno yachak kha bórok ani wngnai. Ang se Subraiyung.”

¹⁴Subraiyung Sinai hasing panthoro Musino sa kha,

¹⁵“Lebini bwslasongno bosong tei núkhung thwgwini’-no bwsa chwla thwgwi umor nokha talsani simi tei aboni slái okrarokno lekha di.”

¹⁶Hakhe Musi Subraiyungni kók sama tẃi’-no bo dagijakmani hai khe bórokno lekha kha.

¹⁷Omorok wng kha Lebini bwslasongni mung; Gerson, Kohat tei Merari.

¹⁸Omorok Gersonni bwsarokni mung bórokni núkhungni khe Libni bai Simei.

¹⁹Kohatni núkhungni bwsarok khorokbrwi; Amram, Ijar, Hebron tei Ujiel.

²⁰Merarini núkhungni bwsarok khoroknwi; Mahali tei Musi, omorok Lebi bosongni bororok.

²¹Gerson bosongni wng kha Libni bai Simei núkhungni borok.

²²Talsa tei aboni saka umorni chwlarokno thumwi lekhamani khorok snisai tei ba-ra wng kha.

²³Gersonni bosongrok khe salthángbabai rínokni uklogo batham ma khanai.

²⁴Gersonni tẃiphang Laelni bwsla Elisa wng kha bórokni bosongni borok.

²⁵Bórok wng kha kuthumma nok bisingo kholopma, phatarno kholopna tei duglamo swngma rí swngnani barja rwjak.

²⁶Rínok kitingwi khachinani tei háyáno kitingwi khotol bisingo duglamo rí swngnani barja, abórok bebak’-no bórokni yago barja tongnai.

²⁷Kohat bosongni wng kha Amramsa, Ijarsa, Hebronsa tei Ujielsa; omorok khe Kohatsarok.

²⁸Nokha talsa tei aboni slái okra umorni chwlarok bebagwi wng kha khorok 8,600 ká-o, bórok kwthar háyáni barja manjak.

²⁹Kohat bosongni bororok rínokni salgrabai-o batham ma khanai.

³⁰Ujielni bwsla Elijaphan bórokni bosongni bokhorok Kohatsarok.

³¹Bórokni barja wng kha Swmai bokhok, songphang, thopna háyárok, ochairok noktharo samung khlaimani manwirok tei khotol kotorrokni duglamo swngmani rí, abórokni bebak barja bórok man kha.

³²Lebirokni bisingo tẃiphang wngnai khe Aron ochaini bwsla Eliasar. Noktharo samung khlainairokno naikini khlainani barja rwjak kha.

³³Merani bosongni wng kha Maheli bai Musi núkhungni borok.

³⁴Bórok nokha talsani tei aboni slái okra umorni chwla bwsarok bebagwi khorok 6,200 ká-o.

³⁵Merani bosongni tẃiphang wngnai khe Abihailni bwsla Juriel. Bórok ríni nokni salsibai bwkhago batham ma khanai.

³⁶Bórokni saka-o wng kha ríni nokni buphangrok, balphungrok, thongrok, yakungrok tei bebak thepamarokni barja man kha.

³⁷Bórok teibo thongrok, yakungrok, khilirok, budukrokni barja man kha.

³⁸Musi, Aron tei bini bwslasong khe rínokni salka bwkhakni bwskango batham ma khanai bórok khe Israil bororokni bagwi noktharo samung khlainani barja rwjak kha. Khoroksaswk o samungno khlainani nai khe a borok ma thwinai.

³⁹Subraiyung dagimani tẃi Musi bai Aron Lebi bosongni nokha talsa tei aboni slái okra umorni chwlarokno lekhamani bebagwi khorok nwichinwi-sai wng kha.

⁴⁰Hakhe Subraiyung Musino hai hwnwi sa kha, “Israil bororokni bebak chwla bwsarokno umor nokha talsa tei aboni slái okrarokno bumung swiwi lekha di.

⁴¹Nwng Lebirokno ani bagwi ma tubunai, Ang Subraiyung, nwng bebak Israilrokni bwsla okra tei mal-matarokni sak slái-o Lebirokno nai-o.”

⁴²Hakhe Subraiyung dagimani tẃi Musi Israil bororokni bebak okra bwsa chwlarokno lekha bai kha.

⁴³Bebak nokha talsa tei aboni slái kwbáng umorni bwsa chwla okrarokno lekhamani bebagwi khorok 22,273 wng kha.

⁴⁴Subraiyung Musino hai hwnwi sa kha,

⁴⁵“Bebak Israil bororokni bwsla okrani sak slái-o Lebirokno tei, mal-matarokni sak slái-o Lebirokni mal-matarokno ani thani yaphar di, Lebirok ani wngnai. Ang se Subraiyung.

⁴⁶Lebirokni bwsla okra khe khorok 273 ni slái báng kha.

⁴⁷Khoroksa borok khoroksani bagwi noktharni sekelni tẃi rukphai belep lep ba rw di. Nwng lep nwichi gerani belep na di,

⁴⁸o rang bárano Aron bai bini bwslasongno rw di.”

⁴⁹Hakhe Musi Lebirok bai phiyókmani bára tongma bai bororokno phiyókna bagwi rang na kha.

⁵⁰Israil bororokni bwsla okrarokni bo noktharni rwtama bai Sekel 1,365 rukphai na kha.

⁵¹Hakhe Subraiyung Musino dagimani hai khe phiyókjakma a rangno Aron bai bini bwslasongno rw kha.