Read Kok Borok LEKHAMUNG 31 Bible Online

LEKHAMUNG 31 - Kok Borok bible

LEKHAMUNG 31

²“Israilrokni bagwi Midiansarokno yagul su di. Omoni yagulo nwng ma thwinai,” hwnwi sa kha.

³Hakhe Musi lukurokno hai hwnwi sa kha, “Norok choba nang lainani bagwi tiyar wng bai di, Subraiyung Midianrokno yagul sunai.

⁴Norok Israil bosong matheni khorok sasai borok choba-o rohor di.”

⁵Hakhe choba-o tháng lainani bagwi bosong mathe-o sasai khe, khorok chinwisai Israil borok tiyar wng lai bai kha.

⁶Hakhe Musi bórokno choba-o rohor kha, bosong mathe-o khorok sasai khorok sasai khe tei bórok bai pal Eliasar ochaini bwsla Phinehasno nok kwtharni manwirok tei totro kotor supnani bagwi bini yago yapharwi rohor kha.

⁷Subraiyung Musino dagimani hai khe Midianrok bai bórok choba nang lai kha tei bórok bebak chwlarokno buthar bai kha.

⁸Bórok Midianni habugrano buthar kha tei bo bai baksa Ibi, Rekem, Sur, Hur tei Reba khorokba Midianni habugraroknobo buthar lai kha. Bórok Beorni bwsla Balamnobo seng bai khe buthar lai kha.

⁹Israil bororok Midianni bwrwirok tei chwrairokno khaui tlang bai kha tei bórokni musukrok, merarok tei manwi khwnwirokno bo tlang bai kha.

¹⁰Bebak Midianrok tongmani kamiyungrok, bórokni bathamrokno hór bai sókchaui rw bai kha.

¹¹Tei bórok aroni bebak tong kwrwi bororokno tei mal-mataroknobo tlang bai kha.

¹²Bórok omorokno, Musi, Eliasar ochai tei bebak Israil lukurokni thani-o Jerikoni Jordan rukung Moab ha panthoro tubu-ui phai lai kha.

¹³Musi, Eliasar ochai tei bebak lukurokni bokhorokrok bórok bai malainani bathamni phataro nongkhorwi tháng lai kha.

¹⁴Tamo khe Musi chobani kiphil phai bainai khorok sasaini bokhorok tei khoroksarani bokhorok tei sengkrakrokni tẃiphangrokno jolijak kha.

¹⁵Musi bórokno hai hwnwi sa kha, “Norok bwrwirokno kwthang de narwk bai kha?

¹⁶Nai di, o bwrwirok’-no Balamni kók khnaui Peoro Israil bororokno Subraiyung bai swkak bai kha, hakhe Israil bororokni saka-o Subraiyungni bok sók phai-o.

¹⁷Hakhe tabuk aboni bagwi bebak chwla bwsarok tei bwrwirok, chwla bai thu lai chá lainairokno butharwi pái bai di.

¹⁸Tei bebak bwrwi siklarok chwlarok bai thu lai ya kho hwn khe norokni bagwi kwthang narwk di.

¹⁹Norokni bisingo khoroksa swkno buthar kha hwn khe tei kwthwirokno rom khe bathamni daikungo nokha salsni tong lai di. Nokha salthamni salo khe norok bórokno khaui tubumani sak sakno kwthar khlai bai di. Tei omo hai kheno nokha salsnini salo sak sakno kwthar khlai bai di.

²⁰Norok bebak rírokno, bukurni manwirokno, pun buikhumu bai snamjak manwirokno tei buphangni manwirokno kwthar khlai bai di.”

²¹Eliasar ochai chobani kiphilnai bororokno hai hwnwi sa kha, “Omorokno Musini tẃi khe Subraiyung dagimani raidarok.

²²Hór bai khamwi pái ya rangchak, rukphai, pitol, sor, tin tei sisarokno hór bai sók di,

²³hakhe omorok kwthar wngnai tei hór bai khamnaino khe twi bai sú-ui kwthar khlai bai di.

²⁴Nokha salsnini salo norokni rírokno sú bai di. Hakhe norok kwthar wng suknai tei omoni yagulo norok batham bisingo ma phai bainai.”

²⁵Subraiyung Musino hai hwnwi sa kha,

²⁶“Nwng, Eliasar ochai tei bebak bosongni núkhungni tẃiphangrok bai khe choba-o romwi tubujaknai bororok bai mal-matarokno lekha lai di.

²⁷Tei omorokno choba-o thángnai sengkrakrok bai Israil lukurokno banta kainwi khe banta khe rw di.

²⁸Choba-o tháng bainai sengkrakrokni yakni khe, borok, musuk, Koraichirka tei merarokni bisingo ba ra-o kaisa Subraiyungni banta narwk di.

²⁹Bórokni banta khak sa manmani bisingnino naui Subraiyungno yapharmani hwnwi Eliasar ochaino rw di.

³⁰Tei Israil lukurok khak sa manmani borok, musukrok, korai chirkarok, merarok, punrok tei mal-matarokni mak bachini bisingni masano naui; Subraiyungni nokni barja mannai Lebirokno rw di.”

³¹Hakhe Musi bai Eliasar ochai Subraiyung dagima haino khlai lai kha.

³²Chobani tubu baimani bisingo sengkrakrok manmani wng kha. Mak 675,000 merarok

³³Musukrok khe mak 72,000 ká-o,

³⁴korai chirka mak 61,000 ká-o

³⁵bwrwi siklarok khorok 32,000, chwlarok bai thu ya kho bwrwirok.

³⁶Choba-o tháng bainai sengkrakrok man kha bebagwi mak 337,500 punrok, merarok.

³⁷Bórok Subraiyungno yapharmani punrok, merarok wng kha mak 675,

³⁸musukrok mak 36,000, aroni khe bórok Subraiyungno musuk mak 72 rw lai kha.

³⁹Korai chirkarok wng kha, mak 30,500, aroni bórok Subraiyungno Koraichirka mak 61 rw lai kha.

⁴⁰Borok khe khorok 16,000 aroni bórok Subraiyungno khorok 32 rw lai kha.

⁴¹Subraiyung Musino dagimani hai khe Musi omorok bebakno Subraiyungni thani yapharjakmani hwnwi Eliasar ochaino rw kha.

⁴²Musi choba-o tháng bainai sengkrakrokni yakni banta khaksano naui Israil lukurokno rwmani.

⁴³Lukurok manmani pun bai merarok wng kha mak 337,500.

⁴⁴Musukrok khe mak 36,00,

⁴⁵Korai chirkarok mak 30,500

⁴⁶borok khe khorok 6,000

⁴⁷Subraiyung Musino dagimani hai kheno, Israil lukurokni yakni ba chi-o khoroksa khe borok tei mal-matarokni bisingo masa naui Subraiyungni nokni barja manẃi tong bainai Lebirokno rwui rw kha.

⁴⁸Ulo sengkrakrokni bokhorokrok; khorok sasaini bokhorok, khorok sarani bokhorokrok Musini thani phai lai kha,

⁴⁹tei Musino hai hwnwi sa lai kha. “Nini selengrok, chini yago tong bainai sengkrakrokno lekha lai kha tei khoroksa phano karjak li ya.

⁵⁰Chwng borok mathe-o manmano Subraiyungni thani yapharnani tubu lai kha, omorok wng kha rangchakni manwirok, rang bwtang, yasitem, uakhum, mala bwtang. O yapharmungrokno Subraiyung chwngno kati rwui ton thung hwnwi yaphar lai-o.”

⁵¹Musi bai ochai Eliasar bórokni yakni bebak rangchakrok tei yak bai takjak manwirokno yachak lai kha.

⁵²Khorok sasaini tẃiphangrok, khorok sarani tẃiphangrok Subraiyungni thani-o yapharmani rangchakrok wng kha 16,750 sekel.

⁵³Sengkrakrok bebakno sak sakni manthaino na bai kha.

⁵⁴Musi bai Eliasar ochai khorok sasaini tẃiphangrok, sarani tẃiphangrokni yakni yachak kha. tei Subraiyungni bwskango Israil lukurok muituni bagwi Subraiyung bai malaimani rí nogo tubu-ui phai kha.