Read Kok Borok LEKHAMUNG 34 Bible Online

LEKHAMUNG 34 - Kok Borok bible

LEKHAMUNG 34

¹Subraiyung Musino hai hwnwi sa kha,

²Israil bororokno dagiui bórokno hai hwnwi sa bai di, “Norok ha Kanano hap phai khe, norokno achuk rwui rwnani naimani hani ha arirok wng kha omo hai;

³norokni salgrabai bwkhani ha ari khe hasing panthor Sinni simi Idom gana jora tei norokni salgrabaini ha ari khe sómni twijlangni páithak salka jora.

⁴Phiya norokni ha ari khe salgrabai bwkhak Akrabim jora kwrwngwi salgrabai bwkhak Kades-barnea jora, hakhe aroni Hasar Adar tei Asmon jora;

⁵tei o ha ari Asmonni simi Ijipni twima jora tei omo twijlang jora sógwinai.

⁶“Salthángbai bwkhakni ha ari khe Twijlang kotor jora, omono norokni sal thángbaini ha ari wngnai.

⁷“Norokni salsibai bwkhakni ha ari wng kha omo hai: Twijlang kotorni simi Hor hachuk jora;

⁸hor hachukni simi chengwi Lebohamato hap phaimani jora, aroni simi khe Sedad ha ari páima jora.

⁹Tei aroni khe Siphron jora pholokjak phainai tei omo Hasar-enano pái phainai, omono norokni salsibaini ha ari wngnai.

¹⁰“Norok salka bwkhakni ha arino Hasar-enanni simi Sepham jora boui na di,

¹¹o ari Sephamni simi Ribla jora Aroni salka bwkhak nongkhorwi thángnai tei ha ari nongkhorwi thángwi salka bwkhak twijlang Chineret jora sógwinai,

¹²o ari Jordan jora nongkhorwi thángnai tei omo twijlang sóm jora-o pauinai; “Omono norokni kitingwi ha ari wng sinai.”

¹³Musi Israil bororokno hai hwnwi dagiui sa kha, “O hano’-no norok pat karwi banta khe ma na bainai, obono Subraiyung bosong kaichukurokno tei khaksa bosongno rw di hwnwi dagimani;

¹⁴Gadni bosongrok tei Rubenni bosongrok buphasongni núkhung thwgwi ha banta man bai kha tei Manaseni khaksa bosongrokbo man bai kha.

¹⁵Jeriko ganani Jordanni salka, sal kasama phaisingo kainwi tei khaksa bosongrok bórokni ha manthaino man bai kha.”

¹⁶Subraiyung Musino hai hwnwi sa kha,

¹⁷“Norokno ha banta khlai rwnai bororokni mungrok wng kha omo se, Eliasar ochai tei Nunni bwsla Josua.

¹⁸Bosong thwgwini khoroksa tẃiphangno ha banta khlai thani chubanani bagwi na di.”

¹⁹Omorokno bororokni bumungrok: Juda bosongni khe, Jephuneni bwsla Kaleb.

²⁰Simion bosongni khe Amihudni bwsla Semuel.

²¹Benjamin bosongni khe Khislonni bwsla Elidad.

²²Dan bosongni khoroksa bokhorok khe, Joglini bwsla Buki.

²³Josepni bwsarokni bisingo Manase bosongo bokhorok khoroksa Ephodni bwsla Haniel.

²⁴Ephraim bosongni khoroksa bokhorok Siphtanni bwsla Kemuel.

²⁵Sebulun bosongni khoroksa bokhorok, Parnakni bwsla Elisaphan,

²⁶Isakar bosongni khoroksa bokhorok Asanni bwsla Paltiel.

²⁷Aser bosongni bokhorok khoroksa Selomini bwsla Ahihud.

²⁸Naptali bosongni khoroksa bokhorok Amihudni bwsla Pedahel.

²⁹O bororokno’-no Subraiyung Israil lukurokni bagwi Kanan ha-o ha banta khe bagwi rw bai di hwnwi dagimani.