Read Kok Borok LEKHAMUNG 35 Bible Online

LEKHAMUNG 35 - Kok Borok bible

LEKHAMUNG 35

¹Subraiyung Musino Jerikoni Jordan rukung ha panthoro Moabo hai hwnwi sa kha,

²“Nwng Israil bororokno dagi di, norok ha banta manmani bisingni baksa kamiyungrokno Lebirokno tongnani rw di tei kamiyung kitingwi mera mwrwgwi chá rwjaknai haroknobo rw di.

³O kamiyungrogo bórok ma tongnai tei sam gwnang ha kwkhrang khe bórokni merarokni, musukrokni tei mal-matarokni bagwi wngnai.

⁴Bórokni merarokni bagwi rwmani kamiyungrok khe kamiyung kitingwi chokdeualni simi muk sasai ma wngnai.

⁵Kamiyungni phataro salka bwkhak muk nwisai, salgrabai bwkhak muk nwisai, salthángbai bwkhak muk nwisai tei salsibai bwkhak muk nwisai ma wngnai tei kamiyung khe kwcharo ma wngnai, omo bórokni bagwi kamiyung bisingo mera mwrwkjaknai ha wngnai.

⁶Norok Lebirokno kamiyungrok rwmani bisingo kamiyung khung dok khe khárjaknai wngnai, tamni hwn ba khoroksa swk borok khoroksa swkno buthar khe aro khárwi mannai, omoni yak bára teibo khung brwichinwi kamiyung rw bai di.

⁷Norok bebagwi Lebirokno khung brwichichar kamiyungrok, merarok mwrwkjaknai bai khe rw di.

⁸Israil bororokni ha manmani Lebirokno rw lai phuru khe, kwbáng mannairokni aro khe kwbáng tei kisa mannairokni aro khe kisa naui bebak bosongrok sak sakni manmani bisingni kháiklaiwi baksa kamiyung Lebirokno rw lai di.”

⁹Subraiyung Musino hai hwnwi sa kha,

¹⁰Israil bororokno hai hwnwi sa di, “Norok Jordan bárwi Kanan ha-o sók phai phuru khe,

¹¹norok kamiyung khárjaknai hwnwi saui na lai di, borok khoroksa, khoroksa swkno achomsa khe butharjak trwng khe, aro khárwi manna tẃi.

¹²Lukurokni bwskango buj thumjak ya sini swkango ma thwi ya tẃi khe o kamiyungrok khe yagul sunairokni yakni yókjaknai wngnai.

¹³Norok rwmani kamiyungrokni bisingo o kamiyung khungdok khe khárjaknai kamiyungrok wngnai.

¹⁴Kamiyung khárjaknai yang naro khungtham tei Jordan ayang naro khungtham nwng ma rwnai.

¹⁵O kamiyung khungdokrok Israil bororokni, sini ya bororokni tei nograirokni bagwi wngnai, khoroksa swk uansuk yaui khoroksa swkno buthar khe aro khárwi mannai.

¹⁶“Phiya ba bo khoroksano sorni manwi bai buthar khe o butharnai borok bo’-bo butharjak phinai.

¹⁷Tumungno bo bini yakni holong bai khitarwi buthar khe, bo’-bo sói borok butharnai wng kha. O borokbo butharjak phinai.

¹⁸Tumung bo bini yakni buphangni manwi bai buthar khe, bo sói borok butharnai wng kha, o borokbo butharjak phinai.

¹⁹Yagul sunai borok bono malai khe ma butharnai.

²⁰“Khoroksa borok tei khoroksano naislerwi bono yókhagwi eba khe mungsa swk bai khitarwi buthar khe,

²¹eba khe ari wng laiwi bono yak tisaui buthar khe bo sói borok butharnai wng sinai. Tei yagul sunai malai phuru khe bonobo buthar sinai.

²²“Tamo khe bo ari wng lai yaui achomsa yókhagwi rohor khe eba khe mungsa swk bai khitarwi buthar khe,

²³eba khe nuk slap ya khe holong khitarma bai o borok thwi khe, bo bini ari wng ya phano tei bini hamya nai ya phano,

²⁴lukurok raida-o tongma haino butharnai bai butharjaknaino bujsói ma khlainai.

²⁵Lukurok borok butharnaino yagul sunaini yakni phiyóknai tei lukurokbo khárwi phaimani tongthai kamiyungo bono ton phinai, thok kwthar bai chongjaknai ochai okra thwi ya sak bo aro tongnai.

²⁶Tamo khe borok butharnaibo khárwi phaimani tongthai kamiyung láiwi tháng khe

²⁷yagul sunai borok bono kamiyungni phataro malaiwi bono buthar khe, butharnai borok majra kwrwi wng sinai.

²⁸“Tamni hwn ba ochai okra thwi ya sak bo aro tongthai kamiyungo tongna klai-o. Phiya ochai okra thwi baimani yagulo borok butharnai bini ha-o kiphilwi thángthai klai-o.

²⁹Omono norokni kusung kusungo norok tongwimani ha-o kerong raida wngwi tongthai klai-o.

³⁰“Borok khoroksa tei khoroksa swkno buthar khe, khoroknwi tei aboni kwbáng sakki tong khe se bono butharwi mano; khoroksani sakki bai bono butharwi man ya.

³¹Tei bo nwng borok butharnaini yakni rangno ta chá di, bo thwinani’-no klai-o. Bo butharjagwi ma thwinai.

³²Ochai okra thwina swkango tongthai kamiyungni khárwi bini ha-o tongwinai borokni yakni rangno ta yachak di.

³³Nwng tongmani hano hamya ta khlai di, borok butharma bai ha hamya wngo, buino butharnaini thẃi klai phi ya sak o hano tei kwthar khlaiwi man ya.

³⁴Nwng tongmani hano hamya ta khlai di, tamni hwn ba Ang Subraiyung, Israil bororokni bising ang tongo.”