Read Kok Borok LEKHAMUNG 4 Bible Online

LEKHAMUNG 4 - Kok Borok bible

LEKHAMUNG 4

²Kohat bosongni Lebirokno bórokni bosongrokno tei núkhungni bororokno lekha bai di,

³nokha bisi thamchi umorni simi nokha bisi bachi umor jora ríni nogo samung khlainani chúknairokno lekha di.

⁴Kohat bosongni samung khlainani barja khe kuthumma rínokni bai kwthar kuk manwirokni barja rwjak.

⁵Batham kutulnani jora wng phuru khe Aron tei bini bwslasong bisingo habwi swngjak ríno norwi Swmai bokhokno ma kholopnai.

⁶Hakhe bórok abono pun bukur bai ma kholopnai tei saka-o kosom kwkhrang rí phinwi aboni bisingo balphung ma tonnai.

⁷Bórok Subraiyungno yapharmani auang tongmani songphango kosom kwkhrang rí phinwi ma rwnai tei aboni saka-o khurirok ma tonnai; satraini khurirok, dangairok, arak yapharmani dangairok tei aboni saka-o auang cho phlai ya khe ma tonnai.

⁸Hakhe bórok abórokni saka-o rí kwchak phinwi ma tonnai, abono pun bukur bai khe kholobwi tonnai tei aboni bisingo balphung ma tonnai.

⁹Hakhe bórok rí kosom kwkhrang naui chati thopna bai baksa chatirok, mairangrokno tei bebak thok tongmani manwirokno ma kholopnai.

¹⁰Bórok bebak manwirokno pun bukur bai dului abono balphungo ma tonnai.

¹¹Tei bórok rangchakni háyá-o kosom kwkhrang rí ma phinnai tei pun bukur bai kholobwi ma tonnai tei aboni bisingo balphung ma tonnai.

¹²Bórok noktharo samungo phnangmani bebak manwi khwnwirokno naui rí kosom kwkhrang bai dului pun bukur bai abórokno kholobwi balphungo ma tonnai.

¹³Bórok háyáni thaplarokno norwi phantokbarni ríno aro phinnai.

¹⁴Bórok háyá-o nangmani bebak manwirokno aro saka-o khe ma tonnai; thapa, yakheprok, tharukrok, yak súmani dangai tei bebak háyáni manwirok tei balphungni saka-o pun bukur bai ma bólnai tei balphung ma tonnai.

¹⁵Bathamni kutulwi thángna phuru khe Aron bai bini bwslasong háyárokno tei aboni manwi khwnwirokno kholop bai khe Kohat bosongni bororok ma balnai. Tamo khe bórok kwthar manwino ma tang glak, wng ya khe bórok thwinai. Omorok’-no Kohat bosongrok kuthum laiwi rínokno tẃinani barja rwjak.

¹⁶Aronni bwsla Eliasar ochai khe chati phnangnani bagwi tei thok, satrai motom, maichlam yapharmung, thok phulwi chongjaknai thok tei rínokni tei aro bisingo tongmani manwirokni barja rwjak kha.

¹⁷Subraiyung Musi tei Aronno hai hwnwi sa kha,

¹⁸“Lebirokni bisingni Kohatsa bosongrokno ta sokomor di.

¹⁹Hwn ba bórok kwthar manwirokni samo phaiwi thwi ya tẃi khe Aron tei bini bwslasongni bisingo habwi borok thwgwi samung khlainani bagwi banta khe rw thung.

²⁰Phiya ba Kohatrok bisingo habwi kwthar manwirokno naituknani bagwi srapsa phano ta hap thung, wng ya khe thwi bainai.”

²¹Subraiyung Musino sa kha,

²²Gerson bosongni Lebirokno bórokni núkhung bai khe lekhaui nai di.

²³Ríni nok bisingo Subraiyungni bwskango Kaitorni samung khlai mannai nokha bisi thamchini simi bisi bachi umor jorano lekha di.

²⁴Gerson núkhungni bororokni bagwi khe monnani tei balwi tẃinani barja.

²⁵Bórok ríni nok bisingo kholopmani phataro kholopmani saka-o kholopmani mui bukur tei duglamni rí swngmarok,

²⁶duglamo swngmani rírok, rínokno kitingwi tongmani budukrok tei khotol bisingo hapmani duglamni rí swngjak tei bebak abórokno thepana bagwi samung nangmani manwirokni barja. Bórok bebak nangmani samungrokno ma khlainai.

²⁷Aron bai bini bwslasongno bermani bebak samungrokno Gerson bosongni bororok kaham khe khw de khlai khlai ya, Musi bai Aron bórokno naikini ma khlainai.

²⁸Gerson bosongni borokni barja khe ríni nok bisingo Aron ochaini bwsla Ithamar tholmani tẃi se wngnai.

²⁹Merarini núkhung bai bosong mareui lekha di;

³⁰nwng borokno nokha bisiktham chini simi nokha bisi bachi jora umorno borok thwgwi Subraiyungni bwskango samung khlaiwi manna chúkjakrokno lekha di.

³¹Subraiyungni bwskango bórokni barja wng kha rínokni bokong, thong, tei sungchamarokno tẃinani.

³²Thongla kitingwi yakungrok, khilirok, dwkhwirok tei thepanani manwirok bebak nangmani manwirok borok thwgwi bórokno barja rwmani manwino ma tẃinai tei mung saui ma rwnai.

³³Merarini núkhung thwgwi abo hai khe ríni nokni barja ma tongnai. Abo wng kha bórok Aron ochaini bwsla Ithamar tholmani tẃi khe samung ma khlainai.

³⁴Bosong tei núkhung romwi Musi bai Aron tei Israilni tẃiphangrok Kohatsarokno lekhajak kha.

³⁵Subraiyungni ríni nok bisingo habwi samung khlai mannai nokha bisik thamchini simi bisi bachi jora umorni okrano Subraiyung dagimani hai khe lekha lai kha;

³⁶bórokni núkhungo bebagwi khorok 2,750 ká-o.

³⁷Omorokno rí nogo samung tangnai Kohatni bosongrok, Musino Subraiyung dagima hai khe Aron bai Musi lekhamani.

³⁸Gersonrokno bórokni búchusongni bosong tei núkhung thwgwi lekhamani wng kha,

³⁹nokha bisi thamchini simi nokha bisi bachi umorni jora rínokni bisingo samung tangnairok wng kha,

⁴⁰bórokni búchu tei bosong bai núkhung lekhamani khorok 2630 ká-o.

⁴¹Omorokno Gerson bosongni rí nogo samung tangnairokno lekhamani. Musi bai Aronno Subraiyung dagimani hai khe lekhamani.

⁴²Tei Merari bwslasong búchusong bai núkhung thwgwi lekhamani,

⁴³nokha bisikthamchini simi nokha bisibachini umor jora bebak rínogo samung tangwi mannairok wng kha,

⁴⁴bórokni bosong thwgwi lekhamani khorok 3,200 ká-o.

⁴⁵Omorok wng kha Merarini bosong thwgwi lekhamani abo Aron bai Musino Subraiyung lekha di hwnwi saui lekhamani.

⁴⁶Abo hai khe Musi bai Aron tei Israilni tẃiphangrok Lebirokno bórokni bosong tei núkhung thwgwi lekha kha.

⁴⁷Nokha bisi thamchini simi nokha bisibachi umor jora rínogo samung tangwi mannai tei poja tẃi mannairok wng kha;

⁴⁸abórok bebagwi khorok 8580 ká-o.

⁴⁹Musino Subraiyung dagimani hai khe bórok borok thwgwi monnani tei manwi tẃinani chongjak bai kha.