Read Kok Borok LEKHAMUNG 5 Bible Online

LEKHAMUNG 5 - Kok Borok bible

LEKHAMUNG 5

¹Subraiyung Musino hai hwnwi sa kha,

²“Nwng Israil bororokno hai hwnwi dagi di, bebak biyadi chájakrok, sákolomni bwtwi yorjaknairokno tei kwthwi bai nangwi sak sumnairokno bathamni phataro tikhlai rohor di.

³Hakhe ang tongmani tongthaino dera ya tẃi nwng bwrwirokno tei chwlarokno bathamni phataro rwui ma rohornai.”

⁴Hakhe Israilrok Musino samani haino khlai kha tei abórokno bathamni phataro rohor bai kha.

⁵Subraiyung Musino hai hwnwi sa kha,

⁶Israil bororokno hai hwnwi sa di, khoroksa swk Subraiyungni kókno khna yaui sumsok khlai khe tei khoroksa swkno dera rw khe,

⁷bo bandiui cha ya khlaimani sumsokno ma gosinai tei bebak bono supungwi kiphilwi ma rwnai tei bo cha ya khlaimani borokno banta kaiba ma rwnai.

⁸Hwn ba a borok thwiwi tháng khe tei abono su-ui rwjaknai bini sandairok kwrwi hwn khe a bantano ochairokni bagwi Subraiyungno yapharjaknai aboni sak slái-o a borokni cha yano súchana bagwi mera chwla ma ratharnai.

⁹Tei Israilsarok ochaini thani-o yapharmung kwtharrok tubumani abo bini’-no wngnai.

¹⁰Borok mathe kwthar manwirok yapharmani abo ochaini’-no wngnai.

¹¹Subraiyung Musino hai hwnwi sa kha,

¹²Israil bororokno sa di, khoroksa swk bwrwi bwsaini kók khna ya khe tei khoroksa chwla bai tong khe,

¹³tei abono bwsaini mokolo klai ya wng khe tei samung hamya tangwi suda tepsa khe huiwi tong khe khoroksa phano sanai bo kwrwi hwn khe a bwrwi sakno kwthar ya khlai kha.

¹⁴Bini bihik samung hamya tangmani bagwi bwkha-o risi nangwi phai khe eba bwrwi samung hamya samung tang ya phano bwsai risi nang khe,

¹⁵hakhe chwla bini bihikno ochaini thani tubu-ui tei nangmani yapharmungrok tubunai, abo wng kha kilogram kaisa barlini auang, tamo khe aro olibni thok eba khe thok motomrok bai tonwi man glak, tamni hwn ba obo wng kha bwsaini risi nangmani bwthái bwchlwi yapharmung se klai-o, hamya samung khlaimano muitu khlaimani se klai-o.

¹⁶Ochai a bwrwino samo tubu-ui Subraiyungni bwskango bacha rwnai

¹⁷tei ochai hani manwi-o twi naui ríni nok bisingni kisa ha naui twi-o tonnai.

¹⁸Hakhe ochai bwrwino Subraiyungni bwskango bacha rwui bwrwini bokhorokni bwkhnaino kheng klaiwi tei bwrwini yago auang yapharmungno yapharnai abo risini auang yapharmung se, ochai bini yago tẃi kwkhani dangaino romnai abono swraimung nang rwnai.

¹⁹Hakhe ochai bwrwino abo hai khe swmai tangwi hai hwnwi hwn rwnai, “Nini bwsai tong twtwi kubun chwla bai tong ya hwn khe swraimung nang rwnai twi kwkha nono mungsa khlai man ya wngnai.

²⁰Tamo khe ba nwsai tong twtwi kubun chwla bai uaija-uiju khe,

²¹hakhe ochai a bwrwino swraimungni swmai kók khna rwui ahai hwnwi sanai, Subraiyung bini bororokni bwskango nono swraimung nangjak khlainai hakhe nini yaphak robonsanai tei bohok dusa khe tei bwsa báui man glak;

²²tei o twi bohogo habwi nini bohokno dusa rwnai hakhe nini yaphak robonsaui soknai;” aphuru khe, a bwrwi “Amen, Amen,” hwnwi ma sanai.

²³Hakhe ochai bijap kang sa-o, o swraimungno swiwi twi kwkha bai sú-ui khibinai.

²⁴Ochai a bwrwino swraimung nang rwnai twi kwkha ma khannai, hakhe a swraimung tubunai twi bini bisingo habwi belai khe sa rwnai.

²⁵ochai auang a yapharmungno bwrwini yakni naui Subraiyungni bwskango tubu-ui yapharnai,

²⁶hakhe ochai auanno yaphasa naui muituni bagwi háyá saka-o abono sóknai hakhe bwrwino a twino khannai;

²⁷bo bwrwino twi nung rwmani abo bwrwi bwsai tong twtwi samung hamya tang khe a twi bono belai khe ayuk-muyuk khlainai tei bini bwsak torsanai, bini yaphakrok borsanai tei bwrwi bini bororokni bisingo swraimung nangjak wngnai.

²⁸Hwn ba a bwrwi sakno dera rw ya khe, kwthar khe tong khe a bwrwi yóknai tei bwsarok mannai.

²⁹Omo hai se risi tẃi laimani raida, bwrwi khoroksani bwsai tong twtwi se lama Koróui thángwi sakno dera rw khe,

³⁰chwla bihikno risi tẃi khe hakhe bo bwrwino Subraiyungni bwskango bacha rwnai hakhe ochai o raidarok tẃi khe bwrwino buj khlainai.

³¹Hakhe bwsaini mungsa cha ya kwrwi wngnai, hwn ba bwrwini hamya manjak khe bini saka’-ono klainai.