Read Kok Borok LEKHAMUNG 8 Bible Online

LEKHAMUNG 8 - Kok Borok bible

LEKHAMUNG 8

¹Subraiyung Musino hai hwnwi sa kha,

²“Aronno sa di, nwng chati phnang khe kaisni chatirok thopnarokni bwskango ma chẃng bainai.”

³Aron omo hai’-no khlai kha, Subraiyung Musino samani hai khe bo chatirokno thopna bwkhak nahar rwui rw kha.

⁴Subraiyung Musino phunukmani hai khe chati thopna snamjak kha. Abo omo hai; rangchak tokpherjak bokhorokni simi yakung jora tokpherjak khe snamjak kha.

⁵Subraiyung Musino hai hwnwi sa kha,

⁶“Nwng Lebirokno Israil bororok bai khagwi bórokno kwthar khlai di.

⁷Nwng bórokno kwthar khlainani bagwi omo hai khlai di, twi kwthar bai bórokno twi sarcha di bórokni bwsak gwnangwi sengsa bai bórokno silwi rw di tei bórokni rírokno sú-ui rw di, hakhe bórok kwthar wngnai.

⁸Aboni ulo bórok musuk chasloksano tubu thung tei mai kwtal yapharmungni bagwi auan kwsap thok bai buljak tubu thung tei nwng musuk chasloksano sumsok yapharmungni bagwi tubu di.

⁹Ulo bebak Israil dophani bororokno kwrẃngsa khlaiwi Lebirokno kuthum laima nok bwskango tubu bai di.

¹⁰Nwng Lebirokno Subraiyungni bwskango tubu phuru khe Israilni bororok Lebirokni bokhorok saka-o yak ma beranai.

¹¹Hakhe bórok ani samung tangwi manna tẃi Aron khe Lebirokno Subraiyungni thani -o Israilrokni sibwi yapharmung hwnwi ma yapharnai.

¹²Ulo Lebirok musukni bokhorogo bórokni yak ma beranai, hakhe nwng Lebirokno súnani bagwi kaisa sumsok yapharmung tei kaisa khe sógwi yapharmung Subraiyungni thani ma yapharnai.

¹³Aron tei bini bwsarokni bwskango Lebirokno bacha rwui Subraiyungni thani-o sibwi yapharmung hwnwi yaphar di.

¹⁴“Omo hai khe nwng Lebirokno tei Israil bororok bai swkak di, Lebirok khe ani borok wngnai.

¹⁵Nwng Lebirokno kwthar khlai baiwi tei bórokno sibwi yapharmani yagulo Lebirok kuthum laima nogo samung khlaiwi mannai.

¹⁶Israil bororokni bisingo bórok ani borok wngnai, bwsa okrani sak slái-o ang bórokno na kha.

¹⁷Israilni bebak bwsa okra ani wngnai abo bororok bai mal-mata ang Ijip ha-o bebak bwsa okrano swprakmani salo ani bagwi bórokno swkak kha.

¹⁸Phiya Israilni bisingo Lebirokno ang bwsa okra hwnwi na kha.

¹⁹Tei Israilni kuthum laima nogo samung khlaina bagwi tei Israilrokno súchana bagwi abo Israilrok kwthar háyá gandaro phai phuru dera ya tẃi khe ang Israil bosongni bisingo Lebirokno yapharmung hai khe Aron bai bini bwsarokni thani yaphar kha.”

²⁰Abo Subraiyung Musino dagima tẃi’-no Musi bai Aron tei Israilni bororok lebirok sama haino khlai lai kha.

²¹Hakhe Lebirok sak sakno sap-sutra khlai kha tei rírok sú bai kha. Aphuru Aron borokno Subraiyungni thani yaphar kha. Hakhe Aron borokno sap-sutra khlaiwi kwthar khlai kha.

²²Aboni ulo khe Lebirok Aron tei bini sajla bai baksa rínok bisingo bórokni samung khlaina tháng bai kha. Hakhe bórok Musino Subraiyung, Lebirokno khlai rwna dagima tẃi’-no khlai kha.

²³Subraiyung Musino hai hwnwi sa kha,

²⁴“Omono Lebirok ma khlaithai, nokha bisik nwichiba eba aboni slái kwbáng hwn khe bórok rínok bisingo samung ma klainai.

²⁵Tei nokha bisi bachi umor hwn khe bórok samungni ma lenglanai tei samung khlai man glak.

²⁶Bórok rínok bisingo bórokni takhukno chubaui mannai phiya ba Samung le khlaiwi man glak abo hai kheno Lebirok samung ma khlainai.”