Read Kok Borok LEKHAMUNG 9 Bible Online

LEKHAMUNG 9 - Kok Borok bible

LEKHAMUNG 9

¹Israilrok ha Ijipni nongkhorwi phaimani yagulo nokha bisiknwini puilani talo Sinai hasing panthoro Subraiyung Musino hai hwnwi sa kha,

²“Israilni bororok jora’-ono yókma ter panda khlai thung.

³O talni nokha sal chibrwini sanja jora-o norok abono khlai di, bini kerong bai raida tongma tẃi’-no khlai di.”

⁴Aphuru khe Musi Israil borokno yókma terni panda khlai di hwnwi sa kha.

⁵Aboni bagwi bórok puilani talni nokha sal chibrwini sanja jora-o, Sinai hasing panthoro panda khlai kha. Subraiyung Musino dagimani hai khe Israil borok panda khlai lai kha.

⁶Hwn ba bórok kisa swk borok kwthwi tangwi sak kusum wngmani bagwi a salo bórok yókma ter panda khlaiwi man li ya hakhe bórok a salo Musi bai Aronni thani phai lai kha.

⁷O bororok Musino, “Chwng borok kwthwi tangwi sak kusum wng kha hakhe tamni chwng ba Israil bororok bai baksa chongjak jora Subraiyungno yapharmani khopjak ya ma tong sinai wng lang?” hwnwi sa kha.

⁸Musi bórokno hai, “Kisa bathak bai gra di, Subraiyung norokno tẃiwi tamo sanani nai ang khnaui phai gra anw,” hwnwi sa kha.

⁹Ulo Subraiyung Musino hai hwnwi sa kha,

¹⁰“Nwng Israil bororokno sa di, Khoroksa swk norokni bisingo eba khe norokni bosongrokni bisingo borok kwthwi tangwi sak kusum wng phano tei lama hakchalo tong phano bórok Subraiyungni yókma terni panda khlai mannai

¹¹nokha tal nwini sal chibrwi salni sanja-o bórok o terno ma khlainai, bórok abono chuan kwrwi auang tei mui kwkha ma chá lainai.

¹²Bórok phung jora sók phai ya sak mungsa phano ta khibi thung tei bekreng kongsa phanno ta swbai thung, yókma ter pandani bebak raida tongmani jora tẃi khlai thung.

¹³Hwn ba khoroksa swk kwthar khe tong khe tei lamarogo bo wng yak khe hai phano bo yókma ter panda khlai ya hwn khe a borok bini bororokni aroni khagwi rohorjaknai tamni hwn ba bo Subraiyungni chongjak jora-o yapharmung yaphar li ya, a borok bini sakni sumsokno ma rujunai.

¹⁴“Tei khoroksa swk phatar hani borok norokni aro tongwi Subraiyungni bagwi yókma terni panda khlai khe, a borok pandani raida tongma tẃi kerong rwksaui ma khlainai, phatarsa phano, ha-o achainai phano raida kaisa’-no ma wngnai.”

¹⁵Ríni nokno songchajakmani salo, chumui dulsa phaiwi abono kholop phai kha, sanjani simi teini phung jora omo hórni budul hai kheno tong kha.

¹⁶Omo hai khe mángno wng kha, salo khe chumui dulsa phaiwi kholop phai-o tei horo khe hórni budul hai khe nukjago.

¹⁷Rí nok sakani chumui rosaui tlangjak khe Israilrok aroni kutul lai-o, chumui bathagwi tongma-o khe bórok haino hai batham khlai phi-o.

¹⁸Subraiyung dagimani tẃi’-no Israilrok tháng lai-o tei Subraiyung dagimani tẃi’-no batham kha lai phi-o, Rínok saka-o chumui tong sak bórok aro kwrẃngsa-o tong lai-o.

¹⁹Chumui kwrẃngsa-o sal kwdwkma tong khe Israilrok Subraiyungni kókno khnaui aroni kutul lai ya khe tong lai-o.

²⁰Uáisa uisu khe chumui rírokni saka-o sal dwk ya khe tongo aphuru bórok Subraiyungni dagimani tẃi khe bisingo ma tong bai-o tei Subraiyungni dagima tẃi ma kutul bai-o.

²¹Tei jora jora khe chumui sanja jorani simi phung jora se tongo tei phungo chumui rosaui tlangjak khe bórok aroni kutul lai-o, hwn ba salo phano, horo phano chumui rosajak khe bórok aroni ma kutul lai-o.

²²Salnwi phano wng thung eba talsa phano wng thung eba bisi kaisa phano wng thung chumui aro tong sak Israilrok arono haino ma tong bai-o, hwn ba chumui rosajak khe bórok bo ma kutul bai-o.

²³Subraiyung dagimani tẃi bórok batham ma kha-o tei Subraiyung dagimani tẃi’-no ma kutul bai-o, bórok Musini bising tẃi Subraiyung samani haino Subraiyungni kókno ma khna bai-o.