Read Kok Borok MIKA 1 Bible Online

MIKA 1 - Kok Borok bible

MIKA 1

¹Jotham, Ahas tei Hejekia Judani habugra cháui tong phuru Subraiyungni kók Moresetni diyari Mikano Samaria tei Jerusalemno tẃiwi kók samani.

²O dopharok bebakno khna bái di; o ha saka-o tongnairok bebakno khunju kai di; Subraiyung Kaitor nono kebengwi majra bernai Subraiyung bini noktharo tongwi sakhlainai.

³Tamni hwn ba nai di, Subraiyung bini tongthaini phaiwi tongo, bo nongkhorwi phaiwi hathái sakarogo himnai.

⁴Hakhe hatháirok mundai hóro unok tẃi khe unoknai; harungrok pekhogwi thángnai halapni twi kochok khlai tẃi khe bini yakung yaphango geleui kochok khlainai.

⁵Israilni bororok tei Jakobni nokni bororok sumsok khlaima bagwi se omorok bebakno wngo. Jakobni cha ya le tamo? Samaria ya de? Tei Judiani nokni sumsokrok khe? Jerusalem le?

⁶Aboni bagwino ang Samariano ha chak-chakno swbaiwi rúngjak khe tonnai tei angur bwlwng snamnai. Ang bini aroni holongrokno harungo lukhlaiwi rohornai tei bini yaphang lujakrokno nukjak rwnai.

⁷Bini bebak takjak mwtairok togwi sukhrupjaknai tei aro rwmani manwirok hór bai sógwi páijak báinai tei aroni takjak mwtai-mangrok ahaino klaiwi tongnai; tamni hwn ba bo abórokno sak phalnaijwkrokni aroni se thumo tei abórok sak phalwi ajimani ba sak phalthani-no thepajak phinai.

⁸Aboni bagwi ang bwkha khamnai tei kapnai; ang yakung bukcha tei rí kwrwi khe himnai; ang siyalrok hai khe chiriknai tei ostrik tokrok hai khe swlwgwi kapnai.

⁹Tamni hwn ba bini a kwsa ham glak. Abo Judani thanibo sók phai kha; abo Jerusalemni duglamo ani bororokni thanibo sógwi kha.

¹⁰A kókno Gato ta sa di, tabo ta kap di; norok Betleaprani[1] hadlwi-o goirok lai di.

¹¹Saphiro tongnairok, norok sak lánga khlaiwi lachimung manẃi thángwi pái di. Sanano tongnairok ongkhorwi ta phai di; Bethejel swlwgwi kap kha, bo norokni phaising tei bacha glak kha.

¹²Marotni bororok mokol logwi kahamno naisingwi tong lai-o, tamni hwn ba Subraiyungni aroni digi-sigi phai kha, abo Jerusalemni dugayungni samo suda phaiwi sók phai kha.

¹³O Lakhisni bororok, norok malkhungo korai kha si di; Israilni cha ya nini aro swkang nukjak gra-o hwnwi nwng Siyonni sajwkno nini a sumsokni lama-o tlang kha.

¹⁴Aboni bagwi nwng Moreset-gatno yakarwi rohormani hilino rw di; Israilni habugrarok Aksibno bwkha beraui man glak.

¹⁵Ha Maresani bororok, ang norokni thani khoroksa norokno sekpronaino tubu phinai, Israilni chẃngsacha Adulamni thani thángwi páinai.

¹⁶Norok norokni hamjakma bwsarokni bagwi bokhorok silwi pái di; norok sikruk hai thunta wng lai pái di, tamni hwn ba bórok buini ha-o khaui tlangjagwi páinai.