Read Kok Borok MIKA 2 Bible Online

MIKA 2 - Kok Borok bible

MIKA 2

¹Thuyamo tong tw tẃi samung hamya khlaina chapnairok bwswk se hamya sitrano! Phung aikheno bórok a samung hamyano khlai-o, tamni hwn ba abo hai khlaina phan bórokni yago tongo.

²Bórok ha manna muchung khe, nokrok manna muchung khe segwi na-o, bórok borokno, nok tei aboni nokphangno tei nokni bororokno bandiui kusubo.

³Aboni bagwi Subraiyung sa-o: Ang norokni núkhungni banta hamya chabwi tong kha, aroni nwng nini gwdnano sokogwi man glak; nwng kung chugui ta him di, tamni hwn ba omo jora hamya wngnai.

⁴A salo bórok norokno thesra kariui rwchapmung rwchap lai anw tei hai hwnwi saui swlwgwi kap lai anw, “Chwng komor súk kha, bo chini dophani manwi-khwnwirokno naui pái kha; bo abono ani oroni bahai khe tlangwi pái lang! Chini huk-habarokno bo chini kena arirokno[2] se banta khlaiwi rw si-o.”

⁵Aboni bagwino norokni bere khoroksa phano Subraiyungni bororok bai baksa banta man glak.

⁶“Ta pír di” hwnwi bórok sa lai-o, “Khoroksa swk phano omo hairokno tẃiwi ta pír di; tamni hwn ba chini thani lachimung phai glak.”

⁷O Jakobni bosong, nwng abo hai khe sanai de? Subraiyung ba tamo hama bara da? Omorok bo khlaima de? Ani kókrok sutrang khe tongnairokno kaham khlai ya diba?

⁸Phiya ba norok ani bororokno[3] kena arirok kebeng tẃi khe kebengwi bacha kha; chobani kókrokno uansuk yaui kwchang kwchang[4] khe himwi thángnairokni rírokno nwng khengwi na kha.

⁹Norok ani bororokni bwrwi bwsarokno bórokni hamjakma nokrokni rwkhlai-o; tei nwng bórokni chwrai bwsarokni aroni ani chẃngsachano mol brúmni bagwi twlangwi pái-o.

¹⁰Bacha di tei tháng di; omo lengla thai ya, tamni hwn ba selengmasingcha khlaima bagwi abo kirimasingcha khe komornai.

¹¹Tumung khoroksa swk tatal tei bandinaisa phaiwi “Ang sa-o, norokni kwbángma angur bwtwi tei chuak wngnai” hwnwi sa phai khe a borok se bórokni diyari wngnai!

¹²O Jakob, ang norokno kubu-kubui’-no kwrẃngsa khe thumnai, ang Israilrokni karwi klangjaknairokno kwrẃngsa khe thumnai; ang bórokno mera bodolno thum tẃi khe pal khe chabwi thumnai; ang bórokno mera kutni thumwi chap tẃi khe chapnai tei sula-o tlangnai; tei ha-o ahaino ahai bororok bai kupulung wng phinai.

¹³Khaui tlangjaknairokno phiyókna bagwi lama khlaiwi rwnairokni swkang swkang thángnai; bórok dugayungno swbaiwi thángnai. Bórokni bugra Subraiyung bórokni swkang swkang thángnai.